Gulf Flight Ticket:ഗള്‍ഫിലേക്കുള്ള വിമാന ടിക്കറ്റ് നിരക്ക് മൂന്നിരട്ടിയാക്കി

ഗള്‍ഫിലേക്ക് പോകുന്ന യാത്രക്കാര്‍ക്ക് കനത്ത തിരിച്ചടിയുമായി വിമാനക്കമ്പനികള്‍. സാധാരണ നിരക്കിനെക്കാള്‍ മൂന്നിരട്ടി വരെ തുക നല്‍കിയാലേ നാട്ടില്‍നിന്നു ഗള്‍ഫ് നാടുകളില്‍ എത്താനാകൂ എന്ന സ്ഥിതിയാണ്. കോഴിക്കോട്ടുനിന്നു ദുബായിലെത്താന്‍ 45,000 രൂപയാണ് ടിക്കറ്റ് നിരക്ക്. എന്നാല്‍, 3 പേര്‍ക്കു ദുബായില്‍നിന്നു കോഴിക്കോട്ടെത്താന്‍ അത്രയും തുക മതി. ദുബായിലേക്ക് 8,000 രൂപ മുതല്‍ 14,000 രൂപ വരെയാണ് സാധാരണ നിരക്ക്.

അവധിക്കാലം നാട്ടില്‍ ചെലവഴിക്കാനായി കുടുംബത്തോടെ എത്തിയവരില്‍ ഏറെയും തിരിച്ചുപോകുന്ന സമയത്താണു വര്‍ധന. കോഴിക്കോട് -ഷാര്‍ജ ടിക്കറ്റ് നിരക്ക് 46,000 രൂപയും കോഴിക്കോട്- ദോഹ 35,000 രൂപയും കോഴിക്കോട്-ജിദ്ദ വിമാന നിരക്ക് 62,000 രൂപ വരെയെത്തി.

തദ്ദേശ തിരഞ്ഞെടുപ്പു കണക്കിലെടുത്തു കുടുംബത്തോടെ നാട്ടിലെത്തിയ പ്രവാസികളുമുണ്ട്. അവര്‍ ക്രിസ്മസ് അവധി കൂടിക്കഴിഞ്ഞ് ഗള്‍ഫിലേക്ക് മടങ്ങാന്‍ തയ്യാറെടുക്കുമ്പോഴാണ് നിരക്ക് വര്‍ധന കനത്ത ആഘാതമായത്.