സ്വര്‍ണവിലയില്‍ നേരിയ വര്‍ധന

സംസ്ഥാനത്ത് തുടര്‍ച്ചയായ 3 ദിവസങ്ങളില്‍  ഒരേ തലത്തിലായിരുന്ന സ്വര്‍ണ വില ഇന്ന് നേരിയ ഉയർച്ച പ്രകടമാക്കി. സംസ്ഥാനത്ത് 22 കാരറ്റ് സ്വര്‍ണം ഗ്രാമിന് 5,675 രൂപയാണ് ഇന്നത്തെ വില, കഴിഞ്ഞ മൂന്ന് ദിവസങ്ങളിലും ഉണ്ടായിരുന്ന വിലയില്‍ നിന്ന് 10 രൂപയുടെ വര്‍ധനയാണ് ഉണ്ടായിട്ടുള്ളത്. 22 കാരറ്റ് സ്വര്‍ണം പവന് 45,400 രൂപയാണ്, 80  രൂപയുടെ വര്‍ധന. 24 കാരറ്റ് സ്വർണം ഗ്രാമിന് 6,191  രൂപയാണ്, 11 രൂപയുടെ വര്‍ധന ഉണ്ടായി. പവന് 49,528 രൂപ, 88 രൂപയുടെ വര്‍ധന. മേയില്‍ ഇതുവരെ  ചാഞ്ചാട്ടമാണ് സ്വര്‍ണ വിലയില്‍ പ്രകടമായിട്ടുള്ളത്. ഫെഡ് റിസര്‍വ് പ്രഖ്യാപനങ്ങള്‍ക്കു പിന്നാലെ ഡോളര്‍ ശക്തി പ്രാപിക്കുന്നത് സ്വര്‍ണ വിലയിലെ വര്‍ധനയ്ക്ക് ഈയാഴ്ച കടിഞ്ഞാണിടുമെന്ന് നേരത്തേ വിദഗ്ധര്‍ വിലയിരുത്തിയിരുന്നു.

വെള്ളി വിലയിലും ഇന്ന് വര്‍ധനയുണ്ടായി. ഗ്രാമിന് 78.80 രൂപയാണ് വില, ഇന്നലത്തെ  വിലയില്‍ നിന്ന് 30 പൈസയുടെ വര്‍ധന. 8 ഗ്രാം വെള്ളിക്ക് 630.40 രൂപയാണ്, 2.40 രൂപയുടെ വര്‍ധന. ഡോളറിനെതിരേ ഇന്ന് രൂപയുടെ മൂല്യം 1 ഡോളറിന് 82.27 രൂപ എന്ന നിരക്കിലാണ്. യുഎസില്‍ ബാങ്കിംഗ് പ്രതിസന്ധി ഇപ്പോഴും രൂക്ഷമായി തുടരുന്നതിന്‍റെയും ആഗോള തലത്തില്‍ മൂലധന വിപണികളില്‍ തുടരുന്ന അനിശ്ചിതാവസ്ഥകളുടെയും പശ്ചാത്തലത്തില്‍ സ്വർണവില ഹ്രസ്വകാലയളവില്‍ ഉയർന്നുതന്നെ നില്‍ക്കുമെന്നാണ് വിലയിരുത്തപ്പെടുന്നത്. എങ്കിലും ഫെഡ് റിസർവ് പ്രഖ്യാപനങ്ങളുടെ ഫലമായി ഡോളർ ശക്തിപ്രാപിക്കുന്ന സാഹചര്യത്തില്‍ ഇതില്‍ തിരുത്തലുകളുണ്ടായേക്കും.