ഇന്ത്യയിലെ ആദ്യത്തെ സ്‌റ്റോറുമായി നത്തിംഗ്; നറുക്കുവീണത് ബെംഗളൂരുവിന്

ലണ്ടന്‍ ആസ്ഥാനമായുള്ള കണ്‍സ്യൂമര്‍ ടെക്‌നോളജി ബ്രാന്‍ഡായ നത്തിംഗ് ഇന്ത്യയിലെ ആദ്യത്തെ ഫ്ലാഗ്ഷിപ്പ് സ്റ്റോര്‍ ബെംഗളൂരുവില്‍ ആരംഭിച്ചു.രണ്ട് നിലകളിലായി 5,000 ചതുരശ്ര അടി വിസ്തൃതിയുള്ള ഈ സ്റ്റോര്‍, ലണ്ടനിലെ ഔട്ട്‌ലെറ്റിനേക്കാള്‍ വലുതാണ്. ഇത് കമ്പനിയുടെ ആഗോള വിപുലീകരണ തന്ത്രത്തില്‍ ഇന്ത്യയുടെ പ്രാധാന്യം അടിവരയിടുന്നു.

സ്റ്റോറില്‍ നത്തിംഗിന്റെ മുഴുവന്‍ ഉല്‍പ്പന്ന നിരയും, അതിന്റെ സ്പിന്‍-ഓഫ് ബ്രാന്‍ഡായ സിഎംഎഫിന്റെ ഉല്‍പ്പന്നങ്ങളും പ്രദര്‍ശിപ്പിക്കുന്നു. കമ്മ്യൂണിറ്റി അധിഷ്ഠിത ഇടമായി രൂപകല്‍പ്പന ചെയ്തിരിക്കുന്നതിനാല്‍, സന്ദര്‍ശകര്‍ക്ക് ഉല്‍പ്പന്നങ്ങള്‍ നേരിട്ട് പരീക്ഷിക്കാനും അനുഭവിക്കാനും അവസരമുണ്ട്.

ഒരു നത്തിംഗ് ഉല്‍പ്പന്നം വാങ്ങുന്നവര്‍ക്ക് അവരുടെ പേരോടുകൂടിയ ടീ-ഷര്‍ട്ട് ലഭിക്കും. കൂടാതെ, പുതിയ ഫോണുകളുടെ അണ്‍ബോക്‌സിംഗ് റെക്കോര്‍ഡ് ചെയ്യാന്‍ പ്രൊഫഷണല്‍ സ്റ്റുഡിയോയും ഒരുക്കിയിട്ടുണ്ട്.

ബെംഗളൂരു ഇപ്പോള്‍ നത്തിംഗിന്റെ ഇന്ത്യയിലെ ഏറ്റവും വലിയ വിപണി ആയി മാറിയിട്ടുണ്ട്. അതിനാല്‍ തന്നെ ഈ നഗരത്തില്‍ ഫ്ലാഗ്ഷിപ്പ് ലോഞ്ച് നടത്തുന്നത് സ്വാഭാവികമായ തിരഞ്ഞെടുപ്പായിരുന്നു. കമ്പനി അടുത്തിടെ ന്യൂയോര്‍ക്കിലും ടോക്കിയോയിലും സ്റ്റോറുകള്‍ ആരംഭിക്കാന്‍ പദ്ധതിയിടുന്നുണ്ട്. ബെംഗളൂരുവിലെ ഈ ഔട്ട്‌ലെറ്റ്, നത്തിംഗിന്റെ ആഗോള റീട്ടെയില്‍ യാത്രയുടെ തുടക്കമായി മാറുകയാണ്.