മ്യൂച്വല്‍ ഫണ്ട് നിക്ഷേപത്തിന് സുരക്ഷ വേണോ? സെബി പറയുന്നത് ഇതാണ്

മ്യൂച്വല്‍ ഫണ്ട് നിക്ഷേപങ്ങളുടെ സുരക്ഷ വര്‍ദ്ധിപ്പിക്കുന്നതിനായി വിപ്ലവകരമായ മാറ്റവുമായി ക്യാപിറ്റല്‍ മാര്‍ക്കറ്റ് റെഗുലേറ്ററായ സെബി. നിക്ഷേപകര്‍ക്ക് തങ്ങളുടെ മ്യൂച്വല്‍ ഫണ്ട് ഫോളിയോകള്‍ താല്‍ക്കാലികമായി ബ്ലോക്ക് ചെയ്യാന്‍ സാധിക്കുന്ന ഡെബിറ്റ് ഫ്രീസ്അഥവാ വോളന്ററി ലോക്ക്-ഇന്‍ സൗകര്യമാണ് സെബി അവതരിപ്പിച്ചത്.

പ്രധാന വിവരങ്ങള്‍

സുരക്ഷ

ഡിജിറ്റല്‍ പ്ലാറ്റ്ഫോമുകള്‍ വഴി മ്യൂച്വല്‍ ഫണ്ട് ഇടപാടുകള്‍ വര്‍ദ്ധിച്ച സാഹചര്യത്തില്‍, അനധികൃതമായ പിന്‍വലിക്കലുകളും സൈബര്‍ തട്ടിപ്പുകളും തടയുകയാണ് ഇതിന്റെ ലക്ഷ്യം.

പ്രവര്‍ത്തനം

ഈ ഫീച്ചര്‍ ആക്ടിവേറ്റ് ചെയ്താല്‍ നിക്ഷേപകന് തന്റെ ഫണ്ടുകള്‍ പിന്‍വലിക്കാനോ, മറ്റൊരു സ്‌കീമിലേക്ക് മാറ്റാനോ സാധിക്കില്ല. ലോക്ക് മാറ്റിയാല്‍ മാത്രമേ ഇടപാടുകള്‍ തുടരാനാകൂ.

ലഭ്യത

ഡിമാറ്റ് അക്കൗണ്ടിലുള്ളവര്‍ക്കും അല്ലാത്തവര്‍ക്കും ഈ സൗകര്യം ലഭ്യമാണ്. തുടക്കത്തില്‍ 'MF Central' പ്ലാറ്റ്ഫോം വഴിയായിരിക്കും ഇത് നടപ്പിലാക്കുക.

നിബന്ധനകള്‍

ഫോളിയോ കെവൈസി കംപ്ലയിന്റ് ആയിരിക്കണം. ആധികാരികത ഉറപ്പാക്കാന്‍ വാലിഡ് ആയ ഇമെയില്‍ ഐഡിയും മൊബൈല്‍ നമ്പറും നിര്‍ബന്ധമാണ്.

തീയതി: പുതിയ നിയമം 2025 ഏപ്രില്‍ 30 മുതല്‍ നിലവില്‍ വരും.

സുരക്ഷ നല്‍കുന്നത് എങ്ങനെ?

1. അനധികൃത പിന്‍വലിക്കലുകള്‍ തടയുന്നു

നിങ്ങളുടെ ലോഗിന്‍ വിവരങ്ങളോ പാസ്വേഡോ ആരെങ്കിലും കൈക്കലാക്കിയാല്‍ പോലും, ഡെബിറ്റ് ഫ്രീസ് ഓണ്‍ ആണെങ്കില്‍ അവര്‍ക്ക് നിങ്ങളുടെ നിക്ഷേപം പിന്‍വലിക്കാന്‍ സാധിക്കില്ല. നിങ്ങള്‍ ലോക്ക് മാറ്റുന്നത് വരെ ഫണ്ടുകള്‍ സുരക്ഷിതമായിരിക്കും.

2. സ്വിച്ചിംഗ് തടയുന്നു

തട്ടിപ്പുകാര്‍ പലപ്പോഴും ചെയ്യുന്നത് നിങ്ങളുടെ ലാഭകരമായ ഒരു ഫണ്ടിലെ പണം മറ്റൊരു സ്‌കീമിലേക്ക് മാറ്റുകയും അവിടെ നിന്ന് തന്ത്രപരമായി പിന്‍വലിക്കുകയും ചെയ്യുക എന്നതാണ്. ലോക്കിംഗ് സൗകര്യം നിലവിലുണ്ടെങ്കില്‍ ഇത്തരം സ്വിച്ച് ഇടപാടുകളും നടക്കില്ല.

3. വ്യക്തിഗത നിയന്ത്രണം

നിക്ഷേപം ദീര്‍ഘകാലത്തേക്ക് മാറ്റിവെച്ചിരിക്കുന്നവര്‍ക്കും (ഉദാഹരണത്തിന് കുട്ടികളുടെ പഠനം അല്ലെങ്കില്‍ വിവാഹം) ഇടയ്ക്കിടെ പോര്‍ട്ട്ഫോളിയോ പരിശോധിക്കാത്തവര്‍ക്കും ഈ സൗകര്യം ഏറെ ഗുണകരമാണ്. ആവശ്യമുള്ളപ്പോള്‍ മാത്രം ലോക്ക് മാറ്റുകയും അല്ലാത്തപ്പോള്‍ ലോക്ക് ചെയ്തു വെക്കുകയും ചെയ്യാം. ഇത് നിക്ഷേപകന് തന്റെ പണത്തിന്മേല്‍ പൂര്‍ണ്ണ നിയന്ത്രണം നല്‍കുന്നു.

4. സൈബര്‍ തട്ടിപ്പുകള്‍ക്കെതിരെ പ്രതിരോധം

ഫിഷിംഗ് ലിങ്കുകള്‍ വഴിയോ മറ്റോ നിങ്ങളുടെ അക്കൗണ്ട് ഹാക്ക് ചെയ്യപ്പെട്ടാല്‍, തട്ടിപ്പുകാര്‍ക്ക് നിങ്ങളുടെ ഫോളിയോയില്‍ മാറ്റങ്ങള്‍ വരുത്താന്‍ സാധിക്കില്ല. ലോക്ക് മാറ്റണമെങ്കില്‍ നിങ്ങളുടെ രജിസ്റ്റര്‍ ചെയ്ത മൊബൈല്‍ നമ്പറിലേക്കോ ഇമെയിലിലേക്കോ വരുന്ന ഒടിപി വഴി ആധികാരികത ഉറപ്പാക്കേണ്ടതുണ്ട്.

നിക്ഷേപകര്‍ക്ക് സ്വയം നിയന്ത്രിക്കാവുന്ന ഈ സുരക്ഷാ സംവിധാനം ഇന്ത്യയിലെ 80 ലക്ഷം കോടിയിലധികം വരുന്ന മ്യൂച്വല്‍ ഫണ്ട് മേഖലയ്ക്ക് വലിയ കരുത്താകും.