OnePlus Nord 6 Set for April Launch : വമ്പൻ 9,000mAh ബാറ്ററിയുമായി വൺപ്ലസ് നോർഡ് 6 ഏപ്രിലിൽ; മിഡ്-റേഞ്ച് വിപണിയെ കുലുക്കാൻ വരുന്നു

സ്മാർട്ട്‌ഫോൺ ആരാധകരെ ആവേശത്തിലാഴ്ത്തുന്ന പുതിയ മോഡലുമായി OnePlus വീണ്ടും വിപണിയിൽ എത്താൻ ഒരുങ്ങുന്നു. മിഡ്-റേഞ്ച് സെഗ്മെന്റിൽ വലിയ മാറ്റം സൃഷ്ടിക്കുമെന്ന് കരുതുന്ന വൺപ്ലസ് നോർഡ് 6 ഏപ്രിൽ അവസാനത്തോടെ വിപണിയിൽ എത്തുമെന്നാണ് റിപ്പോർട്ടുകൾ. മാർച്ചിൽ ലോഞ്ച് പ്രതീക്ഷിച്ചിരുന്നെങ്കിലും, ഇപ്പോൾ ഏപ്രിലിലാണ് ഔദ്യോഗിക പ്രഖ്യാപനം ഉണ്ടാകുമെന്ന് സൂചന.

ഫോണിന്റെ ഏറ്റവും ശ്രദ്ധേയമായ സവിശേഷത 9,000mAh ബാറ്ററി ആകാമെന്നതാണ്. ഈ ബാറ്ററിയോടൊപ്പം 80W വയർഡ് ഫാസ്റ്റ് ചാർജിംഗും 27W റിവേഴ്‌സ് ചാർജിംഗും ലഭിക്കുമെന്നാണ് ലീക്കുകൾ സൂചിപ്പിക്കുന്നത്. കൂടാതെ Turbo 6 സാങ്കേതികവിദ്യയും ഫോണിൽ ഉൾപ്പെടാം.

പ്രകടനക്ഷമതയുടെ കാര്യത്തിൽ ക്വാൽകോം സ്‌നാപ്ഡ്രാഗൺ 8s ജെൻ 4 ചിപ്‌സെറ്റാണ് ഫോണിന് കരുത്തേകുക എന്നാണ് റിപ്പോർട്ടുകൾ. ക്യാമറ വിഭാഗത്തിൽ 50MP പ്രധാന ക്യാമറയും 2MP സെക്കൻഡറി ക്യാമറയും ഉൾപ്പെട്ട ഡ്യുവൽ ക്യാമറ സജ്ജീകരണം ലഭിക്കുമെന്നാണ് പ്രതീക്ഷ.

ഡിസ്‌പ്ലേയുടെ കാര്യത്തിലും ഫോൺ ശ്രദ്ധ നേടും. 6.78 ഇഞ്ച് AMOLED ഡിസ്പ്ലേയും 165Hz വരെ റിഫ്രഷ് റേറ്റും ഫോണിൽ ഉണ്ടായേക്കും. ഇതോടെ ഗെയിമിംഗിനും മൾട്ടിമീഡിയ അനുഭവത്തിനും മികച്ച പ്രകടനം നൽകുന്ന മിഡ്-റേഞ്ച് ഫോണായി ഇത് മാറും.

എങ്കിലും 9,000mAh ബാറ്ററി ശേഷി യഥാർത്ഥത്തിൽ ലഭിക്കുമോയെന്ന കാര്യത്തിൽ ഇപ്പോഴും ചില സംശയങ്ങൾ നിലനിൽക്കുന്നു. ഔദ്യോഗിക ലോഞ്ചിന് ശേഷമേ ഇതിൽ വ്യക്തത ലഭിക്കൂ.

വില സംബന്ധിച്ച വിവരങ്ങൾ അനുസരിച്ച്, റാം-സ്റ്റോറേജ് ചിപ്പുകളുടെ വില വർധിച്ചതിനെ തുടർന്ന് വൺപ്ലസ് നോർഡ് 5 സീരീസിനെ അപേക്ഷിച്ച് വൺപ്ലസ് നോർഡ് 6-ന് ഉയർന്ന ലോഞ്ച് വില പ്രതീക്ഷിക്കാം. ഇന്ത്യയിൽ 31,000 മുതൽ 36,000 രൂപ വരെ വിലയാകാമെന്നാണ് സൂചന. എന്നാൽ ഇതിലും ഔദ്യോഗിക സ്ഥിരീകരണം ലഭിക്കാനുണ്ട്.