പാഷനുവേണ്ടി ജോലി വിടുകയാണോ? ആദ്യം ഇതറിയൂ! സാമ്പത്തിക സുരക്ഷ മസ്റ്റാണ്

പാഷനെ പിന്തുടര്‍ന്ന് ഇഷ്ടജോലി ചെയ്യണോ? അതോ സാമ്പത്തിക സുരക്ഷയ്ക്ക് പ്രാധാന്യം നല്‍കി കിട്ടിയ ജോലി കഷ്ടപ്പെട്ട് ചെയ്യണോ? കരിയര്‍ തിരഞ്ഞെടുപ്പില്‍ പലരെയും ആശയക്കുഴപ്പത്തിലാക്കുന്ന ചോദ്യമാണിത്. ഇഷ്ടമുള്ള മേഖലയിലേക്ക് മാറുന്നതിനായി നിലവിലെ സ്ഥിരവരുമാനമുള്ള ജോലി ഉപേക്ഷിക്കുന്നവര്‍ക്ക് മുന്നറിയിപ്പുമായി സാമ്പത്തിക വിദഗ്ധര്‍.

വ്യക്തമായ സാമ്പത്തിക അടിത്തറയില്ലാതെ പാഷന്‍ പ്രോജക്ടുകളിലേക്ക് എടുത്തുചാടുന്നത് വലിയ സാമ്പത്തിക അപകടം വിളിച്ചുവരുത്തുകയാണെന്നാണ് വിദഗ്ധരുടെ വിലയിരുത്തല്‍. അതിനാല്‍ ജോലി ഉപേക്ഷിക്കുന്നതിന് മുമ്പ് കുറഞ്ഞത് മൂന്ന് വര്‍ഷത്തേക്കുള്ള സാമ്പത്തിക സുരക്ഷ ഉറപ്പാക്കണമെന്നാണ് നിര്‍ദേശം.

ഇന്ത്യയിലെ തൊഴില്‍ സാഹചര്യങ്ങള്‍ കണക്കിലെടുക്കുമ്പോള്‍ ഈ മുന്നറിയിപ്പിന് കൂടുതല്‍ പ്രാധാന്യമുണ്ട്. ഇന്റര്‍നാഷണല്‍ ലേബര്‍ ഓര്‍ഗനൈസേഷന്റെ കണക്കനുസരിച്ച് 2024ല്‍ രാജ്യത്തെ തൊഴില്‍ശക്തിയുടെ ഏകദേശം 88 ശതമാനവും സ്ഥിരമായ തൊഴില്‍ കരാറോ ഔദ്യോഗിക ആനുകൂല്യങ്ങളോ ഇല്ലാതെ ജോലി ചെയ്യുന്നവരാണ്. അതായത് വലിയൊരു വിഭാഗത്തിന് തൊഴില്‍ദാതാവ് നല്‍കുന്ന ആരോഗ്യ ഇന്‍ഷുറന്‍സ്, പിരിച്ചുവിടല്‍ ആനുകൂല്യങ്ങള്‍ തുടങ്ങിയ സുരക്ഷാ സംവിധാനങ്ങള്‍ ലഭ്യമല്ല.

അതേസമയം, 2022-23 സാമ്പത്തിക വര്‍ഷത്തിലെ നാഷണല്‍ ഹെല്‍ത്ത് അക്കൗണ്ട്‌സ് കണക്കുകള്‍ പ്രകാരം രാജ്യത്തെ മൊത്തം ആരോഗ്യച്ചെലവിന്റെ 43.4 ശതമാനവും വ്യക്തികള്‍ നേരിട്ട് വഹിക്കുന്നതാണ്. അപ്രതീക്ഷിതമായ ഒരു ചികിത്സാചെലവ് പോലും വര്‍ഷങ്ങളായുള്ള സമ്പാദ്യം ഇല്ലാതാക്കാം. പ്രായമായ മാതാപിതാക്കളെ സംരക്ഷിക്കുന്നതിനൊപ്പം സ്വന്തം കുടുംബത്തിന്റെ ഭാവിക്കായി പണം കണ്ടെത്തേണ്ട യുവതയ്ക്ക് ഈ സാമ്പത്തിക ബാധ്യത കൂടുതല്‍ വെല്ലുവിളിയാണ്.

സ്റ്റാര്‍ട്ടപ്പ് മേഖലയിലും സമാനമായ അപകടസാധ്യതകളുണ്ട്. ഇന്ത്യ ലോകത്തെ മൂന്നാമത്തെ വലിയ സ്റ്റാര്‍ട്ടപ്പ് ഇക്കോസിസ്റ്റമാണെങ്കിലും പുതിയ സംരംഭങ്ങള്‍ വിജയിക്കുമെന്ന് ഉറപ്പില്ല. ഐബിഎമ്മിന്റെ 2017ലെ പഠനമനുസരിച്ച് ഇന്ത്യന്‍ സ്റ്റാര്‍ട്ടപ്പുകളില്‍ 90 ശതമാനവും അഞ്ച് വര്‍ഷത്തിനുള്ളില്‍ പരാജയപ്പെടുന്നു. അതിനാല്‍ ഒരു ആശയത്തോടുള്ള താല്‍പര്യം മാത്രം സംരംഭം വിജയിപ്പിക്കാന്‍ മതിയാകില്ല. ആവശ്യമായ മൂലധനമില്ലാതെ സംരംഭം ആരംഭിക്കുന്നവര്‍ക്കും കാലാനുസൃതമായി നവീകരണം നടത്താത്തവര്‍ക്കും സാമ്പത്തിക പ്രതിസന്ധി നേരിടേണ്ടിവരും. അതുകൊണ്ട് ആവശ്യമായ മൂലധനവും സാമ്പത്തിക പിന്തുണയും അനിവാര്യമാണ്.

ജോലി ഉപേക്ഷിക്കും മുന്‍പ് 36 മാസത്തെ സുരക്ഷ

സാമ്പത്തിക വിദഗ്ധനായ റുഷഭ് ദേശായിയുടെ നിര്‍ദേശം അനുസരിച്ച്, ജോലി ഉപേക്ഷിച്ച് ഇഷ്ടമുള്ള മേഖലയിലേക്ക് മാറുന്നതിന് മുമ്പ് ഒരാളുടെ ഏറ്റവും കുറഞ്ഞ പ്രതിമാസ ചെലവ് കണക്കാക്കണം. ഈ തുക 36 കൊണ്ട് ഗുണിച്ചാല്‍ ലഭിക്കുന്ന തുക സാമ്പത്തിക സുരക്ഷാ ഫണ്ടായി മാറ്റിവയ്ക്കണം. ഉദാഹരണത്തിന്, ഒരാളുടെ അടിസ്ഥാന പ്രതിമാസ ചെലവ് 30,000 രൂപയാണെങ്കില്‍ കുറഞ്ഞത് 10.8 ലക്ഷം രൂപയാണ് മൂന്ന് വര്‍ഷത്തെ സുരക്ഷയ്ക്കായി ആവശ്യമായി വരുന്നത്.

എളുപ്പത്തില്‍ പിന്‍വലിക്കാവുന്ന സ്ഥിരനിക്ഷേപങ്ങള്‍ (FD), ഡെറ്റ് മ്യൂച്വല്‍ ഫണ്ടുകള്‍ തുടങ്ങിയ നിക്ഷേപ മാര്‍ഗങ്ങളില്‍ ഈ തുക സൂക്ഷിക്കാം. കൂടാതെ കുടുംബത്തിന്റെ സാമ്പത്തിക സുരക്ഷയ്ക്കായി മതിയായ ടേം ലൈഫ് ഇന്‍ഷുറന്‍സും ഹെല്‍ത്ത് ഇന്‍ഷുറന്‍സും ഉറപ്പാക്കണം. പാഷന്‍ പ്രോജക്ടിനായി നിക്ഷേപിക്കുന്ന തുക വിരമിക്കല്‍ സമ്പാദ്യത്തില്‍ നിന്ന് മാറ്റിവയ്ക്കുകയും വേണം.

ജോലി വിടാതെ പാഷന്‍ പരീക്ഷിക്കാം

20കളില്‍ തൊഴില്‍ വിപണിയില്‍ മികച്ച വരുമാനം നല്‍കുന്ന കഴിവുകള്‍ വികസിപ്പിക്കുന്നതിനും പ്രാധാന്യം നല്‍കണം. പുതിയ സാങ്കേതികവിദ്യകള്‍ പഠിക്കുക, മികച്ച അവസരങ്ങള്‍ തേടുക, കൃത്യമായ ആസൂത്രണത്തോടെ ജോലി മാറുക തുടങ്ങിയവ സാമ്പത്തിക അടിത്തറ ശക്തമാക്കും.

പാഷന്‍ പ്രോജക്ടിനായി പ്രത്യേക സമ്പാദ്യവും SIP വഴി രൂപപ്പെടുത്താം. എന്നാല്‍ ഈ തുക വിരമിക്കല്‍ സമ്പാദ്യത്തില്‍ നിന്ന് പൂര്‍ണമായും വേറിട്ടതായിരിക്കണം. അതുപോലെ നിലവിലെ ജോലി തുടരുന്നതിനൊപ്പം ചെറിയ രീതിയില്‍ സ്വന്തം സംരംഭമോ ഇഷ്ടമേഖലയിലെ പ്രവര്‍ത്തനങ്ങളോ പരീക്ഷിക്കാം. അതില്‍നിന്ന് സ്ഥിരമായ വരുമാനവും വളര്‍ച്ചയും ലഭിക്കുന്നുണ്ടെന്ന് ഉറപ്പാക്കിയശേഷം മാത്രമേ മുഴുവന്‍ സമയവും അതിനായി മാറ്റിവയ്ക്കാവൂ.

ചുരുക്കത്തില്‍, സാമ്പത്തിക കരുതല്‍, വിജയസാധ്യത തെളിയിച്ച പാഷന്‍ പ്രോജക്ട്, വരുമാനത്തിലെ വ്യക്തമായ വളര്‍ച്ച എന്നിവ ഒരുമിച്ചെത്തുമ്പോഴാണ് ജോലി ഉപേക്ഷിക്കുന്നതിനെക്കുറിച്ച് ചിന്തിക്കേണ്ടത്. പാഷനെ പിന്തുടരുന്നതിന് സാമ്പത്തിക സുരക്ഷ തടസമല്ല. മറിച്ച് വിജയത്തിലേക്കുള്ള യാത്രയില്‍ ആവശ്യമായ കരുത്താണത്. ആദ്യം മൂലധനം ഉറപ്പാക്കുക, പിന്നീട് ആത്മവിശ്വാസത്തോടെ സ്വപ്‌നങ്ങളിലേക്ക് മുന്നേറുക എന്നതാണ് വിദഗ്ധരുടെ ഉപദേശം.