Google Launches Dreambeans AI App in India : ഇന്ത്യയിൽ ഡ്രീംബീൻസ് AI ആപ്പ് അവതരിപ്പിച്ച് ഗൂഗിൾ; 14 ഭാഷകളിൽ വ്യക്തിഗത വാർത്തകളും സ്റ്റോറികളും

ഇന്ത്യയിലെ ഉപയോക്താക്കൾക്കായി പുതിയ ആർട്ടിഫിഷ്യൽ ഇന്റലിജൻസ് (AI) ആപ്പായ ഡ്രീംബീൻസ് അവതരിപ്പിച്ച് ഗൂഗിൾ. ഗൂഗിൾ ലാബ്‌സിന്റെ പരീക്ഷണാടിസ്ഥാനത്തിലുള്ള ഈ ആപ്ലിക്കേഷൻ ഉപയോക്താക്കളുടെ താൽപ്പര്യങ്ങൾക്കും മുൻഗണനകൾക്കും ദൈനംദിന പ്രവർത്തനങ്ങൾക്കും അനുസരിച്ച് വ്യക്തിഗത സ്റ്റോറി ശേഖരങ്ങൾ തയ്യാറാക്കി നൽകും. ആൻഡ്രോയിഡ്, ഐഒഎസ് പ്ലാറ്റ്‌ഫോമുകളിൽ 18 വയസ്സിന് മുകളിലുള്ളവർക്ക് ആപ്പ് ലഭ്യമാണ്.

വിവരങ്ങൾ അറിയുന്നതിനായി വിവിധ വെബ്‌സൈറ്റുകളിലും സോഷ്യൽ മീഡിയ പ്ലാറ്റ്‌ഫോമുകളിലും നിരന്തരം തിരയേണ്ട സാഹചര്യം ഒഴിവാക്കുകയാണ് ഡ്രീംബീൻസിന്റെ പ്രധാന ലക്ഷ്യം. ഓരോ ഉപയോക്താവിനും താൽപ്പര്യമുള്ള വിഷയങ്ങൾ കണ്ടെത്തി അവയെ അടിസ്ഥാനമാക്കി പ്രസക്തമായ ഉള്ളടക്കങ്ങൾ ആപ്പ് ഒരിടത്ത് ലഭ്യമാക്കും.

യാത്ര ചെയ്യാൻ അനുയോജ്യമായ സ്ഥലങ്ങൾ, കലയും കരകൗശലവുമായി ബന്ധപ്പെട്ട ആശയങ്ങൾ, പ്രാദേശിക പരിപാടികൾ, മറ്റ് രസകരമായ വിഷയങ്ങൾ എന്നിവയെക്കുറിച്ചുള്ള വിവരങ്ങൾ ഉപയോക്താക്കൾക്ക് ലഭിക്കും. താൽപ്പര്യമുള്ള സ്റ്റോറികൾ കൂടുതൽ വിശദമായി വായിക്കാനും പിന്നീട് കാണുന്നതിനായി സേവ് ചെയ്യാനും സുഹൃത്തുക്കളുമായി പങ്കുവെക്കാനും സൗകര്യമുണ്ട്.

എങ്ങനെയാണ് ഡ്രീംബീൻസ് പ്രവർത്തിക്കുന്നത്?

ഗൂഗിളിന്റെ വിവിധ സേവനങ്ങളുമായി ബന്ധിപ്പിച്ച് പ്രവർത്തിക്കാൻ കഴിയുന്നതാണ് ഡ്രീംബീൻസിന്റെ പ്രത്യേകത. ഗൂഗിൾ കലണ്ടർ, ജെമിനി, ജിമെയിൽ, ഗൂഗിൾ ഫോട്ടോസ്, ഗൂഗിൾ സെർച്ച്, യൂട്യൂബ് തുടങ്ങിയ സേവനങ്ങൾ ഉപയോക്താക്കൾക്ക് താൽപ്പര്യമുണ്ടെങ്കിൽ ആപ്പുമായി ബന്ധിപ്പിക്കാം.

ഇതിലൂടെ ലഭിക്കുന്ന വിവരങ്ങളുടെ അടിസ്ഥാനത്തിൽ ഉപയോക്താക്കളുടെ താൽപ്പര്യങ്ങൾക്കും ദൈനംദിന ജീവിതരീതികൾക്കും അനുയോജ്യമായ സ്റ്റോറികൾ തയ്യാറാക്കാൻ ആപ്പിന് സാധിക്കും. ഉപയോക്താക്കളുടെ അഭിപ്രായങ്ങളും പ്രതികരണങ്ങളും ഉൾപ്പെടുത്തി ഉള്ളടക്കങ്ങളുടെ പ്രസക്തി മെച്ചപ്പെടുത്താനും ഗൂഗിൾ ലക്ഷ്യമിടുന്നു.

14 ഇന്ത്യൻ ഭാഷകളിൽ ലഭ്യമാകും

ഇന്ത്യയിലെ ഭാഷാവൈവിധ്യം പരിഗണിച്ച് 14 ഭാഷകളിൽ ഡ്രീംബീൻസ് ലഭ്യമാക്കുന്നതും ശ്രദ്ധേയമാണ്. മലയാളം, ഹിന്ദി, ബംഗാളി, തെലുങ്ക്, മറാത്തി, തമിഴ്, ഉറുദു, ഗുജറാത്തി, കന്നഡ, ഒഡിയ, പഞ്ചാബി, അസമീസ് തുടങ്ങിയ ഭാഷകൾ ഇതിൽ ഉൾപ്പെടുന്നു.

ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവ വഴി ഡ്രീംബീൻസ് ഡൗൺലോഡ് ചെയ്യാം. നിർമിതബുദ്ധിയുടെ സഹായത്തോടെ വ്യക്തിഗത വിവരശേഖരണത്തിനും ഉള്ളടക്കങ്ങൾ കണ്ടെത്തുന്നതിനും പുതിയൊരു അനുഭവം നൽകുകയാണ് ഈ ആപ്പിലൂടെ ഗൂഗിൾ ലക്ഷ്യമിടുന്നത്.