Grok Releases AI-Generated Odyssey Film : ഗ്രോക്കിന്റെ എഐ ഒഡീസി വീഡിയോ പുറത്ത്; ചരിത്രപരമായ കൃത്യതയെച്ചൊല്ലി വിമർശനം

ചലച്ചിത്രനിർമാണ രംഗത്തേക്ക് ചുവടുവെച്ച് ഇലോൺ മസ്കിന്റെ ആർട്ടിഫിഷ്യൽ ഇന്റലിജൻസ് പ്ലാറ്റ്‌ഫോമായ ഗ്രോക്ക് (Grok). പുരാതന ഗ്രീക്ക് ഇതിഹാസമായ 'ദി ഒഡീസി'യെ ആസ്പദമാക്കി നിർമിച്ച ഏഴ് മിനിറ്റ് ദൈർഘ്യമുള്ള എഐ വീഡിയോയാണ് കമ്പനി പുറത്തുവിട്ടിരിക്കുന്നത്. ചരിത്രപരമായ കൃത്യതയ്ക്ക് പ്രാധാന്യം നൽകുന്ന മുഴുനീള ചിത്രം നിർമിക്കുമെന്ന് മൂന്ന് മാസം മുൻപ് മസ്ക് പ്രഖ്യാപിച്ചിരുന്നു. ഇതിന്റെ തുടർച്ചയായാണ് പുതിയ പരീക്ഷണം ശ്രദ്ധ നേടുന്നത്.

വരാനിരിക്കുന്ന പരമ്പരയിലെ ആദ്യ എപ്പിസോഡായാണ് ഈ വീഡിയോയെ കമ്പനി അവതരിപ്പിക്കുന്നത്. വണ്ടർ സ്റ്റുഡിയോസുമായും സംവിധായകൻ ദേവ് വാക്കറുമായും സഹകരിച്ച് ഗ്രോക്ക് ഇമാജിൻ (Grok Imagine) എന്ന എഐ ടൂൾ ഉപയോഗിച്ചാണ് ചിത്രം ഒരുക്കിയിരിക്കുന്നത്.

ട്രോജൻ യുദ്ധത്തിന് പുറപ്പെടാൻ തയ്യാറെടുക്കുന്ന ഗ്രീക്ക് നായകൻ ഒഡീസിയസാണ് വീഡിയോയിലെ പ്രധാന കഥാപാത്രം. യാത്രയ്ക്ക് ധൈര്യം പകരുന്ന ഭാര്യ പെനലോപ്പി, ആയോധന പരിശീലനം നടത്തുന്ന മകൻ ടെലിമാക്കസ്, കടലിലൂടെ നീങ്ങുന്ന ഗ്രീക്ക് കപ്പലുകൾ തുടങ്ങിയ രംഗങ്ങളും ഇതിലുണ്ട്. പ്രത്യേകിച്ച്, കടലിൽ സഞ്ചരിക്കുന്ന കപ്പലുകളുടെ ദൃശ്യങ്ങൾ യഥാർഥ ലൈവ്-ആക്ഷൻ സിനിമകളെ ഓർമിപ്പിക്കുന്ന തരത്തിലാണ് അവതരിപ്പിച്ചിരിക്കുന്നത്.

എന്നാൽ, ചരിത്രപരമായ കൃത്യത ഉറപ്പാക്കുമെന്ന മസ്കിന്റെ പ്രഖ്യാപനവുമായി ബന്ധപ്പെട്ട് വീഡിയോ വിമർശനങ്ങൾക്കും വഴിവെച്ചിട്ടുണ്ട്. പുരാതന ഗ്രീക്ക് പശ്ചാത്തലത്തിലുള്ള കഥാപാത്രങ്ങൾ സാധാരണ ബ്രിട്ടീഷ് ഉച്ചാരണത്തിൽ സംസാരിക്കുന്നുവെന്നാണ് ഉയരുന്ന പ്രധാന ആക്ഷേപം. വീഡിയോ ഗെയിമുകളിലെ കഥാപാത്രങ്ങളെ ഓർമിപ്പിക്കുന്ന അവതരണവും വിമർശകർ ചൂണ്ടിക്കാട്ടുന്നു.

പ്രശസ്ത ഹോളിവുഡ് സംവിധായകൻ ക്രിസ്റ്റഫർ നോളന്റെ 'ദി ഒഡീസി' ലൈവ്-ആക്ഷൻ പതിപ്പിനെക്കുറിച്ചുള്ള ചർച്ചകൾക്കിടെയാണ് ഗ്രോക്കിന്റെ എഐ ചിത്രം പുറത്തുവന്നിരിക്കുന്നത്. നോളന്റെ സിനിമയിലെ അഭിനേതാക്കളുടെ തിരഞ്ഞെടുപ്പിനെ മസ്ക് നേരത്തെ രൂക്ഷമായി വിമർശിച്ചിരുന്നു. ട്രാൻസ്‌ജെൻഡർ, വെള്ളക്കാരല്ലാത്ത അഭിനേതാക്കളെ ഉൾപ്പെടുത്തിയതിനെച്ചൊല്ലിയുള്ള വിവാദവും ഇതിന്റെ പശ്ചാത്തലത്തിലുണ്ട്. ഗ്രോക്കിന്റെ പതിപ്പിലെ കഥാപാത്ര രൂപകൽപ്പനയെയും ഈ സാഹചര്യത്തിൽ ചിലർ വിലയിരുത്തുന്നുണ്ട്.

അതേസമയം, സാങ്കേതിക മികവ് മാത്രം മികച്ച സിനിമയ്ക്ക് മതിയാകില്ലെന്നാണ് വീഡിയോയ്ക്കെതിരായ മറ്റൊരു വിമർശനം. കഥാപാത്രങ്ങളിൽ വികാരങ്ങളുടെ അഭാവം, മാനുഷിക സ്പർശമില്ലാത്ത അവതരണം, വിരസമായ അനുഭവം എന്നിവയാണ് പ്രേക്ഷകരിൽ ചിലർ ചൂണ്ടിക്കാട്ടുന്നത്.

എഐ ഉപയോഗിച്ച് സിനിമാനിർമാണം കൂടുതൽ എളുപ്പമാകുമ്പോഴും ചരിത്രപരമായ ആധികാരികതയും വൈകാരിക ആഴവും കലാപരമായ മികവും ഒരുപോലെ ഉറപ്പാക്കുക എന്നത് വലിയ വെല്ലുവിളിയായി തുടരുകയാണ്. ഗ്രോക്കിന്റെ ഈ പരീക്ഷണം എഐ സിനിമയുടെ സാധ്യതകളെക്കുറിച്ചുള്ള ചർച്ചകൾക്ക് പുതിയ തുടക്കമിടുമോ എന്നതാണ് ഇനി അറിയേണ്ടത്.