പതിറ്റാണ്ടുകളുടെ പാരമ്പര്യം അവസാനിപ്പിച്ച് ആപ്പിള്‍; മാക് പ്രോ ഇനി ഓര്‍മ്മ

കമ്പ്യൂട്ടിംഗ് ലോകത്തെ ഒരു ഇതിഹാസത്തിന് തിരശ്ശീല വീഴുന്നു. കരുത്തുറ്റ പ്രകടനത്തിന് പേരുകേട്ട 'മാക് പ്രോ' ആപ്പിള്‍ നിശബ്ദമായി പിന്‍വലിച്ചു. ഔദ്യോഗിക വെബ്‌സൈറ്റില്‍ നിന്നും ഈ കരുത്തന്‍ മെഷീനെ നീക്കം ചെയ്തതോടെ, പ്രൊഫഷണല്‍ കമ്പ്യൂട്ടിംഗിലെ ഒരു സുവര്‍ണ അധ്യായത്തിനാണ് അന്ത്യമായത്. ഇനി പുതിയ മാക് പ്രോ മോഡലുകള്‍ ഉണ്ടാകില്ലെന്ന് കമ്പനി സ്ഥിരീകരിച്ചിട്ടുണ്ട്. വലിയ പ്രഖ്യാപനങ്ങളൊന്നുമില്ലാതെ നടന്ന ഈ പിന്‍വാങ്ങല്‍ ആപ്പിള്‍ ആരാധകരെ അല്‍പം നിരാശരാക്കുന്നുണ്ടെങ്കിലും, ഇത് ആപ്പിളിന്റെ പുതിയ ചിപ്പ് യുഗത്തിലേക്കുള്ള പൂര്‍ണമായ മാറ്റത്തെയാണ് സൂചിപ്പിക്കുന്നത്.

വീഡിയോ എഡിറ്റര്‍മാര്‍, ഡെവലപ്പര്‍മാര്‍, ഡിസൈനര്‍മാര്‍ എന്നിവരുടെ വിശ്വസ്ത പങ്കാളിയായിരുന്നു മാക് പ്രോ. പ്രത്യേകിച്ച് 2019-ലെ 'ചീസ് ഗ്രേറ്റര്‍' ഡിസൈന്‍ അതിന്റെ അസാമാന്യമായ പവര്‍ കൊണ്ടും അപ്‌ഗ്രേഡ് ചെയ്യാനുള്ള സൗകര്യം കൊണ്ടും ഏറെ ശ്രദ്ധിക്കപ്പെട്ടിരുന്നു. എന്നാല്‍ ആപ്പിള്‍ സ്വന്തമായി 'സിലിക്കണ്‍ ചിപ്പുകള്‍' നിര്‍മ്മിക്കാന്‍ തുടങ്ങിയതോടെ മാക് പ്രോയുടെ പ്രസക്തി കുറഞ്ഞു. 2023-ല്‍ എം2 അള്‍ട്രാ ചിപ്പുമായി എത്തിയെങ്കിലും, വിലക്കൂടുതലും മറ്റ് ചെറിയ മെഷീനുകള്‍ നല്‍കുന്ന അതേ പ്രകടനവും മാക് പ്രോയെ പിന്നിലാക്കി.

മാക് പ്രോയ്ക്ക് പകരക്കാരനായി ഇപ്പോള്‍ വിപണി ഭരിക്കുന്നത് 'മാക് സ്റ്റുഡിയോ' ആണ്. വലിപ്പത്തില്‍ ചെറുതാണെങ്കിലും പ്രകടനത്തില്‍ മാക് പ്രോയെ വെല്ലുന്ന കരുത്ത് ഇതിനുണ്ട്. എം3 അള്‍ട്രാ പോലുള്ള ചിപ്പുകളുടെ വരവോടെ, കൂറ്റന്‍ വര്‍ക്ക്‌സ്റ്റേഷനുകളുടെ കാലം കഴിഞ്ഞുവെന്ന് ആപ്പിള്‍ തെളിയിച്ചു. നിലവില്‍ ഐമാക് 24-ഇഞ്ച്, മാക് മിനി, മാക് സ്റ്റുഡിയോ എന്നിവരടങ്ങുന്ന കൂടുതല്‍ വ്യക്തവും ലളിതവുമായ ഒരു ഡെസ്‌ക്ടോപ്പ് നിരയാണ് ആപ്പിളിനുള്ളത്. കൂടെ പുതിയ മാക്ബുക്ക് നിയോ കൂടി എത്തിയതോടെ ഉപയോക്താക്കള്‍ക്ക് ഓപ്ഷനുകള്‍ക്ക് കുറവില്ല.

ഹാര്‍ഡ്വെയറുകളെ സ്വന്തം ഇഷ്ടത്തിനനുസരിച്ച് മാറ്റാനും വളര്‍ത്താനും ആഗ്രഹിച്ചിരുന്ന പ്രൊഫഷണലുകള്‍ക്ക് മാക് പ്രോയുടെ വിടവാങ്ങല്‍ ഒരു തീരാനഷ്ടം തന്നെയാണ്. എങ്കിലും, ഒന്നിലധികം മാക്കുകളെ തമ്മില്‍ ബന്ധിപ്പിച്ച് വലിയ ജോലികള്‍ എളുപ്പത്തില്‍ തീര്‍ക്കാവുന്ന പുതിയ സോഫ്റ്റ്വെയര്‍ സാങ്കേതികവിദ്യകള്‍ ആപ്പിള്‍ അവതരിപ്പിച്ചു കഴിഞ്ഞു. ഒരു കാലഘട്ടത്തിന്റെ അടയാളമായിരുന്ന മാക് പ്രോ പടിയിറങ്ങുമ്പോള്‍, കൂടുതല്‍ വേഗതയുള്ളതും ഒതുക്കമുള്ളതുമായ ഭാവിയിലേക്കാണ് ആപ്പിള്‍ വിരല്‍ ചൂണ്ടുന്നത്.