ബോണസ് ഇഷ്യൂ: രുചിര പേപ്പേഴ്സ് ഓഹരികൾ നേട്ടത്തിൽ

രുചിര പേപ്പേഴ്സി​ന്റെ ഓഹരികൾ ചൊവ്വാഴ്ച വ്യാപാരത്തിനിടയിൽ 9.29 ശതമാനം ഉയർന്നു. ബോണസ് ഓഹരികൾ നൽകുന്നതിനുള്ള യോഗം ഓഗസ്റ്റ് 30 നു ചേരുമെന്ന് കമ്പനി പ്രഖ്യാപിച്ചതിനെത്തുടർന്നാണ് വില ഉയർന്നത്.

ക്രാഫ്റ്റ് പേപ്പറുകൾ, റൈറ്റിംഗ്, പ്രിന്റിങ് പേപ്പറുകൾ എന്നിവ നിർമിക്കുന്ന കമ്പനി, നടപ്പു സാമ്പത്തിക വർഷത്തിന്റെ ഒന്നാം പാദത്തിൽ 157.87 ശതമാനം വർധനവാണ് അറ്റാദായത്തിൽ റിപ്പോർട്ട് ചെയ്തത്. കമ്പനിയുടെ നികുതി കിഴിച്ചുള്ള ലാഭം 11.63 കോടി രൂപയായി. കഴിഞ്ഞ വർഷം ഇതേ പാദത്തിൽ ഇത് 4.51 കോടി രൂപയായിരുന്നു.

ഓഹരി ഇന്ന് 124 രൂപ വരെ ഉയർന്നു. 6.74 ശതമാനം നേട്ടത്തിൽ 121.10 രൂപയിലാണ് വ്യാപാരം അവസാനിപ്പിച്ചത്. ഇന്ന് ബിഎസ്ഇയിൽ 0.78 ലക്ഷം ഓഹരികളുടെ കൈമാറ്റം നടന്നു. കഴിഞ്ഞ രണ്ട് ആഴ്ച്ചയിലെ ശരാശരി വ്യാപാരം 0.32 ലക്ഷം ഓഹരികളായിരുന്നു.