Trump on Greenland: ഗ്രീന്‍ലാന്‍ഡ് 'ഞങ്ങളുടെ പ്രദേശമെന്ന്' ട്രംപ്

ഗ്രീന്‍ലാന്‍ഡ് തങ്ങളുടെ സ്വന്തമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. സ്വിറ്റ്‌സര്‍ലാന്‍ഡിലെ ദാവോസില്‍ നടന്ന ലോക സാമ്പത്തിക ഫോറത്തിലാണ് യുഎസ്-യൂറോപ്പ് ബന്ധം വഷളാക്കുന്ന നിലപാട് ട്രംപ് ആവര്‍ത്തിച്ച് പ്രഖ്യാപിച്ചത്. ഈ ആര്‍ട്ടിക് ദ്വീപ് വടക്കേ അമേരിക്കയുടെ ഭാഗമാണെന്നും അമേരിക്കയ്ക്ക് പുറമെ മറ്റൊരു രാജ്യത്തിനും അത് സുരക്ഷിതമാക്കാന്‍ കഴിയില്ലെന്നും അദ്ദേഹം കൂട്ടിച്ചേര്‍ത്തു. ഗ്രീന്‍ലാന്‍ഡ് ഡെന്‍മാര്‍ക്കിന്റെ പരമാധികാരത്തിന്‍ കീഴിലുള്ള ദ്വീപാണ്. എന്നാല്‍ ട്രംപിന്റെ പ്രഖ്യാപനം ഈ ദ്വീപിനെ യു.എസ് നിയന്ത്രണത്തിലാക്കാനുള്ള ട്രംപിന്റെ അഭിലാഷത്തെ അടിവരയിടുന്നു.

വിവാദം ആളിക്കത്തിക്കുന്ന പ്രസ്താവനകൾ

ഗ്രീന്‍ലാന്‍ഡിന്റെ തന്ത്രപ്രധാനമായ സ്ഥാനം യു.എസ്. ദേശീയ സുരക്ഷയ്ക്ക് നിര്‍ണായകമാണെന്ന് ട്രംപ് തറപ്പിച്ചു പറയുന്നു. ഇത് നിലവിലുള്ള വിവാദത്തെ കൂടുതല്‍ കലുഷിതമാക്കുന്നു. ഗ്രീന്‍ലാന്‍ഡിനെ പരിപാലിക്കാന്‍ യുഎസിനെപ്പോലെ ആര്‍ക്കും കഴിയില്ലെന്നും ട്രംപ് പറയുന്നു. ദ്വീപിന്റെ മേല്‍നോട്ടത്തിന് ഡെന്‍മാര്‍ക്ക് അപര്യാപ്തമാണെന്നും അതേസമയം ഗ്രീന്‍ലാന്‍ഡ് സ്വന്തമാക്കാന്‍ ബലപ്രയോഗം നടത്തില്ലെന്നും ട്രംപ് കൂട്ടിച്ചേര്‍ത്തു.

ട്രംപിന്റെ സുരക്ഷാ വാദം

രണ്ടാം ലോകമഹായുദ്ധസമയത്ത് യുഎസ് ഡെന്‍മാര്‍ക്കിനുവേണ്ടി പോരാടുകയും യുദ്ധത്തില്‍ വിജയിച്ച ശേഷം ഗ്രീന്‍ലാന്‍ഡ് ഡെന്‍മാര്‍ക്കിന് നല്‍കുകയുമാണ് ഉണ്ടായത്. 'അങ്ങനെ ചെയ്യാന്‍ ഞങ്ങള്‍ എത്ര മണ്ടന്മാരായിരുന്നു? പക്ഷേ ഞങ്ങള്‍ അങ്ങനെ ചെയ്തു', ട്രംപ് പറഞ്ഞു. 'യുഎസ്, റഷ്യ, ചൈന എന്നിവയ്ക്കിടയിലുള്ള പ്രധാന തന്ത്രപ്രധാന സ്ഥലത്ത് പ്രതിരോധമില്ലാത്ത പ്രദേശം' എന്നാണ് ഗ്രീന്‍ലാന്‍ഡിനെ അദ്ദേഹം വിശേഷിപ്പിച്ചത്.

നാറ്റോ രാജ്യങ്ങള്‍ക്കിടയില്‍ സംഘര്‍ഷങ്ങള്‍

ഗ്രീന്‍ലാന്‍ഡിനെക്കുറിച്ചുള്ള ട്രംപിന്റെ പരാമര്‍ശങ്ങള്‍ നാറ്റോ സഖ്യകക്ഷികളില്‍, പ്രത്യേകിച്ച് ആ പ്രദേശം ഭരിക്കുന്ന ഡെന്‍മാര്‍ക്കില്‍, ആശങ്കയുണ്ടാക്കിയിട്ടുണ്ട്. ഗ്രീന്‍ലാന്‍ഡ് സംബന്ധിച്ച് പ്രഖ്യാപനം ഡെന്‍മാര്‍ക്കിനെ, പ്രകോപിപ്പിച്ചിച്ചുണ്ട്. കൂടാതെ ട്രംപിന്റെ പ്രഖ്യാപനങ്ങള്‍ സഖ്യങ്ങളെ തകര്‍ക്കുമെന്ന ആശങ്ക യൂറോപ്യന്‍ നേതാക്കളും പ്രകടിപ്പിക്കുന്നു. മേഖലയിലെ രാജ്യങ്ങളെല്ലാം നാറ്റോയില്‍ അംഗങ്ങളാണ്. വിവാദം സംഘടനക്ക് തിരിച്ചടി ആവുമോ എന്നും ആശങ്കയുണ്ട്.

ദാവോസ് പ്രസംഗം പ്രതിസന്ധി സൃഷ്ടിക്കും

യുഎസ്. സാമ്പത്തിക ശക്തി ഉയര്‍ത്തിക്കാട്ടാന്‍ ഉദ്ദേശിച്ചുള്ള ദാവോസ് പ്രസംഗം ട്രംപിന്റെ ഗ്രീന്‍ലാന്‍ഡ് പ്രസ്താവനകളിൽ മങ്ങി. ഗ്രീന്‍ലാന്‍ഡ് യുഎസ് പ്രദേശം ആണെന്ന ട്രംപിന്റെ വാദം യൂറോപ്യന്‍ ഉദ്യോഗസ്ഥരില്‍ നിന്ന് കടുത്ത വിമര്‍ശനം നേരിട്ടു. അതേസമയം ചില ട്രംപ് അനുകൂലികൾ അദ്ദേഹത്തിന്റെ നിലപാടിനെ ധീരവും പ്രായോഗികവുമാണെന്ന് പ്രശംസിച്ചു. ചുരുക്കത്തില്‍, ട്രംപിന്റെ തീക്ഷ്ണമായ ദാവോസ് പ്രഖ്യാപനം ഗ്രീന്‍ലാന്‍ഡിനെ നയതന്ത്ര യുദ്ധക്കളമാക്കി മാറ്റിയിട്ടുണ്ട്.