'രാജ്യത്തെ 56% സ്ത്രീകളും ജന്‍ധന്‍ അക്കൗണ്ട് ഉടമകള്‍': ധനമന്ത്രി

ഡെല്‍ഹി: സമൂഹത്തിലെ പാര്‍ശ്വവല്‍ക്കരിക്കപ്പെട്ട വിഭാഗങ്ങളുടെ സാമ്പത്തിക വികസനം ഉറപ്പാക്കുന്ന സമഗ്രമായ വളര്‍ച്ചയിലേക്കുള്ള പ്രധാന ചുവടുവയ്പാണ് സാമ്പത്തിക ഉള്‍പ്പെടുത്തലെന്ന് ധനമന്ത്രി നിര്‍മ്മലാ സീതാരാമന്‍. പ്രധാനമന്ത്രി ജന്‍ ധന്‍ യോജനയിലൂടെ 46 കോടിയിലധികം ബാങ്ക് അക്കൗണ്ടുകളില്‍ 1.74 ലക്ഷം കോടി രൂപ ഡെപ്പോസിറ്റ് ബാലന്‍സുമായി ഗ്രാമീണ - അര്‍ദ്ധ നഗര മേഖലകളിലേക്ക് പദ്ധതി വ്യാപിപ്പിക്കുവാന്‍ സാധിച്ചുവെന്നും മന്ത്രി കൂട്ടിച്ചേര്‍ത്തു. രാജ്യത്തെ 56 ശതമാനം സ്ത്രീകളും ജന്‍ധന്‍ അക്കൗണ്ട് ഉടമകളാണെന്നും മന്ത്രി വ്യക്തമാക്കി. സാമ്പത്തിക ഉള്‍പ്പെടുത്തല്‍ പദ്ധതിയുടെ എട്ടാം വാര്‍ഷികം പ്രമാണിച്ച് ഇറക്കിയ കുറിപ്പിലാണ് ഇക്കാര്യം വ്യക്തമാക്കുന്നത്.

രാജ്യത്തെ എല്ലാ വിഭാഗം ജനങ്ങളിലും ബാങ്കിംഗ് സേവനങ്ങളും മറ്റ് സാമ്പത്തിക സേവനങ്ങളും എത്തിക്കുന്നതിന്് ആരംഭിച്ച പദ്ധതിയാണ് പ്രധാനമന്ത്രി ജന്‍ ധന്‍ യോജന. ഇന്ത്യയിലെ ഓരോ കുടുംബത്തിനും ഒരു ബാങ്ക് അക്കൗണ്ട് എന്നതാണ് ഈ പദ്ധതിയുടെ ലക്ഷ്യം. പദ്ധതി പ്രകാരം ഏതൊരാള്‍ക്കും ഇന്ത്യയിലെ നാഷണലൈസ്ഡ് ബാങ്കുകളിലെ ഏതൊരു ശാഖയിലും അക്കൗണ്ട് തുടങ്ങാവുന്നതാണ്. 2014 ഓഗസ്റ്റ് 28 നാണ് പ്രധാനമന്ത്രി ജന്‍ ധന്‍ യോജന രാജ്യത്ത് ആരംഭിച്ചത്. കേന്ദ്ര ധനകാര്യ മന്ത്രാലയത്തിന് കീഴിലാണ് ഈ പദ്ധതി നടപ്പാക്കുന്നത്.

പ്രധാനമന്ത്രി ജന്‍ ധന്‍ യോജന ഒരു സേവിംഗ്‌സ് അക്കൗണ്ടാണ്. ചെറിയ തോതിലുള്ള സമ്പാദ്യ പദ്ധതിയായി ഇതിനെ കാണാം. ഇന്ത്യക്കാര്‍ക്ക് മാത്രമേ ജന്‍ ധന്‍ ആരംഭിക്കാന്‍ സാധിക്കുകയുള്ളു. നിങ്ങളുടെ തൊട്ടടുത്തുള്ള ബാങ്ക് ശാഖയില്‍ ഈ അക്കൗണ്ട് ആരംഭിക്കാം. പദ്ധതിയില്‍ ചേരുമ്പോള്‍ ഒരു ഡെബിറ്റ് കാര്‍ഡ് (റുപേ കാര്‍ഡ്) ലഭിക്കും. പദ്ധതി പ്രകാരം തികച്ചും സൗജന്യമായി ഒരു ലക്ഷം രൂപയുടെ ആക്‌സിഡന്റ് ഇന്‍ഷുറന്‍സ് പോളിസി ലഭിക്കും. 10,000 രൂപയുടെ ഓവര്‍ ഡ്രാഫ്റ്റും (ഒഡി) പദ്ധതിയില്‍ ഉള്‍ക്കൊള്ളിച്ചിരിക്കുന്നു.

ഡ്രൈവിംഗ് ലൈസന്‍സ്, പാസ്‌പോര്‍ട്ട്, പാന്‍ കാര്‍ഡ്, വോട്ടര്‍ ഐഡി, തൊഴിലുറപ്പ് പദ്ധതിയുടെ കാര്‍ഡ്, കേന്ദ്ര സംസ്ഥാന സര്‍ക്കാരുകള്‍ നല്‍കിയ മറ്റ് തിരിച്ചറിയല്‍ രേഖകള്‍, ഗസറ്റഡ് ഓഫീസര്‍ അറ്റസ്റ്റ് ചെയ്ത ഫോട്ടോ എന്നിവയാണ് പ്രധാനമന്ത്രി ജന്‍ ധന്‍ പദ്ധതി പ്രകാരം അക്കൗണ്ട് എടുക്കാന്‍ ആവശ്യമായ രേഖകള്‍. സര്‍ക്കാര്‍ പദ്ധതികളനുസരിച്ചുള്ള ആനുകൂല്യങ്ങള്‍ ഈ അക്കൗണ്ടിലേക്ക് നേരിട്ട് ലഭിക്കും. റിസര്‍വ് ബാങ്ക് ഓഫ് ഇന്ത്യയുടെ മാര്‍ഗ്ഗനിര്‍ദ്ദേശങ്ങള്‍ അനുസരിച്ച്, രണ്ട് വര്‍ഷത്തിലേറെയായി അക്കൗണ്ടില്‍ ഉപഭോക്താക്കളാല്‍ ഇടപാടുകള്‍ നടന്നിട്ടില്ലെങ്കില്‍ ജന്‍ ധന്‍ അക്കൗണ്ട് പ്രവര്‍ത്തനരഹിതമായി കണക്കാക്കപ്പെടും.