യുഎഇയില്‍ പ്രവേശിക്കുന്നതിന് ഇറാന്‍ പൗരന്മാര്‍ക്ക് വിലക്ക്

പശ്ചിമേഷ്യയില്‍ സംഘര്‍ഷം തുടരുന്ന സാഹചര്യത്തില്‍ ഇറാന്‍ പൗരന്മാര്‍ക്ക് യുഎഇയിലേക്ക് പ്രവേശിക്കുന്നതിനും രാജ്യം വഴി ട്രാന്‍സിറ്റ് ചെയ്യുന്നതിനും വിലക്ക് ഏര്‍പ്പെടുത്തി. യുഎഇയിലെ പ്രമുഖ വിമാനക്കമ്പനികളായ എമിറേറ്റ്സ്, ഇത്തിഹാദ്, ഫ്‌ലൈ ദുബായ് എന്നിവ തങ്ങളുടെ ഔദ്യോഗിക വെബ്സൈറ്റുകള്‍ വഴിയാണ് ഈ വിവരം പുറത്തുവിട്ടത്.

ഇറാന്‍ പൗരന്മാര്‍ക്ക് യുഎഇയിലേക്ക് വരുന്നതിനും മറ്റ് രാജ്യങ്ങളിലേക്ക് പോകാനായി യുഎഇ വിമാനത്താവളങ്ങള്‍ ഉപയോഗിക്കുന്നതിനും അനുമതിയില്ല. യുഎഇയുടെ 10 വര്‍ഷത്തെ താമസാനുമതിയായ 'ഗോള്‍ഡന്‍ വിസ' കൈവശമുള്ള ഇറാന്‍ പൗരന്മാര്‍ക്ക് ഈ വിലക്കില്‍ ഇളവുണ്ടെന്ന് ഫ്‌ലൈ ദുബൈ വെബ്‌സൈറ്റില്‍ അറിയിച്ചിട്ടുണ്ട്. അവര്‍ക്ക് തുടര്‍ന്നും വിലക്ക് ബാധകമാകാത്തതിനാല്‍ രാജ്യത്തേക്ക് പ്രവേശിക്കാവുന്നതാണെന്ന് എയര്‍ലൈന്‍ അറിയിച്ചു. സര്‍ക്കാര്‍ തലത്തില്‍ ഇതുവരെ ഔദ്യോഗിക വിശദീകരണം പുറത്തുവിട്ടിട്ടില്ല.