ഊര്‍ജ്ജ പ്രതിസന്ധിയിലേക്ക് ഒരു ചുവട് കൂടി; ചെങ്കടല്‍ പാതയും അടയ്ക്കുന്നു

ബാബ് എല്‍-മന്ദേബ് കടലിടുക്കിന് സമീപം ആക്രമണം നടത്താന്‍ ഹൂതികള്‍ സജ്ജമായി നില്‍ക്കുന്നതായും, ഇറാന്റെ നിര്‍ദ്ദേശങ്ങള്‍ക്കായി കാത്തിരിക്കുന്നതായും റിപ്പോര്‍ട്ട്. യെമനിലെ ഉയര്‍ന്ന പ്രദേശങ്ങളില്‍ മിസൈലുകളും ഡ്രോണുകളും വിന്യസിച്ചുകൊണ്ട് തന്ത്രപരമായ തയ്യാറെടുപ്പുകള്‍ അവര്‍ പൂര്‍ത്തിയാക്കിയിട്ടുണ്ട്. ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്സിന്റെ പ്രതിനിധികളാണ് കടലിടുക്ക് എപ്പോള്‍ അടയ്ക്കണമെന്ന് തീരുമാനിക്കുന്നത്. അമേരിക്കന്‍ ആക്രമണങ്ങളുണ്ടായാല്‍ ചെങ്കടലിലെ എണ്ണപ്പാതകള്‍ കൂടി തടസ്സപ്പെടുത്താന്‍ ഇറാന്‍ ഹൂതികള്‍ക്ക് നിര്‍ദ്ദേശം നല്‍കിയിട്ടുണ്ട്.

ഹോര്‍മുസ് കടലിടുക്ക് ഇതിനകം അടച്ചിട്ടിരിക്കുന്നതിനാല്‍, ചെങ്കടലിലുണ്ടാകുന്ന ഗതാഗത തടസ്സം ആഗോള ഊര്‍ജ്ജ പ്രതിസന്ധിയെ അതിരൂക്ഷമാക്കും. ലോകത്തിലെ എണ്ണ വിതരണത്തിന്റെ വലിയൊരു ഭാഗം സൗദി അറേബ്യയുടെ യാന്‍ബു തുറമുഖം വഴി ചെങ്കടലിലൂടെയാണ് പോകുന്നത്. ഹൂതികളുടെ ഇത്തരം ഭീഷണികള്‍ ആഗോള സമ്പദ്വ്യവസ്ഥയെ സമ്മര്‍ദ്ദത്തിലാക്കി അമേരിക്കയെ പ്രതിരോധത്തിലാക്കാനുള്ള ഇറാന്റെ തന്ത്രപരമായ നീക്കത്തിന്റെ ഭാഗമായാണ് വിലയിരുത്തപ്പെടുന്നത്.

ചെങ്കടലിലെ സുരക്ഷാ സാഹചര്യം അതീവ അനിശ്ചിതത്വത്തിലാണ്. മാഴ്‌സ്‌ക് , ഹപാഗ്-ലോയ്ഡ് തുടങ്ങിയ വമ്പന്‍ ഷിപ്പിംഗ് കമ്പനികള്‍ ചെങ്കടല്‍ വഴിയുള്ള സര്‍വീസുകള്‍ ഭാഗികമായി പുനരാരംഭിക്കാന്‍ ശ്രമിക്കുന്നുണ്ടെങ്കിലും, മേഖലയിലെ ഭീഷണികള്‍ നിലനില്‍ക്കുന്നത് വലിയ ആശങ്കയുണ്ടാക്കുന്നു. സുരക്ഷാ ഭീഷണികള്‍ തുടരുന്നതിനാല്‍ ഭൂരിഭാഗം കപ്പലുകളും ആഫ്രിക്കന്‍ തീരത്തുകൂടി വഴിതിരിച്ചുവിടുന്നത് തുടരുകയാണ്, ഇത് ചരക്ക് നീക്കത്തിന്റെ സമയവും ചെലവും വലിയ തോതില്‍ വര്‍ദ്ധിപ്പിക്കുന്നു.

ഇറാന്‍-അമേരിക്ക സംഘര്‍ഷം രൂക്ഷമാകുന്നതിനാല്‍ ഈ രണ്ട് ജലപാതകളും അതീവ സമ്മര്‍ദ്ദത്തിലാണ്. ചെങ്കടലിലെ കപ്പലുകള്‍ക്ക് നേരെ നേരിട്ടുള്ള ആക്രമണങ്ങള്‍ കുറവാണെങ്കിലും, ഹൂതികളുടെ ഭീഷണി നിലനില്‍ക്കുന്നത് ആഗോള വാണിജ്യ വ്യവസായങ്ങള്‍ക്ക് വലിയ വെല്ലുവിളിയാണ്. മേഖലയിലെ ഈ സംഘര്‍ഷങ്ങള്‍ എപ്പോള്‍ അവസാനിക്കുമെന്ന കാര്യത്തില്‍ വ്യക്തതയില്ലാത്തത് ആഗോള വിതരണ ശൃംഖലയെ കൂടുതല്‍ ദുര്‍ബലപ്പെടുത്തുന്നു.