Login 
പഠിക്കാം & സമ്പാദിക്കാം 
Home
9 Nov 2026 11:33 AM IST
Summary
ജെന്‍സെനെക്കുറിച്ചും എന്‍വിഡിയയുടെ ചൈന തന്ത്രത്തെക്കുറിച്ചും വിവരങ്ങള്‍ ശേഖരിക്കാന്‍ ആലീസ് ഹുവാങ്ങിനെ നിയോഗിച്ചു എന്നാണ് യുഎസ് ഇന്റലിജന്‍സ് ഉദ്യോഗസ്ഥര്‍ വിശ്വസിക്കുന്നത്
ലോകത്തിലെ ഏറ്റവും വിലപ്പെട്ട എഐ ചിപ്പ് കമ്പനിയുടെ മേധാവി ജെന്‍സെന്‍ ഹുവാങ് ഇന്ന് ലോകം മുഴുവന്‍ ചര്‍ച്ച ചെയ്യുന്ന ഒരു പേരാണ്. ഒരു സ്വകാര്യ ബന്ധം, ഒരു സംശയാസ്പദമായ ചാരവനിത, പിന്നില്‍ ചൈനീസ് ഇന്റലിജന്‍സ് എന്ന ആരോപണം - ഇതോടെ എന്‍വിഡിയയുടെ ഭാവി തന്നെ ചോദ്യചിഹ്നത്തിലായി. ഞായറാഴ്ച (Nov 8) ജെന്‍സെന്‍ തന്റെ ജീവനക്കാര്‍ക്ക് അയച്ച ഇമെയിലില്‍ ഇങ്ങനെ എഴുതി: 'ഞാന്‍ എന്റെ ഭാര്യയോട് വിശ്വസ്തതയില്ലാതെ പെരുമാറി. എന്റെ പ്രവൃത്തികള്‍ അവള്‍ക്കും ഞങ്ങളുടെ മക്കള്‍ക്കും വേദനയുണ്ടാക്കി. ഞാന്‍ ചെയ്തതിന് യാതൊരു ന്യായീകരണവുമില്ല. എനിക്ക് അതിയായ ഖേദമുണ്ട്'. അതേ ദിവസം തന്നെ എന്‍വിഡിയ ബോര്‍ഡ് സ്വതന്ത്ര അന്വേഷണം പ്രഖ്യാപിച്ചു. അയാള്‍ ഇമെയിലില്‍ ആരുടെയും പേര് പറഞ്ഞില്ല, പക്ഷേ ബോര്‍ഡിനോട് ആലീസുമായുള്ള ബന്ധം സമ്മതിച്ചതായാണ് റിപ്പോര്‍ട്ട്.
ആരാണ് ആലീസ് ഹുവാങ്?
സിംഗപ്പൂര്‍ ആസ്ഥാനമായ മെഗാസ്പീഡിന്റെ മുന്‍ സീനിയര്‍ എക്‌സിക്യൂട്ടീവാണ് ആലീസ് ഹുവാങ് എന്ന ഹുവാങ് ലെ. ജെന്‍സെന്‍ ഹുവാങ്ങുമായി രക്തബന്ധമില്ല. ന്യൂയോര്‍ക്ക് ടൈംസിന്റെ റിപ്പോര്‍ട്ട് പ്രകാരം, യുഎസ് ഇന്റലിജന്‍സ് ഉദ്യോഗസ്ഥര്‍ അവരെ ചൈനയുടെ മിനിസ്ട്രി ഓഫ് സ്റ്റേറ്റ് സെക്യൂരിറ്റി റിക്രൂട്ട് ചെയ്ത ഇന്റലിജന്‍സ് അസറ്റ് ആയാണ് കാണുന്നത്. ജെന്‍സെനെക്കുറിച്ചും എന്‍വിഡിയയുടെ ചൈന തന്ത്രത്തെക്കുറിച്ചും വിവരങ്ങള്‍ ശേഖരിക്കാന്‍ അവരെ നിയോഗിച്ചു എന്നാണ് യുഎസ് ഇന്റലിജന്‍സ് ഉദ്യോഗസ്ഥര്‍ വിശ്വസിക്കുന്നത്. മെഗാസ്പീഡിന്റെ മലേഷ്യന്‍ കമ്പനി 2024 ജൂണ്‍ മുതല്‍ 2026 ഫെബ്രുവരി വരെ എന്‍വിഡിയ ചിപ്പുകള്‍ അടങ്ങിയ $4.8 ബില്യണ്‍ ഡോളറിന്റെ എഐ ഉപകരണങ്ങള്‍ വാങ്ങിയതും അന്വേഷണത്തില്‍ നിര്‍ണായകമായി. എന്നാല്‍, ഇതുവരെ ആലീസിനെതിരെ ഔദ്യോഗിക കുറ്റാരോപണമോ അറസ്റ്റോ ഉണ്ടായിട്ടില്ല എന്നത് ശ്രദ്ധേയമാണ്.
ജെന്‍സെന്‍ അറിഞ്ഞിരുന്നോ? ബോര്‍ഡ് പറയുന്നത് എന്ത്?
യുഎസ് ഉദ്യോഗസ്ഥര്‍ തന്നെ വിശ്വസിക്കുന്നത് ജെന്‍സെന്‍ ഹുവാങ് അവരുടെ ചാരപ്രവര്‍ത്തനത്തെക്കുറിച്ച് അറിഞ്ഞിരുന്നില്ല എന്നാണ്. മാത്രമല്ല, അയാള്‍ക്ക് യുഎസ് സര്‍ക്കാര്‍ Defensive Briefing പോലും നല്‍കിയിരുന്നില്ല - അതായത് 'നിങ്ങള്‍ ചാരന്റെ ലക്ഷ്യമാണ്' എന്ന മുന്നറിയിപ്പ് പോലും കിട്ടിയില്ല. ട്രംപിന് ഈ വിവരം ഏകദേശം ഒരു വര്‍ഷം മുമ്പ് തന്നെ ബ്രീഫ് ചെയ്തിരുന്നുവെന്നും അദ്ദേഹം അന്ന് നടപടിയെടുത്തില്ലെന്നും റിപ്പോര്‍ട്ടുണ്ട്. എന്‍വിഡിയ ബോര്‍ഡ് പറയുന്നത്: 'ദേശീയ സുരക്ഷയോ കമ്പനി രഹസ്യങ്ങളോ ചോര്‍ന്നതായി വിശ്വസിക്കാന്‍ കാരണമില്ല' എന്നാണ്.
ഇനി എന്ത് സംഭവിക്കും? നവംബര്‍ 18 നിര്‍ണായകം!
യുഎസ് കോണ്‍ഗ്രസിലെ മൂന്ന് കമ്മിറ്റി ചെയര്‍മാന്‍മാര്‍ - ബ്രയാന്‍ മാസ്റ്റ്, ജോണ്‍ മൂലെനാര്‍, റിക്ക് ക്രോഫോര്‍ഡ് - ജെന്‍സെനോട് നവംബര്‍ 18-ന് അടച്ചിട്ട മുറിയില്‍ വിശദീകരണം നല്‍കാന്‍ ആവശ്യപ്പെട്ടിട്ടുണ്ട്. നവംബര്‍ 11-നകം മറുപടി നല്‍കണം. നവംബര്‍ 17-ന് എന്‍വിഡിയയുടെ ക്വാര്‍ട്ടര്‍ ഫലവും വരുന്നു. ചൈന ആരോപണം 'അടിസ്ഥാനരഹിതമായ അപവാദം' എന്ന് തള്ളി. സിംഗപ്പൂര്‍ വാള്‍സ്ട്രീറ്റ് ജേണല്‍ റിപ്പോര്‍ട്ട് നിഷേധിച്ചെങ്കിലും, വേറെ ഒരു അന്വേഷണം നടക്കുന്നുണ്ടെന്ന് സിംഗപ്പൂര്‍ പോലീസ് സ്ഥിരീകരിച്ചു. ആരോപണങ്ങള്‍ ഇതുവരെ തെളിയിക്കപ്പെട്ടില്ല, ആര്‍ക്കെതിരെയും കുറ്റാരോപണവും ഇല്ല എന്നത് ശ്രദ്ധേയമാണ്.