ആമസോണിന്റെ വമ്പന്‍ ട്വിസ്റ്റ്; കിടിലന്‍ ആന്‍ഡ്രോയിഡ് ടാബ്ലെറ്റുകളുമായി കളത്തിലേക്ക്

ആര്‍ട്ടിഫിഷ്യല്‍ ഇന്റലിജന്‍സിന് (എഐ) പ്രാധാന്യം നല്‍കി പുതിയ ആന്‍ഡ്രോയിഡ് ടാബ്ലെറ്റ് നിരയുമായി ആമസോണ്‍. അലക്‌സ ടാബ്ലെറ്റ് 12 പ്രോ, അലക്‌സ ടാബ്ലെറ്റ് 11, അലക്‌സ ടാബ്ലെറ്റ് 8 എന്നീ മൂന്ന് മോഡലുകളാണ് കമ്പനി അവതരിപ്പിച്ചത്. ഗൂഗിള്‍ പ്ലേ സ്റ്റോറിനുള്ള പിന്തുണയാണ് പുതിയ ടാബ്ലെറ്റുകളുടെ പ്രധാന പ്രത്യേകത. മുന്‍ ഫയര്‍ ടാബ്ലെറ്റുകളില്‍ നിന്ന് വ്യത്യസ്തമായി കൂടുതല്‍ ആപ്പുകള്‍ ഉപയോഗിക്കാനുള്ള സൗകര്യം ഇതിലൂടെ ലഭിക്കും. മൂന്ന് മോഡലുകളിലും ആമസോണിന്റെ പുതിയ എഐ അസിസ്റ്റന്റായ അലക്‌സ പ്ലസ് ഉള്‍പ്പെടുത്തിയിട്ടുണ്ട്.

പുതിയ നിരയിലെ പ്രീമിയം മോഡലായ അലക്‌സ ടാബ്ലെറ്റ് 12 പ്രോയില്‍ 12 ഇഞ്ച് ഡിസ്പ്ലേ, 120Hz റിഫ്രഷ് റേറ്റ്, 16 ജിബി വരെ റാം എന്നിവയുണ്ട്. ഡോള്‍ബി അറ്റ്മോസ് സ്പീക്കറുകളും 16 മണിക്കൂര്‍ വരെ വീഡിയോ പ്ലേബാക്കും ഇതിന്റെ പ്രത്യേകതകളാണ്. എഴുത്ത്, സ്‌കെച്ചിങ്, പിഡിഎഫ് രേഖകളില്‍ കുറിപ്പുകള്‍ ചേര്‍ക്കല്‍ തുടങ്ങിയ ആവശ്യങ്ങള്‍ക്കായി പ്രോ പെനും കീബോര്‍ഡും പ്രത്യേകം വാങ്ങാം. 11 ഇഞ്ച് 2.5ഗ ഡിസ്പ്ലേയും 90Hz റിഫ്രഷ് റേറ്റുമുള്ള അലക്‌സ ടാബ്ലെറ്റ് 11 വിനോദത്തിനും ദൈനംദിന ജോലികള്‍ക്കുമായി രൂപകല്‍പ്പന ചെയ്തതാണ്. 8.7 ഇഞ്ച് ഡിസ്പ്ലേയും 329 ഗ്രാം ഭാരവുമുള്ള അലക്‌സ ടാബ്ലെറ്റ് 8 ആണ് ഏറ്റവും ഒതുക്കമുള്ള മോഡല്‍.

വോയ്സ് കമാന്‍ഡുകളിലൂടെയോ സ്‌ക്രീനിലെ ബട്ടണ്‍ ഉപയോഗിച്ചോ അലക്‌സ പ്ലസിനെ പ്രവര്‍ത്തിപ്പിക്കാം. ചോദ്യങ്ങള്‍ക്ക് മറുപടി നല്‍കുന്നതിനൊപ്പം അനുയോജ്യമായ സ്മാര്‍ട്ട് ഹോം ഉപകരണങ്ങള്‍ നിയന്ത്രിക്കാനും സ്‌ക്രീനിലുള്ള വിവരങ്ങള്‍ അടിസ്ഥാനമാക്കി സഹായം നല്‍കാനും ഇതിന് കഴിയും. കുട്ടികള്‍ക്കായി 8.7 ഇഞ്ച്, 11 ഇഞ്ച് വലുപ്പങ്ങളില്‍ പുതിയ കിഡ്‌സ് ടാബ്ലെറ്റുകളും ആമസോണ്‍ അവതരിപ്പിച്ചിട്ടുണ്ട്. കുട്ടികള്‍ക്ക് സ്വന്തം ശബ്ദം ഉപയോഗിച്ച് ചിത്രകഥകള്‍ സൃഷ്ടിക്കാനുള്ള സ്റ്റോറിബില്‍ഡര്‍ സംവിധാനവും മാതാപിതാക്കള്‍ക്ക് കുട്ടികളുടെ പഠനവും ഉപയോഗവും നിരീക്ഷിക്കാനുള്ള പുതുക്കിയ ഡാഷ്ബോര്‍ഡും ഇതിലുണ്ട്.

യുഎസില്‍ അലക്‌സ ടാബ്ലെറ്റ് 8-ന്റെ വില 229.99 ഡോളര്‍ (ഏകദേശം 22,218 രൂപ) മുതലാണ്. അലക്‌സ ടാബ്ലെറ്റ് 11-ന് 329.99 ഡോളറും (ഏകദേശം 31,879 രൂപ), അലക്‌സ ടാബ്ലെറ്റ് 12 പ്രോയ്ക്ക് 499.99 ഡോളറും (ഏകദേശം 48,302 രൂപ) മുതലാണ് വില. നാനോമാറ്റ് ഡിസ്പ്ലേയുള്ള 12 പ്രോ മോഡലിന് 549.99 ഡോളറാണ് വില. യുഎസ്, കാനഡ, മെക്സിക്കോ എന്നിവിടങ്ങളില്‍ ഒക്ടോബര്‍ 14 മുതല്‍ വിതരണം ആരംഭിക്കും. ചില യൂറോപ്യന്‍ രാജ്യങ്ങളില്‍ ഒക്ടോബര്‍ 19 മുതല്‍ ഇവ ലഭ്യമാകും. എന്നാല്‍ ഇന്ത്യയിലെ വിലയും ലഭ്യതയും കമ്പനി ഇതുവരെ പ്രഖ്യാപിച്ചിട്ടില്ല.