മാര്‍ച്ച് നാലിന് ആപ്പിളിൻ്റെ ഒരു കിടിലൻ ലോഞ്ച്, വിപണിയിൽ പുതിയ മാക്ബുക്ക്? ആകാംക്ഷയോടെ ആരാധകർ

ആപ്പിളിൻ്റെ ഈ വര്‍ഷത്തെ ഏറ്റവും വലിയ ലോഞ്ച് മാര്‍ച്ചില്‍ നടക്കും.ന്യൂയോര്‍ക്ക്, ലണ്ടന്‍, ഷാങ്ഹായ് എന്നീ മൂന്ന് നഗരങ്ങളിലായി ഒരേസമയം പരിപാടി സംഘടിപ്പിക്കപ്പെടും. ഇത് ആപ്പിളിന്റെ സാധാരണ ലോഞ്ചുകളിൽ നിന്ന് വ്യത്യസ്തമാണ്.

താങ്ങാനാവുന്ന വിലയില്‍ ലഭിക്കുന്ന മാക്ബുക്കാകും വിപണിയിൽ എത്തുക എന്ന് അഭ്യൂഹമുണ്ട്, എന്നാല്‍ ഇക്കാര്യത്തില്‍ വ്യക്തത വന്നിട്ടില്ല.

മാര്‍ച്ച് നാലിന് രാവിലെ 9 മണിക്ക് (ഇന്ത്യന്‍ സമയം രാത്രി 7:30) ആപ്പിള്‍ പ്രത്യേക പരിപാടി സംഘടിപ്പിക്കുമെന്ന് ക്ഷണക്കത്തില്‍ പറയുന്നു.ആപ്പിളിന്റെ യൂട്യൂബ് ചാനല്‍ വഴിയോ കമ്പനിയുടെ ഔദ്യോഗിക വെബ്സൈറ്റ് വഴിയോ തത്സമയം ഇവൻ്റ് കാണാന്‍ കഴിയും.

കുറച്ചുനാളായി ആപ്പിള്‍ കുറഞ്ഞ വിലയുള്ള മാക്ബുക്ക് പുറത്തിറക്കുന്നുണ്ട്. റിപ്പോര്‍ട്ടുകള്‍ പ്രകാരം, താങ്ങാനാവുന്ന വിലയുള്ള മാക്ബുക്കില്‍ ഐഫോണ്‍ 16 പ്രോയില്‍ നിന്നുള്ള എ18 പ്രോ ചിപ്സെറ്റ് ഉപയോഗിക്കാം.അതേസമയം 12.9 ഇഞ്ച് എല്‍സിഡി ഡിസ്പ്ലേ ലഭിക്കും. മാക്ബുക്കിന്റെ വില യുഎസില്‍ ഏകദേശം 54,000 രൂപ ആയിരിക്കും.

പുതിയ ബജറ്റ് മാക്ബുക്കിന് പുറമെ, എം5 പ്രോ, എം5 മാക്‌സ് ചിപ്സെറ്റുകള്‍ക്കൊപ്പം മാക്ബുക്ക് പ്രോയും ആപ്പിള്‍ അവതരിപ്പിക്കുമെന്ന് പ്രതീക്ഷിക്കുന്നു. പുതിയ ആപ്പിള്‍ സ്റ്റുഡിയോ ഡിസ്പ്ലേയും നവീകരിച്ച മാക്കും പുറത്തിറക്കാന്‍ സാധ്യതയുണ്ട്.