Satellite Network: ടവറുകളില്ലാത്ത ഇടങ്ങളിലും മൊബൈൽ കണക്റ്റിവിറ്റി;പുതിയ സാറ്റലൈറ്റ് സംവിധാനം

രാജ്യത്തെ ടെലികോം മേഖലയിൽ വലിയ മാറ്റത്തിന് വഴിയൊരുങ്ങുന്നു. മൊബൈൽ ടവറുകൾ ലഭ്യമല്ലാത്ത വിദൂര പ്രദേശങ്ങളിൽ പോലും ഫോണുകളിലേക്ക് നേരിട്ട് കണക്റ്റിവിറ്റി എത്തിക്കാൻ സാറ്റലൈറ്റ് ശൃംഖലകൾ ഉപയോഗിക്കാൻ ടെലികോം ഓപ്പറേറ്റർമാരെ അനുവദിക്കണമെന്ന് ടെലികോം റെഗുലേറ്ററി അതോറിറ്റി ഓഫ് ഇന്ത്യയായ ട്രായ് ശുപാർശ ചെയ്തു. സാറ്റലൈറ്റ് കമ്പനികൾക്കും ടെലികോം ഓപ്പറേറ്റർമാർക്കും ഒരുപോലെ അവസരങ്ങൾ തുറന്നുനൽകുന്നതാണ് പുതിയ നിർദേശം.

നിലവിൽ മൊബൈൽ നെറ്റ്‌വർക്ക് ലഭ്യമല്ലാത്ത ഗ്രാമീണ മേഖലകൾ, മലനിരകൾ, വനപ്രദേശങ്ങൾ, കടൽമേഖലകൾ തുടങ്ങിയ ഇടങ്ങളിൽ കണക്റ്റിവിറ്റി ഉറപ്പാക്കാൻ ഉപഗ്രഹ സാങ്കേതികവിദ്യയ്ക്ക് വലിയ സാധ്യതയുണ്ട്. പരമ്പരാഗത മൊബൈൽ ടവറുകൾ സ്ഥാപിക്കുന്നതിന് വലിയ ചെലവും സമയവും ആവശ്യമായ പ്രദേശങ്ങളിൽ സാറ്റലൈറ്റ് ശൃംഖലകൾ പ്രയോജനപ്പെടുത്താൻ പുതിയ സംവിധാനം സഹായിക്കും.

ഇതിനായി സാറ്റലൈറ്റ് കമ്പനികൾക്ക് സ്വന്തം നെറ്റ്‌വർക്ക് സ്ഥാപിക്കുകയും പ്രവർത്തിപ്പിക്കുകയും പരിപാലിക്കുകയും ചെയ്യുന്നതിനൊപ്പം ടെലികോം കമ്പനികൾക്ക് അടിസ്ഥാന സൗകര്യങ്ങൾ പാട്ടത്തിന് നൽകാനും സാധിക്കുന്ന പുതിയ ലൈസൻസിങ് സംവിധാനമാണ് ട്രായ് മുന്നോട്ടുവെച്ചിരിക്കുന്നത്. സാറ്റലൈറ്റ് കമ്യൂണിക്കേഷൻ നെറ്റ്‌വർക്ക് പ്രൊവൈഡർ അഥവാ എസ്‌സിഎൻ പ്രൊവൈഡർ എന്ന പുതിയ വിഭാഗം ഇതോടെ നിലവിൽ വരും.

അതേസമയം, ഈ കമ്പനികൾക്ക് ഉപയോക്താക്കൾക്ക് നേരിട്ട് ടെലികോം സേവനങ്ങൾ നൽകാൻ അനുമതിയുണ്ടാകില്ല. ലൈസൻസുള്ള ടെലികോം ഓപ്പറേറ്റർമാർ വഴിയായിരിക്കും സേവനങ്ങൾ ഉപഭോക്താക്കളിലേക്ക് എത്തുക. ഇതിലൂടെ നിലവിലുള്ള ടെലികോം സംവിധാനവും സാറ്റലൈറ്റ് കണക്റ്റിവിറ്റിയും പരസ്പരം സംയോജിപ്പിക്കുകയാണ് ലക്ഷ്യം.

ഉദാഹരണത്തിന്, സ്റ്റാർലിങ്ക് പോലുള്ള സാറ്റലൈറ്റ് കമ്പനികൾക്ക് ഭാരതി എയർടെൽ പോലുള്ള ടെലികോം ഓപ്പറേറ്റർമാർക്ക് തങ്ങളുടെ ഉപഗ്രഹ ശൃംഖല പാട്ടത്തിന് നൽകാം. ഈ അടിസ്ഥാന സൗകര്യം ഉപയോഗിച്ച് എയർടെല്ലിന് ഉപഭോക്താക്കൾക്ക് കണക്റ്റിവിറ്റി ലഭ്യമാക്കാനും സാധിക്കും. ഒരു സാറ്റലൈറ്റ് നെറ്റ്‌വർക്ക് പ്രൊവൈഡർക്ക് ഒന്നിലധികം ടെലികോം കമ്പനികൾക്ക് ഒരേസമയം സേവനം നൽകാനും കഴിയും.

പുതിയ ലൈസൻസിന് 20 വർഷത്തെ കാലാവധിയും തുടർന്ന് മറ്റൊരു 20 വർഷത്തേക്ക് പുതുക്കാനുള്ള വ്യവസ്ഥയും വേണമെന്നാണ് ട്രായിയുടെ ശുപാർശ. അടിസ്ഥാന സൗകര്യങ്ങൾ പങ്കുവെക്കുന്നതിലൂടെ ചെലവ് കുറയ്ക്കാനും സേവനങ്ങളുടെ വ്യാപ്തി വർധിപ്പിക്കാനും കഴിയുമെന്നാണ് പ്രതീക്ഷ.

ട്രായിയുടെ ശുപാർശകൾ നടപ്പിലായാൽ രാജ്യത്തെ സാറ്റലൈറ്റ് കമ്യൂണിക്കേഷൻ രംഗത്ത് പുതിയൊരു വിപണിക്ക് തുടക്കമാകും. പ്രത്യേകിച്ച് കണക്റ്റിവിറ്റി പരിമിതമായ പ്രദേശങ്ങളിൽ മൊബൈൽ സേവനങ്ങൾ വ്യാപിപ്പിക്കുന്നതിനും ഡിജിറ്റൽ സേവനങ്ങളുടെ ലഭ്യത മെച്ചപ്പെടുത്തുന്നതിനും ഇത് സഹായകമായേക്കും.