ട്രംപ് പിടിമുറക്കി; അനധികൃത ഇന്ത്യന്‍ കുടിയേറ്റത്തില്‍ ഇടിവ്

യുഎസിലേക്കുള്ള അനധികൃത ഇന്ത്യന്‍ കുടിയേറ്റക്കാരുടെ എണ്ണത്തില്‍ എഴുപത് ശതമാനം കുറവ്. ട്രംപ് അധികാരത്തിലെത്തിയതോടെ നിയന്ത്രണം കര്‍ശനമാക്കിയതാണ് കുടിയേറ്റം കുറയാന്‍ കാരണം.

2025 ജനുവരി മുതല്‍ മെയ് വരെയുള്ള കാലയളവില്‍ അമേരിക്കയിലേക്ക് അനധികൃതമായി കടന്നതിന് പിടിക്കപ്പെട്ട ഇന്ത്യക്കാരുടെ എണ്ണം കഴിഞ്ഞ വര്‍ഷത്തെ ഇതേ കാലയളവിനെ അപേക്ഷിച്ച് 70% കുറഞ്ഞു.

ഡൊണാള്‍ഡ് ട്രംപ് വൈറ്റ് ഹൗസിലേക്ക് മടങ്ങിയെത്തിയതിനും കുടിയേറ്റ നിയന്ത്രണങ്ങളില്‍ വീണ്ടും ശ്രദ്ധ കേന്ദ്രീകരിച്ചതിനും ശേഷമാണ് ഈ കുത്തനെയുള്ള കുറവ്. ഈ കുറവുണ്ടായിട്ടും, പ്രായപൂര്‍ത്തിയാകാത്തവര്‍ ഉള്‍പ്പെടെ 10,382 ഇന്ത്യക്കാരെ ഈ വര്‍ഷത്തെ ആദ്യ അഞ്ച് മാസങ്ങളില്‍ യുഎസ് അതിര്‍ത്തിയില്‍ പിടികൂടിയിട്ടുണ്ട്.

കഴിഞ്ഞ വര്‍ഷം ഇതേ കാലയളവില്‍, ബൈഡന്‍ ഭരണകൂടത്തിന് കീഴില്‍, യുഎസ് കസ്റ്റംസ് ആന്‍ഡ് ബോര്‍ഡര്‍ പ്രൊട്ടക്ഷന്‍ 34,535 ഇന്ത്യക്കാരെ പിടികൂടിയിരുന്നു. 2025 ല്‍ ശരാശരി പ്രതിദിനം 69 ഇന്ത്യക്കാരായി കുറഞ്ഞു.

ഇന്ത്യന്‍ കുടിയേറ്റക്കാരെ സഹായിക്കുന്ന കള്ളക്കടത്ത് ശൃംഖലകളിലെ തടസ്സമാണ് ഈ കുറവിന് കാരണമെന്ന് ഉദ്യോഗസ്ഥര്‍ പറയുന്നു. ട്രംപ് അധികാരത്തില്‍ തിരിച്ചെത്താന്‍ സാധ്യതയുണ്ടെന്ന് തോന്നിയതോടെ 2024 അവസാനത്തോടെ ഈ സംഘങ്ങള്‍ അവരുടെ പ്രവര്‍ത്തനങ്ങള്‍ കുറച്ചതായി റിപ്പോര്‍ട്ടുണ്ട്.