ആപ്പിള്‍ പുറത്തിറക്കുന്നത് 85 ദശലക്ഷം ഐഫോണ്‍ 15 യൂണിറ്റുകള്‍

ആഗോള സാമ്പത്തിക പ്രതിസന്ധികള്‍ക്കിടയിലും ഐഫോണ്‍ നിര്‍മ്മാണം കുറയ്‌ക്കേണ്ടതില്ലെന്ന നിലപാടാണ് ആപ്പിള്‍ കമ്പനിയുടേതെന്ന് സൂചന. ഈ വര്‍ഷം ഏകദേശം 85 ദശലക്ഷം ഐഫോണ്‍ 15 യൂണിറ്റുകള്‍ നിര്‍മ്മിക്കാന്‍ Apple Inc. അതിന്റെ വിതരണക്കാരോട് അഭ്യര്‍ത്ഥിച്ചതായി റിപ്പോര്‍ട്ടുകള്‍ പുറത്തുവന്നിട്ടുണ്ട്. ഇത് മുന്‍വര്‍ഷം കമ്പനി വിപണനത്തിന് എത്തിച്ച ഫോണുകളുടെ എണ്ണത്തിന് സമാനമാണെന്ന് ബ്ലൂംബെര്‍ബ് പറയുന്നു.

ആഗോള സമ്പദ്വ്യവസ്ഥയിലെ പ്രക്ഷുബ്ധതയും മൊത്തത്തിലുള്ള സ്മാര്‍ട്ട്ഫോണ്‍ വിപണിയില്‍ പ്രതീക്ഷിക്കുന്ന ഇടിവും ഉണ്ടായിരുന്നിട്ടും, കാലിഫോര്‍ണിയ ആസ്ഥാനമായി പ്രവര്‍ത്തിക്കുന്ന ആപ്പിള്‍ iPhone 15 ന്റെ കയറ്റുമതിയിലെ സ്ഥിരത നിലനിര്‍ത്താനാണ് തീരുമാനിച്ചിരിക്കുന്നത്.

പ്രോ മോഡലുകളുടെ വില ഉയര്‍ത്താനും കമ്പനി ആലോചിക്കുന്നതായി ബ്ലൂംബെര്‍ഗ് പറയുന്നു. അതുവഴി മൊത്തത്തിലുള്ള വരുമാന വര്‍ധനവാണ് കമ്പനി ലക്ഷ്യമിടുന്നത്. എങ്കിലും ഇക്കാര്യങ്ങള്‍ ആപ്പിള്‍ സ്ഥിരീകരിച്ചിട്ടില്ല.

ലോകത്തിലെ ഏറ്റവും മൂല്യവത്തായ കമ്പനി എന്ന നിലയില്‍, ആപ്പിളിന്റെ സ്വാധീനം ആഗോള സമ്പദ്വ്യവസ്ഥയിലുടനീളം വ്യാപിക്കുന്നുണ്ട്. ഇത് ആയിരക്കണക്കിന് വിതരണക്കാരെ സ്വാധീനിക്കുകയും യുഎസ്, ചൈന, വിയറ്റ്‌നാം, ഇന്ത്യ തുടങ്ങിയ രാജ്യങ്ങളില്‍ ദശലക്ഷക്കണക്കിന് തൊഴിലവസരങ്ങള്‍ സൃഷ്ടിക്കുകയും ചെയ്യുന്നു. ഈ വര്‍ഷം അതിന്റെ ഓഹരികളില്‍ 50% കുതിച്ചുചാട്ടമാണ് ഉണ്ടായിട്ടുള്ളത്. ആപ്പിളിന്റെ വിപണി മൂലധനം ഇപ്പോള്‍ മൂന്ന് ട്രില്യണ്‍ ഡോളറിലെത്തിയിട്ടുണ്ട്.

വിലക്കയറ്റത്തിനും സാമ്പത്തിക അനിശ്ചിതത്വത്തിനും ഇടയില്‍ ഉപഭോക്താക്കളുടെ വാങ്ങലുകള്‍ വൈകുന്നത് ഇപ്പോള്‍ സ്മാര്‍ട്ട് ഫോണ്‍ വിപണിയിലും പ്രതിഫലിക്കുന്നുണ്ട്. ആപ്പിനും അതിന്റെ എതിരാളികള്‍ക്കും സ്മാര്‍ട്ട്ഫോണുകളും കമ്പ്യൂട്ടറുകളും ഉള്‍പ്പെടെയുള്ള ഇലക്ട്രോണിക്സിന്റെ വിപണിയില്‍ ഇടിവ് നേരിടുന്നതായി റിപ്പോര്‍ട്ട് വിശദീകരിക്കുന്നുണ്ട്. പണപ്പെരുപ്പത്തെ നിയന്ത്രിക്കുന്നതിനുള്ള നടപടിയുടെ ഭാഗമായി യുഎസില്‍ ഫെഡറല്‍ റിസര്‍വ് പലിശ നിരക്ക് പുതുക്കും എന്നവാര്‍ത്ത നിലവിലുണ്ട്. കൂടാതെ ലോകത്തിലെ രണ്ടാമത്തെ വലിയ സമ്പദ്വ്യവസ്ഥയായ ചൈനയുടെ സമ്പദ്വ്യവസ്ഥ രണ്ടാം പാദത്തില്‍ മാന്ദ്യത്തിലുമാണ്. ഈ സാഹചര്യത്തിലും ഉല്‍പ്പാദനം കുറയ്‌ക്കേണ്ടതില്ല എന്നാണ് കമ്പനിയുടെ തീരുമാനം.

ആപ്പിളിന്റെ ഈ ഉല്‍പ്പാദന ഷെഡ്യൂള്‍ ഏവരുടെയും ശ്രദ്ധ ആകര്‍ഷിക്കുന്നു. സാംസങ് ഇലക്ട്രോണിക്സ് കമ്പനി, തായ്വാന്‍ സെമികണ്ടക്ടര്‍ മാനുഫാക്ചറിംഗ് കമ്പനി, ഫോക്സ്‌കോണ്‍ ടെക്നോളജി ഗ്രൂപ്പ് എന്നിവ പോലുള്ള പ്രധാന കോര്‍പ്പറേഷനുകള്‍ അവരുടെ വളര്‍ച്ചയും ലാഭവും വര്‍ധിപ്പിക്കുന്നതിന് ഐഫോണ്‍ ബിസിനസിനെ ആശ്രയിക്കുന്നുണ്ട്.

ഈ വര്‍ഷം, CMOS ഇമേജ് സെന്‍സറുകളുമായി ബന്ധപ്പെട്ട തടസം കാരണം ആപ്പിളിന് വരാനിരിക്കുന്ന എന്‍ട്രി ലെവല്‍ സ്മാര്‍ട്ട്ഫോണുകളുടെ പ്രൊജക്ഷന്‍ ഏകദേശം രണ്ട് ദശലക്ഷം യൂണിറ്റുകള്‍ കുറയ്‌ക്കേണ്ടി വന്നു. എന്നിരുന്നാലും, ബ്ലൂംബെര്‍ഗില്‍ നിന്നുള്ള റിപ്പോര്‍ട്ട് അനുസരിച്ച്, ഉയര്‍ന്ന വിലയുള്ള പ്രോ മോഡലുകള്‍ക്കായി അധിക ഓര്‍ഡറുകള്‍ നല്‍കിക്കൊണ്ട് കമ്പനിക്ക് ഈ ഇടിവ് നികത്താന്‍ കഴിഞ്ഞു. പുതിയ ഐഫോണ്‍ സ്‌ക്രീനുകളില്‍ ഒരു ചെറിയ പ്രശ്നം റിപ്പോര്‍ട്ട് ചെയ്യപ്പെട്ടിട്ടുണ്ട്, എന്നാല്‍ ഇത് ഒന്നോ രണ്ടോ ആഴ്ചയ്ക്കുള്ളില്‍ പരിഹരിക്കപ്പെടുമെന്ന് പ്രതീക്ഷിക്കുന്നു. മാത്രമല്ല ഇത് മൊത്തത്തിലുള്ള ഉല്‍പ്പാദനത്തെ സാരമായി ബാധിക്കുമെന്ന് പ്രതീക്ഷിക്കുന്നില്ലെന്നും റിപ്പോര്‍ട്ട് പറയുന്നു.

കഴിഞ്ഞ രണ്ട് വര്‍ഷങ്ങളില്‍ നിശ്ചയിച്ചിട്ടുള്ള 90 ദശലക്ഷം കയറ്റുമതി ലക്ഷ്യത്തേക്കാള്‍ താഴെയാണ് ഈവര്‍ഷത്തെ ഉല്‍പ്പാദനം. 2021-ല്‍ ചിപ്പ് ക്ഷാമവും 2022-ല്‍ ചൈനയില്‍ കോവിഡ് നിയന്ത്രണങ്ങള്‍ വിപുലീകരിച്ചതും കാരണം കമ്പനിക്ക് ആ ലക്ഷ്യങ്ങള്‍ കൈവരിക്കാനായില്ല. ഇത് ഉല്‍പ്പാദന തടസങ്ങള്‍ക്ക് കാരണമായിരുന്നു.