സിരി ഇനി എഐ ഏജന്റാകുന്നു; നിങ്ങള്‍ പറയാതെ തന്നെ ജോലി ചെയ്യും!

ആപ്പിള്‍ സിരിയെ പൂര്‍ണ്ണമായും മാറ്റുകയാണ്. ഒരു വലിയ ലക്ഷ്യം കൊടുത്താല്‍ മതി, സിരി അത് ഓര്‍ത്തിരിക്കുകയും, വിവരങ്ങള്‍ ശേഖരിക്കുകയും, അപ്‌ഡേറ്റുകള്‍ വരുമ്പോള്‍ നിങ്ങളെ മുന്‍കൂട്ടി അറിയിക്കുകയും ചെയ്യും. അതായത്, ചോദ്യം ചോദിച്ചാല്‍ മാത്രം മറുപടി പറയുന്ന അസിസ്റ്റന്റില്‍ നിന്ന്, ലക്ഷ്യത്തിന് പിന്നാലെ സ്വയം ഓടുന്ന ഒരു എഐ ഏജന്റിലേക്ക്. ChatGPTയുടെ Dots, മെറ്റയുടെ Muse, xഎഐയുടെ Grok തുടങ്ങിയവ ഇപ്പോള്‍ ചെയ്യുന്നതാണ് ആപ്പിള്‍ സിരിയിലും കൊണ്ടുവരാന്‍ ശ്രമിക്കുന്നത്.

ഈ മാറ്റത്തിന് പിന്നില്‍ ആപ്പിളിന്റെ പുതിയ സിഇഒ ജോണ്‍ ടെര്‍നസിന്റെ നേരിട്ടുള്ള ഇടപെടലാണ്. ബ്രൂംബര്‍ഗിന്റെ മാര്‍ക്ക് ഗുര്‍മാന്‍ റിപ്പോര്‍ട്ട് ചെയ്തത് അനുസരിച്ച്, ടെര്‍നസ് അടുത്തിടെ സോഫ്റ്റ്വെയര്‍ മേധാവി ക്രെയ്ഗ് ഫെഡെറിഗിയുമായി സ്വകാര്യ കൂടിക്കാഴ്ച നടത്തി എഐ റോഡ്മാപ്പ് വേഗത്തിലാക്കണമെന്ന് ആവശ്യപ്പെട്ടു. ''സിരിയില്‍ ചെറിയ മെച്ചപ്പെടുത്തലുകള്‍ മാത്രം നടത്തി നില്‍ക്കാനാവില്ല, കൂടുതല്‍ അഭിലാഷകരമായ സമീപനം വേണം'' എന്നാണ് ടെര്‍നസ് പറഞ്ഞതെന്നാണ് റിപ്പോര്‍ട്ട്. എതിരാളികളെ പോലെ എഐയില്‍ അത്ര അടിയന്തിര സാഹചര്യം ആപ്പിളിന് ഇല്ലെന്നാണ് ടെര്‍നസിന്റെ വിമര്‍ശനം. സിരി ഇപ്പോള്‍ പ്രധാനമായും request-based ആണ്, പക്ഷേ അതിന്റെ ആര്‍ക്കിടെക്ചര്‍ ഏജന്റ് കഴിവുകള്‍ കൂട്ടിച്ചേര്‍ക്കാന്‍ പാകത്തിലാണ് എന്നാണ് അദ്ദേഹത്തിന്റെ അഭിപ്രായം.

എന്താണ് യഥാര്‍ത്ഥത്തില്‍ മാറുന്നത്? ഉദാഹരണത്തിന്, നിങ്ങള്‍ ഒരു യാത്ര ആസൂത്രണം ചെയ്യാന്‍ പറഞ്ഞാല്‍, സിരി ഫ്‌ലൈറ്റ്, ഹോട്ടല്‍, കാലാവസ്ഥ എന്നിവ നിരീക്ഷിക്കുകയും വില കുറയുമ്പോള്‍ അറിയിക്കുകയും ചെയ്യും. ഒരു പ്രോജക്റ്റ് നിരീക്ഷിക്കാന്‍ പറഞ്ഞാല്‍, മെയിലുകളും മെസേജുകളും പരിശോധിച്ച് പുതിയ വിവരങ്ങള്‍ വരുമ്പോള്‍ അപ്‌ഡേറ്റ് തരും. ഇത് സാധ്യമാകുന്നത് ഐഒഎസ് 27ല്‍ വന്ന പുതിയ സിരി എഐ കൊണ്ടാണ്. സെപ്റ്റംബര്‍ 14-ന് ഐഒഎസ് 27നൊപ്പം എത്തിയ സിരി എഐ ഇപ്പോള്‍ നിങ്ങളുടെ സ്‌ക്രീനില്‍ ഉള്ളത് കാണാനും, പേഴ്‌സണല്‍ കോണ്‍ടെക്സ്റ്റ് മനസിലാക്കാനും, ആപ്പുകള്‍ക്കിടയില്‍ ജോലി ചെയ്യാനും കഴിവുള്ളതാണ്. ഇതിന് പിന്നില്‍ ഗൂഗിളിന്റെ Gemini മോഡലുകളുടെ സാങ്കേതികവിദ്യയാണ് ആപ്പിള്‍ ഉപയോഗിക്കുന്നത്.

എപ്പോള്‍ വരും? ആദ്യ ഘട്ടം അടുത്താണ്. വരാനിരിക്കുന്ന ഐഒഎസ് 27.3 അപ്‌ഡേറ്റില്‍ ആപ്പിളിന്റെ സ്വന്തം ആപ്പുകളില്‍ - Photos, Mail, Calendar, Safari തുടങ്ങിയ 15 ആപ്പുകളില്‍ - കൂടുതല്‍ ആഴത്തിലുള്ള സിരി നിയന്ത്രണം വരും. Nov 3ന് ആപ്പിള്‍ ഇതിന്റെ ഡെവലപ്പര്‍ പ്രിവ്യൂ തുറന്നു കൊടുത്തു, ഏത് ഡെവലപ്പര്‍ക്കും തങ്ങളുടെ ആപ്പിനെ സിരിയുമായി ബന്ധിപ്പിക്കാം. എന്നാല്‍ മൂന്നാം കക്ഷി ആപ്പുകളുടെ പൂര്‍ണ പിന്തുണ 2027 ലേക്ക് നീക്കിയിട്ടുണ്ട്. പൂര്‍ണ ഏജന്റ് കഴിവുകള്‍, അതായത് നിങ്ങള്‍ പറയാതെ തന്നെ സിരി സ്വയം പ്രവര്‍ത്തിക്കുന്നത്, 2027-ല്‍ ആദ്യം വരാന്‍ സാധ്യതയുണ്ടെന്ന് ഗുര്‍മാന്‍ പ്രവചിക്കുന്നു. പക്ഷേ ഇക്കാര്യങ്ങള്‍ ഇതുവരെ ആപ്പിള്‍ ഔദ്യോഗികമായി പ്രഖ്യാപിച്ചിട്ടില്ല.