Google Launches Nano Banana 2 : നാനോ ബനാന 2 അവതരിപ്പിച്ച് ഗൂഗിള്‍; ഇമേജ് എഐയില്‍ വന്‍ ചുവടുവെപ്പ്

ഗൂഗിളിന്റെ ഏറ്റവും പുതിയ എഐ ഇമേജ് സൃഷ്ടി-എഡിറ്റിങ് മോഡലായ നാനോ ബനാന 2 അവതരിപ്പിച്ചു. ജെമിനി ചാറ്റ്‌ബോട്ടിന്റെ ജനപ്രീതിയിൽ നിർണായക പങ്കുവഹിച്ച മുൻ പതിപ്പിന്റെ ശക്തികളെ കൂടുതൽ മെച്ചപ്പെടുത്തി ‘ജെമിനി 3.1 ഫ്‌ളാഷ് ഇമേജ്’ എന്ന പേരിലും ഈ മോഡൽ അറിയപ്പെടും.

വാക്കുകളെയും ആശയങ്ങളെയും അതിവേഗം യഥാർത്ഥ്യസമാനമായ ചിത്രങ്ങളാക്കി മാറ്റാൻ കഴിയുന്ന സൂപ്പർചാർജ്ഡ് ടൂളാണ് നാനോ ബനാന 2. ലളിതമായ നിർദ്ദേശങ്ങൾ നൽകിയാൽ പോലും അതിമനോഹരവും ഹൈ-റിസല്യൂഷൻ ചിത്രങ്ങളും നിർമ്മിക്കാൻ ഇതിന് കഴിയും. മുൻ പതിപ്പിലെ മികച്ച ഇമേജ് എഡിറ്റിങ് കഴിവുകൾക്കും, പ്രോ വേർഷന്റെ സ്റ്റുഡിയോ നിലവാരത്തിലുള്ള ഔട്ട്പുട്ടിനും ഒത്തുചേരുന്നതാണ് പുതിയ പതിപ്പ്.

നാനോ ബനാന 2-ന്റെ ഏറ്റവും ശ്രദ്ധേയമായ സവിശേഷതകളിലൊന്ന് മെച്ചപ്പെട്ട ക്രിയേറ്റീവ് കൺട്രോളാണ്. ഒരൊറ്റ വർക്ക്‌ഫ്ലോയിൽ അഞ്ച് കഥാപാത്രങ്ങളുടെ രൂപഭാവങ്ങളിൽ സ്ഥിരത നിലനിർത്താനും, ചിത്രത്തിലെ 14 വസ്തുക്കളുടെ വിശദാംശങ്ങൾ കൃത്യമായി സംരക്ഷിക്കാനും ഇതിന് സാധിക്കും. അതായത്, ഒരു ചിത്രകഥയോ കോമിക് സീരീസോ നിർമ്മിക്കുമ്പോൾ ഓരോ തവണ നിർദേശം നൽകിയാലും കഥാപാത്രങ്ങളുടെ മുഖഭാവത്തിലും പ്രധാന ഘടകങ്ങളിലും മാറ്റമില്ലാതെ സ്ഥിരത ഉറപ്പാക്കാം.

ഇതിനു പുറമെ, വെബിൽ നിന്നുള്ള തത്സമയ ലോകവിവരങ്ങൾ ഉൾപ്പെടുത്തി കൂടുതൽ ബുദ്ധിസാമർത്ഥ്യത്തോടെ ചിത്രങ്ങൾ സൃഷ്ടിക്കാനുള്ള കഴിവും ഈ മോഡലിനുണ്ട്. ഗൂഗിളിന്റെ ഏറ്റവും വേഗമേറിയ എഐ ഇമേജ് ജനറേഷൻ ടൂളായി നാനോ ബനാന 2 ശ്രദ്ധ നേടുകയാണ്.

ക്രിയേറ്റീവ് ഡിസൈനർമാർക്കും, സോഷ്യൽ മീഡിയ കണ്ടന്റ് ക്രിയേറ്റർമാർക്കും, മാർക്കറ്റിംഗ് രംഗത്തിനും ഇത് വലിയ സഹായമാകുമെന്നാണ് ടെക് വിദഗ്ധരുടെ വിലയിരുത്തൽ.