Instagram TV App : ഇന്‍സ്റ്റാഗ്രാം പ്രേമികള്‍ക്ക് സന്തോഷവാര്‍ത്ത: റീലുകള്‍ കാണാന്‍ ഇനി ഫോണ്‍ വേണ്ട, ഇന്‍സ്റ്റാഗ്രാം ടിവി ആപ്പ്

ഇന്‍സ്റ്റാഗ്രാം പ്രേമികള്‍ക്ക് സന്തോഷവാര്‍ത്ത. റീലുകള്‍ കാണാന്‍ ഇനി ഫോണ്‍ വേണമെന്നില്ല, ടിവി മതി. ഇതിനായി മെറ്റാ ഉടമസ്ഥതയിലുള്ള ഇന്‍സ്റ്റാഗ്രാം കമ്പനി റീല്‍സ് കേന്ദ്രീകരിച്ചുള്ള ഇന്‍സ്റ്റാഗ്രാം ടിവി ആപ്പ് ലോഞ്ച് ചെയ്യുന്നതായി പ്രഖ്യാപിച്ചു. തുടക്കത്തില്‍ ആമസോണ്‍ ഫയര്‍ ടിവിയില്‍ ലഭ്യമാകുന്ന ഈ ഫീച്ചര്‍ ഉപയോക്താക്കള്‍ക്ക് ഒരുമിച്ച് റീല്‍സ് കാണാനുള്ള അവസരം നല്‍കാനാണ് ലക്ഷ്യമിടുന്നത്. പുതിയ ഇന്റര്‍ഫേസുള്ള ഈ ആപ്പ് നിലവില്‍ പരീക്ഷണ ഘട്ടത്തിലാണ്.റീല്‍സ് കാഴ്ചാനുഭവത്തിന് ഇന്‍സ്റ്റാഗ്രാം ഇപ്പോള്‍ പുതിയൊരു വഴിത്തിരിവ് നല്‍കിയിരിക്കുകയാണ്. ഇതുവരെ മൊബൈലില്‍ സ്‌ക്രോള്‍ ചെയ്തിരുന്ന റീല്‍സ് ഉടന്‍ തന്നെ ടിവി സ്‌ക്രീനുകളിലും കാണാന്‍ കഴിയും.

യൂട്യൂബുമായി മത്സരം

കഴിഞ്ഞ കുറച്ച് മാസങ്ങളായി ഇന്‍സ്റ്റാഗ്രാമിന്റെ ടിവി ആപ്പിനെക്കുറിച്ച് ചര്‍ച്ചകള്‍ ഉണ്ടായിരുന്നു. ഇപ്പോള്‍ കമ്പനി അത് ഔദ്യോഗികമായി സ്ഥിരീകരിച്ചിരിക്കുകയാണ്. ടിവികളിലേക്ക് റീലുകള്‍ കൊണ്ടുവരുന്നതിലൂടെ ടെലിവിഷന്‍ മേഖലയില്‍ വലിയതോതില്‍ ആധിപത്യം പുലര്‍ത്തുന്ന യൂട്യൂബിനോട് മികച്ച രീതിയില്‍ മത്സരിക്കാന്‍ ഇന്‍സ്റ്റാഗ്രാമിന് കഴിയും.

റീൽസിന് മുൻതൂക്കം നൽകിയാണ് ഇന്‍സ്റ്റാഗ്രാം ടിവി ആപ്പ് പ്രത്യേകം രൂപകല്‍പ്പന ചെയ്തിരിക്കുന്നത്. സുഹൃത്തുക്കളുമായോ കുടുംബാംഗങ്ങളുമായോ റീല്‍സ് കാണുന്നത് കൂടുതല്‍ രസകരമാണെന്ന് ഉപയോക്താക്കളില്‍ നിന്ന് നിരന്തരം ഫീഡ്ബാക്ക് ലഭിക്കുന്നുണ്ടെന്ന് ഇന്‍സ്റ്റാഗ്രാം പറയുന്നു. അതുകൊണ്ടാണ് വലിയ സ്‌ക്രീനില്‍ റീല്‍സ് കാണുന്നതിനായി ടിവിക്കായി പ്രത്യേക ആപ്പ് തന്നെ ഇപ്പോൾ അവതരിപ്പിച്ചിരിക്കുന്നത്.