വരുന്നു, രാജ്യത്ത് 6ജി നെറ്റ്‌വർക്ക്; ഇന്ത്യ ഡിജിറ്റൽ വിപ്ലവത്തിന്റെ അടുത്ത ഘട്ടത്തിലേക്ക്

ടെലികോം രംഗത്ത് വിപ്ലവകരമായ മാറ്റങ്ങൾ സൃഷ്ടിച്ച റിലയൻസ് ജിയോ, രാജ്യത്ത് 6ജി സാങ്കേതികവിദ്യ യാഥാർത്ഥ്യമാക്കാനുള്ള തയ്യാറെടുപ്പുകൾ ഔദ്യോഗികമായി പ്രഖ്യാപിച്ചു. ആഗോളതലത്തിൽ 2030-ഓടെ 6ജി മാനദണ്ഡങ്ങൾ പൂർത്തിയാകുമ്പോൾ, ഈ അതിവേഗ സേവനങ്ങൾ ലഭ്യമാക്കുന്ന ലോകത്തിലെ ആദ്യത്തെ രാജ്യങ്ങളിൽ ഒന്നായി ഇന്ത്യയും മാറുമെന്നാണ് ജിയോ വ്യക്തമാക്കിയിരിക്കുന്നത്. ഡൽഹിയിൽ നടന്ന ഇന്ത്യ മൊബൈൽ കോൺഗ്രസിലാണ് കമ്പനി തങ്ങളുടെ തദ്ദേശീയമായ പ്രീ-6ജി സാങ്കേതികവിദ്യകളും ഭാവി പദ്ധതികളും പ്രദർശിപ്പിച്ചത്.

ഗിഗാ മിമോ റേഡിയോയും പ്രത്യേകതകളും

6ജി മുന്നേറ്റത്തിന്റെ ഭാഗമായി ഇന്ത്യയിലെ ആദ്യത്തെ 'ഗിഗാ മിമോ റേഡിയോ' ജിയോ അവതരിപ്പിച്ചു. നിലവിലുള്ള 5ജി നെറ്റ്‍വർക്കിനെ അപേക്ഷിച്ച് അഞ്ചിരട്ടി അധിക ശേഷിയും, പ്രവർത്തനത്തിൽ പത്തിരട്ടി കുറഞ്ഞ പ്രതികരണ സമയവും (ലെറ്റൻസി) നൽകാൻ ശേഷിയുള്ളതാണ് ഈ പുതിയ സാങ്കേതികവിദ്യ. ഒരേസമയം 5ജി, 6ജി നെറ്റ്‍വർക്കുകളിൽ പ്രവർത്തിക്കാൻ കഴിയുന്ന കോമൺ ബേസ്ബാൻഡ് യൂണിറ്റും ഇതിന്റെ പ്രത്യേകതയാണ്. എഐ (കൃത്രിമ ബുദ്ധി) അധിഷ്ഠിതവും ക്വാണ്ടം സുരക്ഷിതവുമായ ആർക്കിടെക്ചറാണ് ജിയോയുടെ പുതിയ നെറ്റ്‍വർക്കിനായി വികസിപ്പിച്ചെടുക്കുന്നത്.

ഇന്ത്യയുടെ സാങ്കേതിക മുന്നേറ്റം

സാങ്കേതികവിദ്യകൾക്കായി മറ്റ് രാജ്യങ്ങളെ ആശ്രയിക്കുന്നതിന് പകരം സ്വന്തമായി ഹാർഡ്‌വെയറും സോഫ്റ്റ്‌വെയറും വികസിപ്പിക്കാനാണ് ജിയോ ലക്ഷ്യമിടുന്നത്. ഇതിന്റെ ഭാഗമായി എണ്ണൂറിലധികം പേറ്റന്റുകൾ ജിയോ സ്വന്തമാക്കിയിട്ടുണ്ട്. ആഗോളതലത്തിലുള്ള 6ജി മാനദണ്ഡങ്ങൾ രൂപീകരിക്കുന്നതിൽ അന്താരാഷ്ട്ര സമിതികൾക്ക് നൂറുകണക്കിന് സാമ്പത്തിക-സാങ്കേതിക നിർദ്ദേശങ്ങളും കമ്പനി സമർപ്പിച്ചിട്ടുണ്ട്. ഈ കുതിച്ചുചാട്ടം ഇന്ത്യയുടെ ഡിജിറ്റൽ സമ്പദ്‌വ്യവസ്ഥയ്ക്കും സാങ്കേതിക മേഖലയ്ക്കും വലിയൊരു മുതൽക്കൂട്ടാകും.