EMI ഭാരം കൂടില്ല; വായ്പയെടുത്തവര്‍ക്ക് ആശ്വാസമോ?

ബാങ്ക് വായ്പയെടുത്തവര്‍ക്കും പുതിയതായി വായ്പ എടുക്കാന്‍ ആഗ്രഹിക്കുന്നവര്‍ക്കും ആശ്വാസകരമായ നിരീക്ഷണവുമായി ഐസിഐസിഐ ബാങ്ക് ഗ്ലോബല്‍ മാര്‍ക്കറ്റ് റിപ്പോര്‍ട്ട്. രാജ്യത്ത് പലിശ നിരക്കുകള്‍ ഉടന്‍ വര്‍ദ്ധിപ്പിക്കാന്‍ സാധ്യതയില്ലെന്നും ദീര്‍ഘകാലത്തേക്ക് നിലവിലെ നിരക്ക് തുടരുമെന്നുമാണ് റിപ്പോര്‍ട്ട് സൂചിപ്പിക്കുന്നത്.

EMI കുതിക്കില്ല; ലോ ഫോര്‍ ലോംഗര്‍ കാലയളവ്

അപ്രതീക്ഷിതമായി പലിശ നിരക്കുകള്‍ വര്‍ദ്ധിക്കാനുള്ള സാധ്യത നിലവിലെ സാമ്പത്തിക സാഹചര്യത്തില്‍ വളരെ കുറവാണെന്ന് റിപ്പോര്‍ട്ട് വ്യക്തമാക്കുന്നു. പലിശ നിരക്കുകള്‍ ദീര്‍ഘകാലത്തേക്ക് കുറഞ്ഞ നിലയില്‍ തന്നെ തുടരുന്ന ലോ ഫോര്‍ ലോംഗര്‍ എന്ന അവസ്ഥയിലേക്കാണ് വിപണി നീങ്ങുന്നത്. ഇത് ഭവന-വാഹന വായ്പ എടുത്തവരുടെ പ്രതിമാസ തിരിച്ചടവ് പെട്ടെന്ന് വര്‍ദ്ധിക്കില്ല എന്ന ഉറപ്പാണ് നല്‍കുന്നത്.

പലിശ കുറയാന്‍ വൈകുന്നത് എന്തുകൊണ്ട്?

പലിശ നിരക്ക് വര്‍ദ്ധിക്കില്ല എന്നത് ആശ്വാസമാണെങ്കിലും, നിരക്കുകള്‍ ഉടന്‍ കുറയാനും സാധ്യതയില്ല. ഇതിന് കാരണമായി റിപ്പോര്‍ട്ട് ചൂണ്ടിക്കാണിക്കുന്നത് ഇവയാണ്:

ക്രൂഡ് ഓയില്‍ വില: ആഗോള വിപണിയില്‍ ക്രൂഡ് ഓയില്‍ വിലയിലുണ്ടാകുന്ന വര്‍ദ്ധനവ് പലിശ കുറയ്ക്കുന്നതിന് തടസ്സമാകുന്നു.

പണലഭ്യത: പലിശ കുറയ്ക്കുന്നതിനേക്കാള്‍ വിപണിയില്‍ ആവശ്യത്തിന് പണം ലഭ്യമാണെന്ന് ഉറപ്പാക്കാനായിരിക്കും റിസര്‍വ് ബാങ്ക് മുന്‍ഗണന നല്‍കുക.

ആര്‍ബിഐ നിലപാട് അനുകൂലം

ഫെബ്രുവരി 6-ന് നടന്ന മോണിറ്ററി പോളിസി കമ്മിറ്റി യോഗത്തില്‍ പലിശ നിരക്ക് 5.25 ശതമാനത്തില്‍ തന്നെ നിലനിര്‍ത്താന്‍ ഏകകണ്ഠമായാണ് തീരുമാനിച്ചത്. രാജ്യത്തെ പണപ്പെരുപ്പം, പ്രത്യേകിച്ച് 'കോര്‍ ഇന്‍ഫ്‌ലേഷന്‍' നിയന്ത്രണവിധേയമാണെന്നത് ആര്‍ബിഐക്ക് ആത്മവിശ്വാസം നല്‍കുന്നുണ്ട്.ആര്‍ബിഐ പലിശ നിരക്ക് കൂട്ടിയില്ലെങ്കിലും, വിപണിയില്‍ പണലഭ്യത കുറയുന്ന സാഹചര്യമുണ്ടായാല്‍ നിക്ഷേപ സമാഹരണത്തിനായി ചില ബാങ്കുകള്‍ ഡെപ്പോസിറ്റ് റേറ്റുകളില്‍ നേരിയ മാറ്റം വരുത്തിയേക്കാം. ഇത് ബോണ്ട് മാര്‍ക്കറ്റിലും സ്വാധീനം ചെലുത്തും. എങ്കിലും വായ്പ എടുത്തവര്‍ക്ക് ആശങ്കപ്പെടേണ്ട സാഹചര്യമില്ലെന്നും വലിയ ആഘാതങ്ങള്‍ ഉണ്ടാകില്ലെന്നും ഐസിഐസിഐ ബാങ്ക് റിപ്പോര്‍ട്ട് അടിവരയിടുന്നു.