സ്വര്‍ണത്തിന് മങ്ങല്‍, പവന് 160 രൂപ ഇടിവ്

കൊച്ചി: സംസ്ഥാനത്ത് സ്വര്‍ണവിലയില്‍ ഇടിവ്. ഇന്ന് പവന് (22 കാരറ്റ്) 160 രൂപ കുറഞ്ഞ് 37,720 രൂപയില്‍ എത്തി. ഗ്രാമിന് 20 രൂപ കുറഞ്ഞ് 4,715 രൂപയിലാണ് വ്യാപാരം നടക്കുന്നത്. കഴിഞ്ഞ ദിവസം പവന് 200 രൂപ വര്‍ധിച്ച് 37,880 രൂപയില്‍ എത്തിയിരുന്നു. ഇക്കഴിഞ്ഞ വെള്ളിയാഴ്ച്ച പവന് 520 രൂപയുടെ വര്‍ധനയാണുണ്ടായത്. ഇന്ന് 24 കാരറ്റ് സ്വര്‍ണം പവന് 168 രൂപ കുറഞ്ഞ് 41,152 രൂപയായി. വെള്ളി വില ഗ്രാമിന് 0.60 രൂപ കുറഞ്ഞ് 63 രൂപയായി. എട്ട് ഗ്രാമിന് 504 രൂപയാണ് ഇന്ന് വിപണി വില.

ഇന്ന് വ്യാപാരം ആരംഭിച്ചപ്പോള്‍ ഡോളറിനെതിരെ രൂപയുടെ മൂല്യം 27 പൈസ ഇടിഞ്ഞ് 78.80ല്‍ എത്തി. ഇന്റര്‍ബാങ്ക് ഫോറക്‌സ് എക്‌സ്‌ചേഞ്ചില്‍ വ്യാപാരം ആരംഭിച്ചപ്പോള്‍ 78.70 എന്ന നിലയിലായിരുന്നു രൂപ. ഇക്കഴിഞ്ഞ വെള്ളിയാഴ്ച്ച ഡോളറിനെതിരെ രൂപയുടെ മൂല്യം മൂന്നാഴ്ച്ചയ്ക്കിടയിലെ ഏറ്റവും ഉയര്‍ന്ന നിരക്കില്‍ എത്തിയിരുന്നു. അന്ന് ഡോളറിനെതിരെ രൂപയുടെ മൂല്യം 45 പൈസ ഉയര്‍ന്ന് 79.42 ആയി.

ബ്രെന്റ് ക്രൂഡിന്റെ വില 0.42 ശതമാനം ഇടിഞ്ഞ് 100.12 ഡോളറായിട്ടുണ്ട്. ഇന്ന് രാവിലെ വ്യാപാരം ആരംഭിച്ചപ്പോള്‍ സെന്‍സെക്‌സ് 86.44 പോയിന്റ് താഴ്ന്ന് 58,049.92ല്‍ എത്തി. എന്‍എസ്ഇ നിഫ്റ്റി 55.10 പോയിന്റ് താഴ്ന്ന് 17,290.35ലുമാണ് ഇപ്പോള്‍ വ്യാപാരം നടക്കുന്നത് (ഇന്ന് രാവിലെ 10.15 പ്രകാരം).