സംവിധായകന്‍ ജോഷിയുടെ വീട്ടില്‍ നിന്ന് 1 കോടിയുടെ ആഭരണങ്ങള്‍ മോഷ്ടിച്ചു

സംവിധായകന്‍ ജോഷിയുടെ കൊച്ചിയിലെ പനമ്പള്ളി നഗറിലെ 10 ക്രോസ് റോഡിലെ ബി സ്ട്രീറ്റിലുള്ള അഭിലാഷം വീട്ടില്‍ ഇന്ന് (ഏപ്രില്‍ 20) പുലര്‍ച്ചെ മോഷണം നടന്നു.

വീട്ടില്‍ നിന്ന് വജ്രാഭരണങ്ങള്‍, സ്വര്‍ണം എന്നിവ കവര്‍ന്നു. നഷ്ടപ്പെട്ട വസ്തുക്കള്‍ 1 കോടി രൂപയുടെ മൂല്യം വരുന്നതായാണു വിവരം.

രണ്ട് നിലകളുള്ള വീടിന്റെ മുകളിലത്തെ നിലയിലുള്ള 2 മുറികളില്‍ കയറിയാണ് മോഷ്ടാവ് ആഭരണങ്ങള്‍ കവര്‍ന്നത്.

25 ലക്ഷം രൂപ വില വരുന്ന ഡയമണ്ട് നെക്ലേസ്, 8 ലക്ഷം രൂപ വില മതിക്കുന്ന ഡയമണ്ടിന്റെ 10 കമ്മലുകള്‍, പത്തു മോതിരങ്ങള്‍, സ്വര്‍ണത്തിന്റെ 10 മാല, വള, 2 വങ്കികള്‍, വില കൂടിയ 10 വാച്ചുകള്‍ തുടങ്ങിയവയാണ് മോഷണം പോയത്. വീടിന്റെ പുറകുവശത്തുള്ള അടുക്കള ഭാഗത്തെ ജനല്‍ കുത്തിത്തുറന്നാണ് അകത്തേയ്ക്ക് മോഷ്ടാവ് പ്രവേശിച്ചത്.

വീട്ടില്‍ ജോഷിയും ഭാര്യയും മരുമകളും 3 കുട്ടികളുമുണ്ടായിരുന്നു.

രാത്രി 1.30 ഓടെയാണ് ജോഷി ഉറങ്ങാന്‍ കിടന്നത്. മോഷണ ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്. സംഭവത്തില്‍ പൊലീസ് അന്വേഷണം ആരംഭിച്ചു.