എക്‌സ്‌ചേഞ്ച് ട്രേഡഡ് ഫണ്ട്

ഓഹരി വിപണികളില്‍ ലിസ്റ്റ് ചെയ്തിരിക്കുന്ന ഇന്‍ഡെക്സ് ഫണ്ടുകളാണ് (Index funds) എക്സ്ചേഞ്ച്ട്രേഡഡ് ഫണ്ടുകള്‍ (ETF). ഇവയെ ഒരു ഓഹരി പോലെ വിപണിയില്‍ കൈമാറ്റം ചെയ്യാന്‍ സാധിക്കും. ഒരര്‍ത്ഥത്തില്‍ ഇവ ഓപ്പണ്‍-എന്‍ഡഡ് മ്യൂച്ചല്‍ ഫണ്ടുകളാണ് (open-ended mutual funds). ഇവയുടെ പോര്‍ട്ഫോളിയോകള്‍ ഓഹരികള്‍, ചരക്കുകള്‍ (gold), ബോണ്ടുകള്‍, വിദേശ കറന്‍സികള്‍ എന്നിവയാണ്. ഇ ടി എഫുകളുടെ പ്രത്യേകത അവ വിവിധ തരം അടിസ്ഥാന വസ്തുക്കള്‍ (Underlying assets) കൊണ്ട് സൃഷ്ടിക്കപ്പെട്ടവയാണ് എന്നതാണ്. അതിനാല്‍ ഒരു മേഖലയിലെ തകര്‍ച്ച ഇതിന്റെ മൂല്യത്തില്‍ വലിയ കുറവുണ്ടാക്കുന്നില്ല. ഇ ടി എഫുകള്‍ അവരുടെ ഓഹരികള്‍ നേരിട്ട് നിക്ഷേപകര്‍ക്ക് വില്‍ക്കുന്നില്ല. എന്നാല്‍ വിപണിയിലെ ഏറ്റക്കുറച്ചിലുകള്‍ (fluctuations)
ഇ ടി എഫിനും ബാധകമാണ്.

വിവിധ തരം ഇ ടി എഫുകള്‍ വിപണിയില്‍ ലഭ്യമാണ്. അവ വരുമാന വര്‍ധനവിനും (income generation), ഊഹക്കച്ചവടത്തിനും (speculation), ഉയര്‍ന്ന വില ലഭിക്കാനുമെല്ലാം (price increases) നിക്ഷേപകരെ സഹായിക്കുന്നു. ബോണ്ടുകളെ അടിസ്ഥാന ആസ്തിയാക്കി പരിഗണിക്കുന്ന ഇ ടി എഫുകളാണ് ബോണ്ട് ഇ ടി എഫുകള്‍. ഇതില്‍ ഗവണ്‍മെന്റ് ബോണ്ടുകളും, കോര്‍പ്പറേറ്റ് ബോണ്ടുകളും, സംസ്ഥാന-പ്രാദേശിക ബോണ്ടുകളും ഉള്‍പ്പെടുന്നു. സ്റ്റോക്ക് ഇ ടി എഫുകള്‍ ഒരു പ്രത്യേക വ്യവസായ സ്ഥാപനത്തിന്റെ ഓഹരികളാവും ഉപയോഗിക്കുക. ഇന്‍ഡസ്ട്രി ഇ ടി എഫുകള്‍ ഒരു വ്യവസായ മേഖലയില്‍ (industry/ sector) പ്രവര്‍ത്തിക്കുന്ന കമ്പനികളുടെ ഓഹരികള്‍ പോര്‍ട്ഫോളിയോ ആയി തിരഞ്ഞെടുക്കുന്നു. കമ്മോഡിറ്റി ഇ ടി എഫുകള്‍ ഉപയോഗിക്കുന്നത് വ്യത്യസ്ത ചരക്കുകളാണ് (ഉദാഹരണമായി സ്വര്‍ണം). കറന്‍സി ഇ ടി എഫുകള്‍ വ്യത്യസ്ത രാജ്യങ്ങളുടെ കറന്‍സികളാവും പോര്‍ട്ഫോളിയോ ആയി ഉപയോഗിക്കുക.

ഇ ടി എഫ് അക്കൗണ്ടുകള്‍ക്ക് മറ്റ് ട്രേഡിംഗ് അക്കൗണ്ടുകളില്‍ നിന്ന് വ്യത്യസ്തമായി വിവിധ ഗുണങ്ങള്‍ ഉണ്ട്. മ്യൂച്ചല്‍ ഫണ്ടുകളുമായി താരതമ്യപ്പെടുത്തുമ്പോള്‍ ഇ ടി എഫുകള്‍ കുറഞ്ഞ ഇടപാട് ചെലവുകളും (transaction cost), ഫീസുകളുമാണ് ഈടാക്കുന്നത്. വിവിധ വ്യവസായങ്ങളുടെ ഓഹരികളിലേക്ക് ഇതിലൂടെ നിക്ഷേപകര്‍ക്ക് പണം നിക്ഷേപിക്കാം. വൈവിധ്യവല്‍ക്കരണത്തിലൂടെ റിസ്‌ക് മാനേജ്മെന്റ് നടത്തുന്നു എന്നതും ഇ ടി എഫുകളുടെ പ്രത്യേകതയാണ്. അതുപോലെ ടാര്‍ഗറ്റഡ് വ്യവസായങ്ങളില്‍ ശ്രദ്ധ
കേന്ദ്രീകരിക്കുന്ന ഇ ടി എഫുകളും ഉണ്ട്.

പക്ഷേ സജീവമായി കൈകാര്യം ചെയ്യുന്ന (active) ഇ ടി എഫുകളില്‍ ഉയര്‍ന്ന ഫീസ് ഈടാക്കുന്നു. സിംഗിള്‍ ഇന്‍ഡസ്ട്രി ഫോക്കസ് ഇ ടി എഫുകള്‍ വൈവിധ്യവത്കരണത്തെ പരിമിതപ്പെടുത്തുന്നു. പണലഭ്യതയുടെ അഭാവം (illiquidity) ഇടപാടുകളെ തടസപ്പെടുത്തുന്നു ഇവയാണ് ഇ ടി എഫുകളുടെ പരിമിതികള്‍.

ഇ ടി എഫിന്റെ പ്രവര്‍ത്തനം

ഇ ടി എഫ് നടത്തിപ്പുകാരായ അസറ്റ് മാനേജ്മെന്റ് കമ്പനി (asset management company-AMC) ഒരു ഓതറൈസ്ഡ് പാര്‍ട്ടിസിപന്റിനെ (AP) നെ നിയമിക്കുന്നു. എ പി (മിക്കപ്പോഴും വലിയ ഇന്‍വെസ്റ്റ്മെന്റ് ബാങ്കുകള്‍) ഇ ടി എഫിന്റെ അടിസ്ഥാനമായ ഓഹരികള്‍, അല്ലെങ്കില്‍ സ്വര്‍ണം, അസറ്റ് മാനേജ്‌മെന്റ് കമ്പനിയില്‍ നിക്ഷേപിക്കുന്നു. ഈ നിക്ഷേപത്തെ 'പോര്‍ട്‌ഫോളിയോ ഡിപ്പോസിറ്റ്' എന്നാണ് പറയുന്നത്. അസറ്റ് മാനേജ്‌മെന്റ് കമ്പനികള്‍ ഈ പോര്‍ട്ഫോളിയോ ഡിപ്പോസിറ്റിനെ സുരക്ഷിതമായി സൂക്ഷിക്കാന്‍ ഒരു ഡിപ്പോസിറ്ററിയെ ഏല്‍പ്പിക്കുന്നു.

പോര്‍ട്ഫോളിയോ ഡിപ്പോസിറ്റിന്റെ അനുപാതത്തില്‍ അസറ്റ് മാനേജ്‌മെന്റ് കമ്പനികള്‍ യൂണിറ്റുകള്‍ പുറത്തിറക്കി എപി യ്ക്ക് കൈമാറും. ഈ യൂണിറ്റുകള്‍ ഒരുമിച്ചു ചേര്‍ത്താണ് ഇ ടി എഫുകള്‍ സൃഷ്ടിക്കുന്നത്. ഇ ടി എഫുകള്‍ക്ക് കൂടുതല്‍ ആവശ്യക്കാര്‍ ഉണ്ടായാല്‍ എപി കള്‍ കൂടുതല്‍ ഓഹരികള്‍/ സ്വര്‍ണം എഎംസി യില്‍ നിക്ഷേപിച്ച് പകരം യൂണിറ്റുകള്‍ ആവശ്യപ്പെടും. അതിനു ശേഷം അവ നിക്ഷേപകര്‍ക്ക് വില്‍ക്കും. എന്നാല്‍ നിക്ഷേപകര്‍ ഇ ടി എഫ് യൂണിറ്റുകള്‍ വില്‍ക്കാന്‍ താല്‍പര്യപ്പെട്ടാല്‍, എപി കള്‍ അവ വാങ്ങി എഎംസി യ്ക്ക് നല്‍കി അതിന് ആനുപാതികമായ ഓഹരികളോ, സ്വര്‍ണമോ വാങ്ങി വിപണിയില്‍ വിറ്റ് നിക്ഷേപകന് പണം നല്‍കും.