iPhone 18 Pro :ഐഫോൺ 18 പ്രോയും പ്രോ മാക്സും സെപ്റ്റംബറിൽ? ഡിസൈൻ, ക്യാമറ, ബാറ്ററിയിൽ വലിയ മാറ്റങ്ങൾ റിപ്പോർട്ട്

ആപ്പിളിന്റെ അടുത്ത തലമുറ സ്മാർട്ട്‌ഫോണുകളായ ഐഫോൺ 18 പ്രോയും ഐഫോൺ 18 പ്രോ മാക്സും ഈ വർഷം സെപ്റ്റംബറിൽ അവതരിപ്പിക്കുമെന്ന് റിപ്പോർട്ടുകൾ. ഔദ്യോഗിക പ്രഖ്യാപനത്തിന് ഇനിയും മാസങ്ങൾ ബാക്കി നിൽക്കുമ്പോഴും, പുതിയ ഐഫോൺ മോഡലുകളെക്കുറിച്ചുള്ള നിരവധി ലീക്കുകളും വിവരങ്ങളും ഇതിനകം ഓൺലൈനിൽ പ്രചരിക്കുകയാണ്.

റിപ്പോർട്ടുകൾ പ്രകാരം, ഐഫോൺ 18 സീരീസിൽ ഡിസൈൻ, ക്യാമറ, ബാറ്ററി തുടങ്ങി നിരവധി മേഖലകളിൽ വലിയ മാറ്റങ്ങൾ പ്രതീക്ഷിക്കപ്പെടുന്നു. പിന്‍ഭാഗത്ത് സുതാര്യ ഫിനിഷുള്ള പുതിയ ഡിസൈൻ, പുതുമയുള്ള നിറങ്ങൾ, കൂടുതൽ ശേഷിയുള്ള ബാറ്ററി എന്നിവ പ്രധാന ഹൈലൈറ്റുകളായി മാറാനിടയുണ്ട്.

ആപ്പിള്‍ ഇത്തവണ ഐഫോൺ 18 സീരീസ് രണ്ട് ഘട്ടങ്ങളിലായി പുറത്തിറക്കാൻ പദ്ധതിയിടുന്നുവെന്ന സൂചനകളും പുറത്തുവരുന്നുണ്ട്. പതിവുപോലെ സെപ്റ്റംബറിൽ ഐഫോൺ 18 പ്രോയും ഐഫോൺ 18 പ്രോ മാക്സും അവതരിപ്പിക്കപ്പെടാനാണ് സാധ്യത. ഇതോടൊപ്പം തന്നെ ഒരു ഫോൾഡബിൾ ഐഫോൺ മോഡലും പ്രഖ്യാപിക്കാമെന്ന അഭ്യൂഹങ്ങളും ടെക് ലോകത്ത് പ്രചരിക്കുന്നു.

സ്ക്രീൻ വലുപ്പത്തിൽ വലിയ മാറ്റമുണ്ടാകില്ലെന്നാണ് റിപ്പോർട്ടുകൾ. എന്നാൽ ഫേസ് ഐഡി സെൻസറുകൾ സ്ക്രീനിന് കീഴിലേക്ക് മാറ്റാനുള്ള ശ്രമങ്ങൾ നടക്കുന്നതായും, അതിലൂടെ ഡൈനാമിക് ഐലൻഡിന്റെ വലുപ്പം കുറയാനിടയുണ്ടെന്നും സൂചനകളുണ്ട്.

ക്യാമറ സംവിധാനത്തിലും ശ്രദ്ധേയമായ നവീകരണങ്ങൾ പ്രതീക്ഷിക്കപ്പെടുന്നു. പ്രത്യേകിച്ച് ഐഫോൺ 18 പ്രോ മാക്സ് മോഡലിൽ DSLR ക്യാമറകളിലേതുപോലെ വേരിയബിൾ അപ്രേച്ചർ സാങ്കേതികവിദ്യ ഉൾപ്പെടുത്താനിടയുണ്ടെന്നാണ് റിപ്പോർട്ടുകൾ. ഇത് വെളിച്ചത്തിന്റെ പ്രവേശനം കൂടുതൽ കൃത്യമായി നിയന്ത്രിച്ച് മികച്ച ഫോട്ടോയും വീഡിയോയും ലഭിക്കാൻ സഹായിക്കുമെന്ന് വിലയിരുത്തപ്പെടുന്നു.

ഇതിനൊപ്പം ബാറ്ററി ശേഷിയിലും കാര്യമായ പുരോഗതി ഉണ്ടാകുമെന്ന് ടെക് റിപ്പോർട്ടുകൾ സൂചിപ്പിക്കുന്നു. പുതിയ ചിപ്പ് സാങ്കേതികവിദ്യയും ഊർജക്ഷമതയും ചേർന്ന് ഐഫോൺ 18 സീരീസിൽ കൂടുതൽ ദൈർഘ്യമേറിയ ബാറ്ററി ലൈഫ് നൽകാനാണ് ആപ്പിളിന്റെ ശ്രമമെന്നാണു വിലയിരുത്തൽ.