Login 
പഠിക്കാം & സമ്പാദിക്കാം 
Home
5 March 2026 3:14 PM IST
Summary
പല സര്വ്വകലാശാലകളും തങ്ങളുടെ വിദ്യാര്ത്ഥികള്ക്ക് കടുത്ത മുന്നറിയിപ്പുകള് നല്കിത്തുടങ്ങി. താമസസൗകര്യം മുന്കൂട്ടി ഉറപ്പാക്കാത്തവര് കോഴ്സുകളില് ചേരാന് വരരുത് എന്ന നിലപാടിലേക്ക് ചില സ്ഥാപനങ്ങള് എത്തിയത് സ്ഥിതിഗതികളുടെ ഗൗരവം വര്ദ്ധിപ്പിക്കുന്നു
യുകെയിലെ ഉന്നതവിദ്യാഭ്യാസ മേഖലയെ പിടിച്ചുലയ്ക്കുന്ന രീതിയില് വിദ്യാര്ത്ഥി ഭവന പ്രതിസന്ധി അതീവ ഗുരുതരമാകുന്നു. ലണ്ടനില് വിദ്യാര്ത്ഥി താമസസൗകര്യങ്ങളുടെ ശരാശരി വാര്ഷിക വാടക 13,600 പൗണ്ടായും (ഏകദേശം 14.5 ലക്ഷം രൂപ), മറ്റ് പ്രധാന നഗരങ്ങളില് 10,000 പൗണ്ടായും കുതിച്ചുയര്ന്നു. കഴിഞ്ഞ രണ്ട് വര്ഷത്തിനിടെ താമസച്ചെലവിലുണ്ടായ 15 ശതമാനം വര്ദ്ധനവ് വിദ്യാര്ത്ഥികളുടെ ബജറ്റുകളെ താളംതെറ്റിച്ചു. സര്ക്കാരില് നിന്നുള്ള സാമ്പത്തിക സഹായവും വര്ദ്ധിച്ചുവരുന്ന വാടകയും തമ്മിലുള്ള വലിയ വ്യത്യാസം കാരണം, പല വിദ്യാര്ത്ഥികള്ക്കും പഠനത്തോടൊപ്പം കൂടുതല് പാര്ട്ട് ടൈം ജോലികള് ചെയ്താല് പോലും വാടക നല്കാന് കഴിയാത്ത 'ഫണ്ടിംഗ് ഗ്യാപ്പ്' രൂപപ്പെട്ടിരിക്കുകയാണ്.
കര്ശനമായ വിസ നിയമങ്ങള് കാരണം അന്താരാഷ്ട്ര ബിരുദാനന്തര അപേക്ഷകളില് നേരിയ കുറവുണ്ടായെങ്കിലും, ലഭ്യമായ താമസസൗകര്യങ്ങളേക്കാള് എത്രയോ മടങ്ങ് കൂടുതലാണ് അപേക്ഷകരുടെ എണ്ണം. മാഞ്ചസ്റ്റര്, ബ്രിസ്റ്റല്, എഡിന്ബറോ തുടങ്ങിയ നഗരങ്ങളില് നിലവില് 97 ശതമാനത്തിലധികം മുറികളും നേരത്തെ തന്നെ ബുക്ക് ചെയ്യപ്പെട്ടു കഴിഞ്ഞു. സെപ്റ്റംബറിലെ അധ്യയന വര്ഷം തുടങ്ങുന്നതിന് മാസങ്ങള്ക്ക് മുമ്പ്, വസന്തകാലത്ത് തന്നെ മിക്ക പ്രോപ്പര്ട്ടികളും 'ഫുള് ബോര്ഡ്' ആകുന്നത് വിദ്യാര്ത്ഥികളെ വലിയ സമ്മര്ദ്ദത്തിലാക്കുന്നു. പുതിയ കെട്ടിടങ്ങളുടെ നിര്മ്മാണ സാമഗ്രികള്ക്കുണ്ടായ വിലക്കയറ്റവും ഉയര്ന്ന പലിശനിരക്കും ഭവന വിപണിയിലെ പുതിയ വികസനങ്ങളെ സ്തംഭിപ്പിച്ചതാണ് ഈ ക്ഷാമത്തിന് പ്രധാന കാരണം.
വിദ്യാര്ത്ഥികള്ക്ക് കുറഞ്ഞ നിരക്കില് ലഭ്യമായിരുന്ന പങ്കിട്ട വീടുകള് വിപണിയില് നിന്ന് അപ്രത്യക്ഷമാകുന്നതാണ് മറ്റൊരു വലിയ വെല്ലുവിളി. ഉയര്ന്ന മോര്ട്ട്ഗേജ് തിരിച്ചടവുകളും കര്ശനമായ സര്ക്കാര് നിയന്ത്രണങ്ങളും കാരണം സ്വകാര്യ ഉടമകള് തങ്ങളുടെ വീടുകള് വിറ്റഴിക്കുകയോ വാടകയ്ക്ക് നല്കുന്നത് നിര്ത്തുകയോ ചെയ്യുന്നു. ഇതോടെ വിദ്യാര്ത്ഥികള് 20 ശതമാനത്തിലധികം അധിക തുക നല്കി സ്വകാര്യ ഹോസ്റ്റലുകളെ ആശ്രയിക്കാന് നിര്ബന്ധിതരാകുന്നു. ഇത് വിപണിയെ രണ്ട് തട്ടിലാക്കി മാറ്റിയിരിക്കുകയാണ്; സമ്പന്നരായ അന്താരാഷ്ട്ര വിദ്യാര്ത്ഥികള് ആഡംബര സൗകര്യങ്ങളുള്ള സ്റ്റുഡിയോകള് സ്വന്തമാക്കുമ്പോള്, സാധാരണക്കാരായ വിദ്യാര്ത്ഥികള് നഗരപ്രാന്തങ്ങളില് കുറഞ്ഞ സൗകര്യങ്ങള്ക്കായി നെട്ടോട്ടമോടുന്നു.
ഈ ഭവന പ്രതിസന്ധി വിദ്യാര്ത്ഥികളുടെ മാനസികാരോഗ്യത്തെയും പഠന നിലവാരത്തെയും സാരമായി ബാധിക്കുന്ന ഒരു 'നിശബ്ദ അടിയന്തരാവസ്ഥ'യായി മാറിയിരിക്കുന്നു. പഠനത്തില് ശ്രദ്ധ കേന്ദ്രീകരിക്കുന്നതിന് പകരം വാടകയ്ക്കുള്ള പണം കണ്ടെത്താന് ദീര്ഘനേരം ജോലി ചെയ്യേണ്ടി വരുന്നത് തങ്ങളുടെ അക്കാദമിക് മികവിനെ ബാധിക്കുന്നതായി 50 ശതമാനത്തിലധികം വിദ്യാര്ത്ഥികളും സമ്മതിക്കുന്നു. പല സര്വ്വകലാശാലകളും തങ്ങളുടെ വിദ്യാര്ത്ഥികള്ക്ക് കടുത്ത മുന്നറിയിപ്പുകള് നല്കിത്തുടങ്ങി. താമസസൗകര്യം മുന്കൂട്ടി ഉറപ്പാക്കാത്തവര് കോഴ്സുകളില് ചേരാന് വരരുത് എന്ന നിലപാടിലേക്ക് ചില സ്ഥാപനങ്ങള് എത്തിയത് സ്ഥിതിഗതികളുടെ ഗൗരവം വര്ദ്ധിപ്പിക്കുന്നു.
ബ്രിട്ടീഷ് വിദ്യാഭ്യാസ മേഖലയുടെ അന്തസ്സിന് തന്നെ ഭീഷണിയാകുന്ന ഈ സാഹചര്യം പരിഹരിക്കാന് അടിയന്തര ഇടപെടല് ആവശ്യമാണ്. വിദ്യാര്ത്ഥികള്ക്ക് താങ്ങാനാവുന്ന നിരക്കിലുള്ള വീടുകളുടെ ലഭ്യത വര്ദ്ധിപ്പിക്കുകയോ സര്ക്കാര് ധനസഹായം കാലോചിതമായി പരിഷ്കരിക്കുകയോ ചെയ്തില്ലെങ്കില്, യുകെയുടെ വിദ്യാഭ്യാസ മാതൃക തന്നെ തകര്ന്നടിയാന് സാധ്യതയുണ്ടെന്ന് വിദഗ്ധര് മുന്നറിയിപ്പ് നല്കുന്നു. ഈ കടുത്ത വെല്ലുവിളികള്ക്കിടയില്, വിദേശപഠനം ആഗ്രഹിക്കുന്നവര് കേവലം അഡ്മിഷന് മാത്രമല്ല, താമസസൗകര്യം കൂടി മുന്കൂട്ടി പ്ലാന് ചെയ്യുക എന്നത് ഒരു അനിവാര്യതയായി മാറിയിരിക്കുകയാണ്.