ആദായ നികുതി, ഈ ഫോമുകൾ ഇനിയില്ല

ആദായ നികുതി റിട്ടേൺ നൽകാറുണ്ടോ? ആദായ നികുതി നിയമത്തിലെ അറിഞ്ഞിരിക്കേണ്ട ചില മാറ്റങ്ങൾ.

ഫോം 16 ഇനിയില്ല. പുതിയ ഫോം 130 സമ‍ർപ്പിക്കാം

ശമ്പളക്കാരായ ജീവനക്കാർക്കും പെൻഷൻകാർക്കും തൊഴിലുടമ നൽകുന്ന ടിഡിഎസ് സർട്ടിഫിക്കറ്റ് ഇനി ഫോം നമ്പർ 130 ആണ്. ശമ്പളം, നികുതി കിഴിവ്, നിക്ഷേപം, കിഴിവുകൾ എന്നിവയുടെ വിശദാംശങ്ങൾ നൽകുന്ന രേഖയാണിത്. 2025 ലെ ആദായനികുതി നിയമത്തിലെ സെക്ഷൻ 402(39) ലെ വ്യവസ്ഥകൾ പ്രകാരം മുതിർന്ന പൗരന്മാർ നേടിയ പലിശ വരുമാനത്തിനും ഫോം 130 ബാധകമാണ്.

ഫോം 16 എക്ക് പകരം ഫോം 131

ശമ്പളേതര വരുമാനത്തിനുള്ള ടിഡിഎസ് സർട്ടിഫിക്കറ്റ് ഇനി ഫോം 131 ആണ്. നേരത്തെ ഇത് ഫോം 16 എ ആയിരുന്നു. ഫോം നമ്പർ 131, 2025 ലെ ആദായനികുതി നിയമത്തിലെ സെക്ഷൻ 395(4)(എ) പ്രകാരം ടിഡിഎസിനായി നിർദ്ദേശിക്കപ്പെട്ടിട്ടുള്ള ഒരു സർട്ടിഫിക്കറ്റാണ്. ആരുടെ പേരിൽ, സ്രോതസ്സിൽ നികുതി കുറച്ചിട്ടുണ്ടോ അവർക്ക് നികുതി പിടിച്ചിരിക്കുന്ന സ്ഥാപനം നൽകുന്ന സർട്ടിഫിക്കറ്റാണിത്. ഐടിആർ ഫയൽ ചെയ്യുന്ന സമയത്ത് ടിഡിഎസ് ക്രെഡിറ്റ് ക്ലെയിം ചെയ്യാൻ ഈ ഫോം സഹായിക്കും.

1 ഫോം 49എ ക്ക് പകരം ഇനി പുതിയ ഫോം 93

പാൻ നമ്പ‍ർ ലഭിക്കുന്നതിനായി നേരത്തെ ഇന്ത്യൻ പൗരൻമാരോ സ്ഥാപനങ്ങളോ നൽകിയിരുന്ന 49 എക്ക് പകരം ഇനി പുതിയ ഫോമാണ് നൽകേണ്ടത്. നേരത്തെ ഫോം 49എ, ഫോം 49എഎ എന്നീ പേരുകളിൽ അറിയപ്പെട്ടിരുന്ന ഫോമുകൾ വിഭാഗത്തെ അടിസ്ഥാനമാക്കി ഫോം നമ്പർ 93, 94, 95, 96 എന്നീ ഫോമുകളിൽ നൽകണം.

ഫോം 93 ഇന്ത്യൻ പൗരന്മാർക്കുള്ളതാണ്, അതേസമയം ഫോം 94 ഇന്ത്യൻ കമ്പനികൾക്കും ഒരു അൺഇൻകോർപ്പറേറ്റഡ് സ്ഥാപനം എന്നിവയ്ക്കുള്ളതാണ്. ഇന്ത്യൻ പൗരന്മാരല്ലാത്ത വ്യക്തികൾ ഫോം 95 ആണ് നൽകേണ്ടത്. ഇന്ത്യയ്ക്ക് പുറത്ത് രൂപീകരിച്ച സ്ഥാപനങ്ങൾക്ക് അല്ലെങ്കിൽ ഇന്ത്യയ്ക്ക് പുറത്ത് രൂപീകരിച്ച അൺഇൻകോർപ്പറേറ്റഡ് സ്ഥാപനങ്ങൾക്ക്. ഫോം 96 ഉപയോ​ഗിക്കാം.