റീഷൂട്ട് ഇനി പഴങ്കഥ; സിനിമയെ മാറ്റിമറിക്കാന്‍ നെറ്റ്ഫ്‌ലിക്‌സ്, വിഷ്വല്‍ ഇഫക്റ്റുകളില്‍ വിപ്ലവം

കോടികള്‍ ചെലവഴിച്ച് ചിത്രീകരിച്ച സിനിമയിലെ ഒരു ആക്ഷന്‍ രംഗം എഡിറ്റിംഗ് ടേബിളില്‍ എത്തുമ്പോള്‍ വേണ്ടെന്നു തോന്നിയാല്‍ എന്തുചെയ്യും? ഒന്നുകില്‍ അത് നിലനിര്‍ത്തണം, അല്ലെങ്കില്‍ വന്‍തുക മുടക്കി വീണ്ടും ഷൂട്ട് ചെയ്യണം. എന്നാല്‍ ഇതിന്് വിപ്ലവകരമായ പരിഹാരവുമായി എത്തിയിരിക്കുകയാണ് നെറ്റ്ഫ്‌ലിക്‌സ്. VOID (Video Object and Interaction Deletion) എന്ന പുതിയ എഐ മോഡലിലൂടെ സിനിമ നിര്‍മ്മാണത്തിന്റെ ഭാവി തന്നെ മാറ്റിമറിക്കാനാണ് നെറ്റ്ഫ്‌ലിക്‌സ് ഒരുങ്ങുന്നത്. വീഡിയോകളില്‍ നിന്ന് വസ്തുക്കളെ അപ്രത്യക്ഷമാക്കാനും, ആ മാറ്റത്തിനനുസരിച്ച് ദൃശ്യങ്ങളെ ബുദ്ധിപരമായി പുനര്‍നിര്‍മ്മിക്കാനും ഈ സാങ്കേതികവിദ്യയ്ക്ക് കഴിയും.

ഒരു ഉദാഹരണത്തിലൂടെ ഇതിന്റെ കരുത്ത് വ്യക്തമാക്കാം. ഒരു കാര്‍ ട്രക്കിലിടിച്ച് തകരുന്ന വമ്പിച്ച ചെലവുള്ള ഒരു രംഗം സങ്കല്‍പ്പിക്കുക. പുതിയ സാങ്കേതികവിദ്യ ഉപയോഗിച്ച് ആ ട്രക്കിനെ പൂര്‍ണ്ണമായും മായ്ച്ചു കളയാം. ട്രക്ക് അവിടെ ഉണ്ടായിരുന്നില്ലെന്ന മട്ടില്‍ കാര്‍ സുഗമമായി ഓടിച്ചുപോകുന്ന മറ്റൊരു പതിപ്പ് നിമിഷങ്ങള്‍ക്കുള്ളില്‍ സൃഷ്ടിക്കപ്പെടും. കേവലം മായ്ച്ചു കളയുക എന്നതിലുപരി, ഒരു വസ്തു മാറുമ്പോള്‍ ചുറ്റുമുള്ള സാഹചര്യങ്ങള്‍ (വെളിച്ചം, നിഴല്‍, ചലനം) എങ്ങനെ മാറണമെന്ന് ഈ എഐ കൃത്യമായി മനസ്സിലാക്കുന്നു. ഒരാള്‍ കുളത്തിലേക്ക് ചാടുമ്പോഴുണ്ടാകുന്ന വെള്ളത്തിന്റെ ഓളങ്ങള്‍ പോലും ബാക്കി വെക്കാതെ ആ വ്യക്തിയെ ദൃശ്യത്തില്‍ നിന്ന് നീക്കം ചെയ്യാന്‍ ഇതിന് സാധിക്കും.

വിഷന്‍-ലാംഗ്വേജ് മോഡല്‍ (VLM) ആര്‍ക്കിടെക്ചറില്‍ അധിഷ്ഠിതമായ ഈ മോഡല്‍, നിലവിലുള്ള എഡിറ്റിംഗ് ഉപകരണങ്ങളെക്കാള്‍ ബഹുദൂരം മുന്നിലാണ്. റണ്‍വേ, പ്രോപെയിന്റര്‍ തുടങ്ങിയ വിപണിയിലെ വമ്പന്മാരുമായി താരതമ്യം ചെയ്യുമ്പോള്‍, 65 ശതമാനം ആളുകളും VOIDന്റെ ഫലങ്ങളാണ് മികച്ചതെന്ന് സാക്ഷ്യപ്പെടുത്തുന്നു. ഭൗതികമായി വിശ്വസനീയമായ രീതിയില്‍ ദൃശ്യങ്ങളെ പുനര്‍നിര്‍മ്മിക്കാനുള്ള കഴിവാണിതിന് ഈ മുന്‍തൂക്കം നല്‍കുന്നത്. നെറ്റ്ഫ്‌ലിക്‌സിലെ ഗവേഷകരും അക്കാദമിക് വിദഗ്ധരും സംയുക്തമായാണ് ഇത് വികസിപ്പിച്ചെടുത്തത്.

ഹോളിവുഡ് സ്റ്റുഡിയോകള്‍ മുതല്‍ സ്വതന്ത്ര സിനിമാ പ്രവര്‍ത്തകര്‍ക്ക് വരെ ഈ സാങ്കേതികവിദ്യ വലിയ അനുഗ്രഹമാകും. ചെലവേറിയ റീഷൂട്ടുകള്‍ ഒഴിവാക്കാനും പ്രൊഡക്ഷന്‍ ജോലികള്‍ വേഗത്തില്‍ പൂര്‍ത്തിയാക്കാനും ഇതിലൂടെ സാധിക്കും. വിഷ്വല്‍ ഇഫക്റ്റുകള്‍ക്കായി ചെലവാകുന്ന ഭീമമായ തുക കുറയുന്നതോടെ സാധാരണക്കാരായ സ്രഷ്ടാക്കള്‍ക്കും ഉയര്‍ന്ന നിലവാരമുള്ള സിനിമകള്‍ നിര്‍മ്മിക്കാനുള്ള വാതില്‍ തുറക്കപ്പെടും. നിലവില്‍ ഹഗ്ഗിംഗ് ഫേസ് പ്ലാറ്റ്ഫോമില്‍ ഈ സാങ്കേതികവിദ്യ ലഭ്യമാക്കിയിട്ടുണ്ട്. ഇത് സിനിമാ ലോകത്ത് പുതിയൊരു പരീക്ഷണ കാലഘട്ടത്തിന് തുടക്കം കുറിക്കും.