ശമ്പള വരുമാനക്കാരാണോ? ഈ മാറ്റങ്ങൾ അറിയാതിരിക്കരുത്

ശമ്പളവരുമാനക്കാരാണോ? 2026 ഏപ്രിൽ 1 മുതൽ ആദായ നികുതി റിട്ടേണിൽ മാറ്റം. പുതിയ നിയമം പ്രകാരം ഫോം 16, ഫോം 130 ആയി പുനർനാമകരണം ചെയ്യപ്പെടും. നികുതി ബാധ്യത എങ്ങനെ കണക്കാക്കുന്നു എന്നതിൽ മാറ്റം വരുത്തുന്നതിനുപകരം, ഫോമിന്റെ പേര് മാറ്റിയിട്ടുണ്ട്. വിവരങ്ങൾ അപ്‌ഡേറ്റ് ചെയ്യുന്നതും പ്രധാനമാണ്.

2026-27 ടാക്സ് ഇയർ മുതലാണ് പുതിയ മാറ്റം പ്രാബല്യത്തിൽ വരുന്നത്. പുതിയ നിയമങ്ങളും ഫോമുകളും പ്രാബല്യത്തിൽ വരാൻ സമയമെടുക്കുമെന്നതിനാൽ തൊഴിലുടമകൾ ജീവനക്കാർക്ക് ഫോം 130 നൽകുന്നതിലേക്ക് ഉടനടി മാറരുത്. പുതിയ നിയമത്തിനും ഫോമിനും അനുസൃതമായി പേറോൾ സോഫ്റ്റ്‌വെയർ, ടിഡിഎസ് റിട്ടേൺ സോഫ്റ്റ്‌വെയർ, മറ്റ് നിരവധി എച്ച്ആർ, പ്രോസസ്സിംഗ് അനുബന്ധ പ്രവർത്തനങ്ങൾ എന്നിവ അപ്‌ഡേറ്റ് ചെയ്യേണ്ടതുണ്ട്. ഇതിന് അനുസരിച്ച് ഫോം കൈമാറാം.

1961 ലെ ആദായനികുതി നിയമപ്രകാരം നൽകിയിരുന്ന ഫോം 16 ന് പകരമായാണ് 2025 ലെ ആദായനികുതി നിയമപ്രകാരം (സെക്ഷൻ 392/395) ഫോം 130 അവതരിപ്പിച്ചിരിക്കുന്നത്. ഇനി അസസ്മൻ്റ് ഇയറിന് പകരം ടാക്സ് ഇയർ ആകും ഉണ്ടാകുക.

കാലഹരണപ്പെട്ട നികുതി വ്യവസ്ഥകൾ നീക്കം ചെയ്തും, സങ്കീർണ്ണമായ നിയമങ്ങൾ എളുപ്പമാക്കിയുമാണ് പുതിയ ആദായ നികുതി നിയമം കാര്യക്ഷമമാക്കിയിരിക്കുന്നത്. ഫിനാൻഷ്യൽ ഇയറും അസസ്മൻ്റ് ഇയറും ഏകീകരിച്ച് ടാക്സ് ഇയർ ആക്കിയിരിക്കുന്നത് ആദ്യമായി നികുതി അടക്കുന്നവർക്ക് ഏറെ സഹായകരമാകും.

എച്ച്ആർഎ ഇളവുകൾ ഇങ്ങനെ

ശമ്പളക്കാരായ വ്യക്തികൾക്ക് നികുതി ലാഭിക്കാൻ സഹായിക്കുന്ന ഏറ്റവും പ്രധാനപ്പെട്ട ഘടകമാണ് വീട് വാടക അലവൻസ്. ഏപ്രിൽ 1 മുതൽ ഇതിന് കർശനമായ രേഖകൾ വേണം.വാർഷിക വാടക ഒരു ലക്ഷം രൂപയിൽ കൂടുതലാണെങ്കിൽ ഭൂവുടമയുടെ ഡിക്ലറേഷൻ, ഉൾപ്പെടെ വേണ്ടി വരും. ക്ലെയിം ചെയ്ത എച്ച്ആർഎയും ഭൂവുടമയുടെ ഡിക്ലറേഷനും തമ്മിലുള്ള പൊരുത്തക്കേടുകൾ കണ്ടെത്തുന്നതിന് ആദായനികുതി വകുപ്പിന്റെ ഡാറ്റ അനലിറ്റിക്‌സിന്റെ ഉപയോഗം വർദ്ധിച്ചുവരികയാണ്. വ്യാജ വാടക രസീതുകൾ നൽകാനാകില്ല.ഇവ കൂടുതൽ സൂക്ഷ്മ പരിശോധനയ്ക്ക് വിധേയമാക്കും. മുമ്പ് മുംബൈ, കൊൽക്കത്ത, ഡൽഹി, ചെന്നൈ എന്നിവിടങ്ങളിൽ ബാധകമായിരുന്ന ഉയർന്ന 50 ശതമാനം എച്ച്ആർഎ ഇളവ് വിഭാഗം ഇപ്പോൾ ബെംഗളൂരു, ഹൈദരാബാദ്, പൂനെ, അഹമ്മദാബാദ് എന്നിവിടങ്ങളിലേക്കും വ്യാപിപ്പിച്ചിരിക്കുന്നു. മറ്റെല്ലാ നഗരങ്ങളും 40 ശതമാനം ബ്രാക്കറ്റിൽ തുടരും.