Login 
പഠിക്കാം & സമ്പാദിക്കാം 
Home
27 Feb 2026 4:39 PM IST
ഡിസ്നിയെ വീഴ്ത്താന് സൂപ്പര് സഖ്യം; വാര്ണര് ബ്രദേഴ്സിനെ സ്വന്തമാക്കി പാരാമൗണ്ട്-സ്കൈഡാന്സ്
MyFin Desk
Summary
അപ്രതീക്ഷിതമായി ചര്ച്ചകളില് നിന്ന് പിന്മാറിയതാണ് പാരാമൗണ്ട് സഖ്യത്തിന് വഴി എളുപ്പമാക്കിയത്. തങ്ങളുടെ നിലവിലുള്ള ലാഭക്ഷമത നിലനിര്ത്തുന്നതാണ് ബുദ്ധിയെന്ന് നെറ്റ്ഫ്ലിക്സ് നേതൃത്വം തീരുമാനിക്കുകയായിരുന്നു. ലേലം യാഥാര്ത്ഥ്യമാകാന് വാര്ണര് ബ്രദേഴ്സ് ബോര്ഡ് നെറ്റ്ഫ്ലിക്സ് കരാര് അവസാനിപ്പിച്ച് പാരാമൗണ്ട് സ്കൈഡാന്സിന്റെ ഓഫര് ഇനി സ്വീകരിക്കേണ്ടതുണ്ട്
ഹോളിവുഡിന്റെ ചരിത്രം മാറ്റിക്കുറിച്ചുകൊണ്ട് മാസങ്ങള് നീണ്ട ലേല യുദ്ധങ്ങള്ക്കൊടുവില് വാര്ണര് ബ്രദേഴ്സ് ഡിസ്കവറിയെ പാരാമൗണ്ട്-സ്കൈഡാന്സ് സഖ്യം സ്വന്തമാക്കി. ബോര്ഡ് റൂമുകളിലെ നാടകീയ നീക്കങ്ങള്ക്കൊടുവില് ഡേവിഡ് എല്ലിസന്റെ നേതൃത്വത്തിലുള്ള സ്കൈഡാന്സ് ഗ്രൂപ്പാണ് ഈ വിനോദ സാമ്രാജ്യത്തിന്റെ അധിപരായത്. ഇതോടെ ഡിസി സൂപ്പര് ഹീറോകളും, എച്ച്ബിഒ പ്രീമിയം കണ്ടന്റുകളും, പാരാമൗണ്ടിന്റെ ആക്ഷന് ഹിറ്റുകളും ഒരൊറ്റ കുടക്കീഴില് അണിനിരക്കും. ആഗോള വിനോദ വിപണിയിലെ ഡിസ്നിയുടെ കുത്തക അവസാനിപ്പിക്കാന് കെല്പ്പുള്ള ഒരു പടുകൂറ്റന് 'മീഡിയ ടൈറ്റന്' ആണ് ഇതിലൂടെ പിറവിയെടുത്തിരിക്കുന്നത്.
വാര്ണര് ബ്രദേഴ്സ് ഡിസ്കവറിയുടെ ലേലത്തില് നിന്ന് പിന്മാറുകയാണെന്ന് നെറ്റ്ഫ്ലിക്സ് റോയിട്ടേഴ്സിനോട് സ്ഥിരീകരിച്ചു .ലേലം യാഥാര്ത്ഥ്യമാകാന് വാര്ണര് ബ്രദേഴ്സ് ബോര്ഡ് നെറ്റ്ഫ്ലിക്സ് കരാര് അവസാനിപ്പിച്ച് പാരാമൗണ്ട് സ്കൈഡാന്സിന്റെ ഓഫര് സ്വീകരിക്കേണ്ടതുണ്ട്.
വാര്ണര് ബ്രദേഴ്സിനെ സ്വന്തമാക്കാന് മുന്നിരയിലുണ്ടായിരുന്ന നെറ്റ്ഫ്ലിക്സ് അപ്രതീക്ഷിതമായി ചര്ച്ചകളില് നിന്ന് പിന്മാറിയതാണ് പാരാമൗണ്ട് സഖ്യത്തിന് വഴി എളുപ്പമാക്കിയത്. കടബാധ്യതയുള്ള ഒരു വലിയ ലയനത്തിന് പണം ഒഴുക്കുന്നതിനേക്കാള് തങ്ങളുടെ നിലവിലുള്ള ലാഭക്ഷമത നിലനിര്ത്തുന്നതാണ് ബുദ്ധിയെന്ന് നെറ്റ്ഫ്ലിക്സ് നേതൃത്വം തീരുമാനിക്കുകയായിരുന്നു. ഈ 'സാമ്പത്തിക വിവേകം' വിപണിയില് വലിയ ചലനമുണ്ടാക്കി. നെറ്റ്ഫ്ലിക്സ് പിന്മാറിയ വാര്ത്ത പുറത്തുവന്നതോടെ കമ്പനിയുടെ ഓഹരി വിലയില് വലിയ കുതിച്ചുചാട്ടമാണ് ഉണ്ടായത്. ലയനത്തിന്റെ നൂലാമാലകളില് കുടുങ്ങാതെ സ്വന്തം സാമ്രാജ്യം കാത്തുസൂക്ഷിക്കാനാണ് സ്ട്രീമിംഗ് രാജാവായ നെറ്റ്ഫ്ലിക്സിന്റെ പ്ലാന്.
പുതിയ കമ്പനിയുടെ രൂപീകരണത്തോടെ സ്ട്രീമിംഗ് ലോകത്ത് വന് ഏകീകരണം നടക്കുമെന്നാണ് റിപ്പോര്ട്ടുകള്. നിലവിലുള്ള മാക്സ്, പാരാമൗണ്ട് പ്ലസ് എന്നീ പ്ലാറ്റ്ഫോമുകള് ലയിപ്പിച്ച് ഒരൊറ്റ 'പവര്ഹൗസ്' സ്ട്രീമിംഗ് ആപ്പായി മാറാന് സാധ്യതയുണ്ട്. ഉപഭോക്താക്കള്ക്ക് കൂടുതല് കണ്ടന്റുകള് ഒരിടത്ത് തന്നെ ലഭ്യമാക്കാനും സബ്സ്ക്രിപ്ഷന് കൊഴിഞ്ഞുപോക്ക് തടയാനും ഈ നീക്കം സഹായിക്കും. സ്പോര്ട്സ്, വാര്ത്തകള്, സിനിമകള് എന്നിങ്ങനെ വിനോദത്തിന്റെ എല്ലാ മേഖലകളെയും നിയന്ത്രിക്കുന്ന ഒരു വമ്പന് ശൃംഖലയായി ഇത് മാറും.
ഹോളിവുഡിലെ ഈ വമ്പന് മാറ്റം കണ്ടന്റ് നിര്മ്മാണ മേഖലയിലും വിപ്ലവം സൃഷ്ടിക്കും. പരമ്പരാഗതമായ സിനിമാ നിര്മ്മാണ രീതികളും ആധുനിക സ്ട്രീമിംഗ് സാങ്കേതികവിദ്യയും ഒത്തുചേരുന്നതോടെ പ്രേക്ഷകര്ക്ക് ലഭിക്കുന്നത് മുന്പെങ്ങുമില്ലാത്ത ദൃശ്യവിരുന്നായിരിക്കും. ഡിസ്നിയും നെറ്റ്ഫ്ലിക്സും പാരാമൗണ്ട്-വാര്ണര് സഖ്യവും തമ്മിലുള്ള പോരാട്ടം മുറുകുമ്പോള്, ആത്യന്തികമായി ലാഭം പ്രേക്ഷകര്ക്കാണ്. സിനിമയുടെയും സീരീസുകളുടെയും 'സുവര്ണ്ണ കാലഘട്ടം' 2.0-ലേക്ക് ഹോളിവുഡ് വാതില് തുറക്കുകയാണ്.