19 Nov 2026 1:57 PM IST
Summary
എന്നാല് ഇത്തവണത്തെ ഏറ്റവും വലിയ ട്വിസ്റ്റ് ആരാണ് ലോണ് എടുക്കുന്നത് എന്നതിലാണ്. ഇത്രയും കാലം ചെറുപ്പക്കാരാണ് ലോണ് എടുക്കുന്നത് എന്നായിരുന്നു ധാരണ
ഉത്സവ സീസണ് വന്നാല് പണം വേണം, അതും പെട്ടെന്ന് വേണം! ഇപ്പോല് അതിനായി ബാങ്കില് കയറിയിറങ്ങി കാത്തിരിക്കേണ്ട. ഫോണില് 2 മണിക്കൂറിനുള്ളില് 7 ലക്ഷം രൂപ വരെ കിട്ടും എന്നായതോടെ ഇന്ത്യക്കാര് കൂട്ടത്തോടെ ഇന്സ്റ്റന്റ് വ്യക്തിഗത വായ്പയിലേക്ക് ഓടുകയാണ്. പൈസബസാറിന്റെ പുതിയ കണക്കുകള് പറയുന്നത് ഞെട്ടിക്കുന്ന കാര്യമാണ്. ഈ ഉത്സവ സീസണില് പൈസബസാര് വഴിയുള്ള ഇന്സ്റ്റന്റ് ലോണ് വിതരണം കഴിഞ്ഞ വര്ഷത്തേക്കാള് 32% കൂടി! 800-ലധികം നഗരങ്ങളില് നിന്നുള്ള കണക്കാണിത്. ഡിജിറ്റല് ഓണ്ബോര്ഡിംഗും, വീഡിയോ കെവൈസിയും, ഒറ്റ പ്ലാറ്റ്ഫോമില് പല ബാങ്കുകളുടെ ഓഫറും കിട്ടുന്നതാണ് ഈ കുതിപ്പിന് പിന്നില്.
എന്നാല് ഇത്തവണത്തെ ഏറ്റവും വലിയ ട്വിസ്റ്റ് ആരാണ് ലോണ് എടുക്കുന്നത് എന്നതിലാണ്. ഇത്രയും കാലം ചെറുപ്പക്കാരാണ് ലോണ് എടുക്കുന്നത് എന്നായിരുന്നു ധാരണ. അതിനെ പൊളിച്ചിരിക്കുകയാണ് 46-55 വയസ്സുള്ളവര്! അവര്ക്കുള്ള ലോണ് വിതരണം ഒറ്റയടിക്ക് 70% കൂടി. കഴിഞ്ഞ വര്ഷം മൊത്തം ലോണിന്റെ 13% മാത്രമായിരുന്നു ഇവരുടെ പങ്ക്, ഇപ്പോള് അത് 19% ആയി. 36-45 വയസ്സുള്ളവരാണ് ഇപ്പോഴും നമ്പര് വണ്, 40% പങ്ക്. 25-35 വയസ്സുള്ളവര് 36%. അതായത് ഇനി ലോണ് എന്നാല് ചെറുപ്പക്കാരുടെ മാത്രം കാര്യമല്ല, മുതിര്ന്നവരും ഫോണില് കാശ് വാങ്ങാന് പഠിച്ചു കഴിഞ്ഞു!
ഏതൊക്കെ സംസ്ഥാനങ്ങളാണ് ഏറ്റവും കൂടുതല് ലോണ് എടുക്കുന്നത്? മഹാരാഷ്ട്ര, ഗുജറാത്ത്, ഉത്തര്പ്രദേശ് - ഈ മൂന്ന് സംസ്ഥാനങ്ങള് ചേര്ന്ന് മൊത്തം ലോണിന്റെ മൂന്നിലൊന്നിലധികം എടുത്തു! മഹാരാഷ്ട്രയില് 31% വളര്ച്ച, ഗുജറാത്തില് 57% കുതിപ്പ്, യുപിയില് 40% വളര്ച്ച. തെലങ്കാന, തമിഴ്നാട്, കര്ണാടക, ആന്ധ്രാപ്രദേശ്, രാജസ്ഥാന്, ഡല്ഹി, ഹരിയാന എന്നിവയാണ് പിന്നാലെ.
പക്ഷേ ഒരു മുന്നറിയിപ്പുണ്ട്! പെട്ടെന്ന് കിട്ടും എന്ന് കരുതി കണ്ണടച്ച് ലോണ് എടുക്കരുത്. വ്യക്തിഗത വായ്പകള്ക്ക് പലിശ കൂടുതലാണ്. പൈസബസാര് തന്നെ പറയുന്നത്, ലോണ് എന്തിനാണ് എടുക്കുന്നത് - ഉത്സവ ഷോപ്പിംഗിനോ, പഴയ കടം വീട്ടാനോ - എന്ന് ഈ കണക്കില് നിന്ന് പറയാന് പറ്റില്ല എന്നാണ്. അതുകൊണ്ട് ലോണ് എടുക്കുന്നതിന് മുമ്പ് പലിശ നിരക്ക്, പ്രോസസിംഗ് ഫീസ്, തിരിച്ചടവ് കാലാവധി, ആകെ കൊടുക്കേണ്ട പലിശ എന്നിവ താരതമ്യം ചെയ്യണം. 2 മണിക്കൂറില് പണം കിട്ടുന്നത് സൗകര്യമാണ്, പക്ഷേ തിരിച്ചടവ് മാസങ്ങളോളം നീളുമെന്ന് ഓര്ക്കേണ്ടതുണ്ട്.
പഠിക്കാം & സമ്പാദിക്കാം
Home
