ഇ-കൊമേഴ്സ് പേയ്മെന്റ് നടപടിക്രമങ്ങള്‍ ലളിതമാക്കാന്‍ ആര്‍ബിഐ നിര്‍ദ്ദേശം

മുംബൈ: ഇ-കൊമേഴ്സ് വഴിയുള്ള കയറ്റുമതി, ഇറക്കുമതി പേയ്മെന്റിന്റെ നിലവിലുള്ള നടപടിക്രമങ്ങള്‍ ലളിതമാക്കാന്‍ റിസര്‍വ് ബാങ്കിന്റെ നിര്‍ദേശം. ഓണ്‍ലൈന്‍ കയറ്റുമതി-ഇറക്കുമതി ഫെസിലിറ്റേറ്റര്‍ (ഒഇഐഎഫ്) വഴിയുള്ള ചെറിയ മൂല്യമുള്ള കയറ്റുമതി, ഇറക്കുമതി അനുബന്ധ പേയ്‌മെന്റുകളുടെ പ്രക്രിയയും തീര്‍പ്പാക്കലും സംബന്ധിച്ച കരട് മാര്‍ഗ്ഗനിര്‍ദ്ദേശങ്ങളാണ് ആര്‍ബിഐ പുറത്തിറക്കിയത്.

'ഇ-കൊമേഴ്സ് മേഖലയുടെ വികസനത്തിന്റെയും ബാങ്കുകളുടെയും മറ്റ് തല്‍പരകക്ഷികളുടെയും പ്രതികരണത്തിന്റെയും അടിസ്ഥാനത്തിലാണ് ഇ-കൊമേഴ്സ് വഴിയുള്ള കയറ്റുമതി- ഇറക്കുമതി വ്യാപാരത്തിന്റെ നിലവിലുള്ള മാര്‍ഗനിര്‍ദേശങ്ങളെ പരിഷ്‌കരിച്ച് ലളിതവും വിവേചനപരവുമായി മാറ്റുന്നത്' ആര്‍ബിഐ വ്യക്തമാക്കി.

ഓണ്‍ലന്‍ൈ വഴിയുള്ള ഇറക്കുമതിയില്‍ ചരക്കുകള്‍, ഡിജിറ്റല്‍ ഉത്പന്നങ്ങള്‍ എന്നിവയുടെ മൂല്യം 3,000 ഡോളറില്‍ കൂടുതലാകരുത്. ഇ-കൊമേഴ്സ് വഴി കയറ്റുമതി ചെയ്യുമ്പോള്‍ ഈ പരിധി 15,000 ഡോളറാണ്. നിലവില്‍, ചരക്കുകളുടെയും സേവനങ്ങളുടെയും കയറ്റുമതി, ഇറക്കുമതി എന്നിവയുമായി ബന്ധപ്പെട്ട് ഓണ്‍ലൈന്‍ പേയ്‌മെന്റ് ഗേറ്റ് വേ സേവന ദാതാക്കളുമായുള്ള (OPGSPs) സ്റ്റാന്‍ഡിംഗ് കരാറിലൂടെ പണമിടപാടുകള്‍ നടത്താനും തീര്‍പ്പാക്കാനുമുള്ള സൗകര്യം നല്‍കാന്‍ ബാങ്കുകള്‍ക്ക് അനുമതിയുണ്ട്.