വിപണിയിൽ കനത്ത ചാഞ്ചാട്ടം തുടരുന്നു

മുംബൈ: ആഗോള വിപണിയിലെ മോശം പ്രവണതകള്‍, ശമനമില്ലാതെ തുടരുന്ന വിദേശ നിക്ഷേപത്തിന്റെ പിന്‍വലിക്കല്‍ എന്നിവ മൂലം ഓഹരി വിപണിയില്‍ ഇന്ന് മോശം തുടക്കമായിരുന്നു.

ഉച്ചയ്ക്ക് 1.30 വരെ നഷ്ടത്തിൽ തുടർന്ന വിപണി, ഇടയ്ക്കിടെ ലാഭത്തിലേക്കു കയറി. 1.37 ന്, സെന്‍സെക്‌സ് 32.58 പോയിന്റ് നേട്ടത്തിൽ 53,210 ലേക്കും, നിഫ്റ്റി 0.65 പോയിന്റ് നേട്ടത്തിൽ 15,850.85 ലേക്കും എത്തി. തുടർന്ന്, 1.40 ഓടെ വീണ്ടും നഷ്ടത്തിലായി. ഏതാണ്ട് രണ്ടു മണിയോടടുപ്പിച്ചും, സൂചികകൾ നേരിയ നഷ്ടത്തിൽ തുടരുകയാണ്.

ആദ്യഘട്ട വ്യാപാരത്തില്‍ സെന്‍സെക്‌സ് 564.77 പോയിന്റ് താഴ്ന്ന് 52,612.68 ലും, നിഫ്റ്റി 162.4 പോയിന്റ് താഴ്ന്ന് 15,687.80 ലുമെത്തി. ഇന്‍ഡസ്ഇന്‍ഡ് ബാങ്ക്, ഹിന്ദുസ്ഥാന്‍ യുണീലിവര്‍, ടൈറ്റന്‍, കൊട്ടക്ക് മഹീന്ദ്ര ബാങ്ക് ബജാജ് ഫിനാന്‍ എന്നീ കമ്പനികളാണ് ആദ്യഘട്ട വ്യാപാരത്തില്‍ നഷ്ടം നേരിട്ടത്. സണ്‍ ഫാര്‍മ, ഭാര്‍തി എയര്‍ടെല്‍ എന്നിവയാണ് നേട്ടമുണ്ടാക്കിയ ഓഹരികള്‍.

ജിയോജിത് ഫിനാന്‍ഷ്യല്‍ സര്‍വീസസ് ചീഫ് ഇന്‍വെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാര്‍ പറയുന്നു: "കഴിഞ്ഞ വെള്ളിയാഴ്ച്ച അമേരിക്കന്‍ വിപണിയില്‍ കണ്ട പുള്‍ബാക്ക് റാലിയുടെ ഊര്‍ജ്ജം നഷ്ടപ്പെട്ടു കഴിഞ്ഞു. വിപണികളെല്ലാം വീണ്ടും തളര്‍ച്ചയിലാണ്. അസംസ്‌കൃത വസ്തുക്കളുടെ വിലയിലുണ്ടായ കുറവ് നിലനിര്‍ത്തനായില്ല. ക്രൂഡോയില്‍ വീണ്ടും ബാരലിന് 117 ഡോളറിലെത്തി. അമേരിക്കന്‍ സമ്പദ്ഘടനയില്‍ ഒരു മാന്ദ്യം ഉണ്ടാകുമോയെന്ന കാര്യത്തില്‍ ഇപ്പോഴും ഏകാഭിപ്രായം ഇല്ലെങ്കിലും അതിന്റെ സൂചനകള്‍ കണ്ടു തുടങ്ങിയിട്ടുണ്ട്. എന്നാല്‍, ലേബര്‍ വിപണി ഇപ്പോഴും ശക്തമാണ്. തൊഴിലില്ലായ്മ നിരക്ക് 3.6 ശതമാനം എന്ന താഴ്ന്ന നിലയിലാണ്. ഈ പരസ്പര വിരുദ്ധമായ സൂചനകള്‍ക്കിടയില്‍ വിപണി ചാഞ്ചാട്ടത്തില്‍ തുടരുകയാണ്."

അന്താരാഷ്ട്ര വിപണിയില്‍ രാവിലെ ബ്രെന്റ് ക്രൂഡോയില്‍ വില ബാരലിന് 0.95 ശതമാനം താഴ്ന്ന് ബാരലിന് 116.86 ഡോളറായി. ഇന്നലെ സെന്‍സെക്‌സ് 16.17 പോയിന്റ് ഉയര്‍ന്ന് 53,117.45 ലും, നിഫ്റ്റി 18.15 പോയിന്റ് ഉയര്‍ന്ന് 15,850.20 ലുമാണ് വ്യാപാരം അവസാനിപ്പിച്ചത്.