ഏഷ്യന്‍ വിപണികളില്‍ പച്ച, ഉയര്‍ന്ന് ക്രൂഡ് വില; ഇന്ന് വിപണി തുറക്കും മുമ്പ് അറിയേണ്ടത്

12 ആഴ്ചകള്‍ക്കിടയിലെ ഏറ്റവും വലിയ ഇടിവാണ് ജനുവരി 25ന് അവസാനിച്ച ആഴ്ചയില്‍ ഇന്ത്യന്‍ ബെഞ്ച്മാര്‍ക്ക് സൂചികകള്‍ രേഖപ്പെടുത്തിയിട്ടുള്ളത്. മൂന്ന് ദിവസത്തെ അവധിക്ക് ശേഷം ഇന്ന് വ്യാപാരം വീണ്ടും തുടങ്ങുമ്പോള്‍ ഇടിവ് തുടരുമോ എന്ന ആശങ്കയാണ് വിപണി പങ്കാളികള്‍ക്ക് ഉള്ളത്. തുടര്‍ച്ചയായ റാലികള്‍ സൃഷ്ടിച്ച ഉയര്‍ന്ന മൂല്യ നിര്‍ണയവും ബാങ്കിംഗ് മേഖലയില്‍ നിന്നുള്ള വരുമാന പ്രഖ്യാപനങ്ങള്‍ നല്‍കിയ നിരാശയും യുഎസ് ട്രഷറി ആദായം ഉയര്‍ന്നതും ഫെഡ് പലിശനിരക്കിളവ് വൈകുമെന്ന സൂചനകളും വിപണികള്‍ക്ക് തിരിച്ചടിയായി. 

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിൻ്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 21,272 ലും തുടർന്ന് 21,222ലും 21,141ലും ഉടനടി പിന്തുണ സ്വീകരിക്കാൻ സാധ്യതയുണ്ട് എന്നാണ്. ഉയർച്ചയുടെ സാഹചര്യത്തില്‍, അത് 21,372ലും തുടർന്ന് 21,484ലും 21,565ലും ഉടനടി പ്രതിരോധം കാണാനിടയുണ്ട്. 

ആഗോള വിപണികള്‍ ഇന്ന് 

വെള്ളിയാഴ്ചത്തെ വ്യാപാര സെഷന്‍ സമ്മിശ്രമായാണ് യുഎസ് വിപണികള്‍ അവസാനിപ്പിച്ചത്.  എസ് & പി 500 0.07 ശതമാനം ഇടിഞ്ഞ് 4,890.97 പോയിൻ്റിൽ സെഷൻ അവസാനിപ്പിച്ചു. നാസ്ഡാക്ക് 0.36 ശതമാനം ഇടിഞ്ഞ് 15,455.36 പോയിൻ്റിലും ഡൗ ജോൺസ് ഇൻഡസ്ട്രിയൽ ആവറേജ് 0.16 ശതമാനം ഉയർന്ന് 38,109.43 പോയിൻ്റിലുമെത്തി.

ഏഷ്യ പസഫിക് വിപണികള്‍ ഇന്ന് പൊതുവില്‍ നേട്ടത്തിലാണ് വ്യാപാരം ആരംഭിച്ചിട്ടുള്ളത്. ഓസ്ട്രേലിയ എഎസ്എക്സ്, ജപ്പാന്‍റെ നിക്കി, ദക്ഷിണ കൊറിയയുടെ കോസ്പി, ഹോംഗ്കോംഗിന്‍റെ ഹാങ്സെങ്, ചൈനയുടെ ഷാങ്ഹായ് എന്നിവയെല്ലാം നേട്ടത്തില്‍ വ്യാപാരം നടത്തുന്നു. 

ഗിഫ്റ്റ് നിഫ്റ്റി 79.50 പോയിന്‍റിന്‍റെ നേട്ടത്തോടെയാണ് ഇന്ന് വ്യാപാരം ആരംഭിച്ചിട്ടുള്ളത്. ബെഞ്ച് മാര്‍ക്ക് സൂചികകളുടെയും നേട്ടത്തിലുള്ള തുടക്കത്തെ ഡെറിവേറ്റിവ് വിപണി സൂചിപ്പിക്കുന്നു.

ഇന്ന് ശ്രദ്ധ നേടുന്ന ഓഹരികള്‍

അദാനി പവർ: ഡിസംബറിൽ അവസാനിച്ച പാദത്തിൽ അദാനി ഗ്രൂപ്പ് കമ്പനിയുടെ ഏകീകൃത അറ്റാദായം 300 മടങ്ങ് വർധിച്ച് 2,738 കോടി രൂപയായി. മുൻ വർഷം ഇതേ കാലയളവിൽ ഇത് 8.8 കോടി രൂപയായിരുന്നു. പ്രവർത്തനങ്ങളിൽ നിന്നുള്ള ഏകീകൃത വരുമാനം 67.3 ശതമാനം വാര്‍ഷിക വര്‍ധനയോടെ 12,991.4 കോടി രൂപയായി.

എസ്‌ബിഐ കാർഡ്‍സ് പേയ്‌മെൻ്റ് സര്‍വീസസ്: ക്രെഡിറ്റ് കാർഡ് ഇഷ്യൂ ചെയ്യുന്ന കമ്പനിയുടെ മൂന്നാംപാദ ലാഭം 7.8 ശതമാനം വാര്‍ഷിക വളർച്ച രേഖപ്പെടുത്തി  549 കോടി രൂപയായി. പ്രവർത്തന വരുമാനം മുൻവർഷത്തെ അപേക്ഷിച്ച് 31.8 ശതമാനം ഉയർന്ന് 4,622 കോടി രൂപയായി.

ടാറ്റ ടെക്‌നോളജീസ്: ഡിസംബറിൽ അവസാനിച്ച പാദത്തിൽ ആഗോള എഞ്ചിനീയറിംഗ് സേവന കമ്പനിയുടെ ഏകീകൃത ലാഭം 14.7 ശതമാനം വളർച്ച രേഖപ്പെടുത്തി 170.22 കോടി രൂപയായി. പ്രവർത്തന വരുമാനവും മുൻവർഷം സമാന കാലയളവിനെ അപേക്ഷിച്ച് 14.7 ശതമാനം വർധിച്ച് 1,289.5 കോടി രൂപയായി.

വേദാന്ത: ആരോഗ്യകരമായ പ്രവർത്തന സംഖ്യകൾ ഉണ്ടായിരുന്നിട്ടും  മൂന്നാം പാദത്തിൽ ഖനന കമ്പനിയുടെ ലാഭം 18.3 ശതമാനം ഇടിവ് രേഖപ്പെടുത്തി 2,013 കോടി രൂപയായി. മുന്‍ വര്‍ഷം മൂന്നാംപാദത്തില്‍ 903 കോടി രൂപയുടെ പ്രത്യേകമായൊരു നേട്ടം ഉണ്ടായിരുന്നു. പ്രവർത്തന വരുമാനം വർഷം തോറും 4.2 ശതമാനം വർധിച്ച് 35,541 കോടി രൂപയായി.

എസ്‌ജെവിഎൻ: ഗുജറാത്ത് ഊർജ വികാസ് നിഗം ​​(ജിയുവിഎൻഎൽ) നടത്തിയ ഇ-റിവേഴ്‌സ് ലേലത്തില്‍ നിഷ്കര്‍ഷിച്ച 100 മെഗാവാട്ട് സോളാർ പവർ പ്രോജക്റ്റിൻ്റെ മുഴുവന്‍ ശേഷിയും കമ്പനി പ്രാപ്തമാക്കി. 

ക്രൂഡ് ഓയില്‍ വില

ചെങ്കടലിൽ  ഇന്ധന ടാങ്കറിനു നേരേ മിസൈൽ ആക്രമണം ഉണ്ടായതിനെ തുടര്‍ന്ന് വിതരണ ആശങ്കകള്‍ ഉടലെടുത്തതിനാല്‍ തിങ്കളാഴ്ച എണ്ണ വില 1 ശതമാനം ഉയർന്നു.

ബ്രെൻ്റ് ക്രൂഡ് ഫ്യൂച്ചറുകൾ  ബാരലിന് 83 സെൻറ് ഉയർന്ന് 84.38 ഡോളറിലെത്തി. യുഎസ് വെസ്റ്റ് ടെക്സസ് ഇൻ്റർമീഡിയറ്റ് ക്രൂഡ് വില ബാരലിന് 78 സെൻറ് ഉയർന്ന് 78.79 ഡോളറിലെത്തി.

വിദേശ ഫണ്ടുകളുടെ ഗതി

വിദേശ സ്ഥാപന നിക്ഷേപകർ (എഫ്ഐഐകൾ) തുടർച്ചയായി ഏഴ് ദിവസം ക്യാഷ് സെഗ്‌മെൻ്റിൽ അറ്റ ​​വിൽപ്പനക്കാരായി തുടർന്നു, ജനുവരി 25 ന് ഓഹരികളില്‍ അവര്‍ 2,144.06 കോടി രൂപയുടെ അറ്റവില്‍പ്പന നടത്തി.  അതേസമയം ആഭ്യന്തര സ്ഥാപന നിക്ഷേപകർ (ഡിഐഐകൾ)  3,474.89 കോടി രൂപയുടെ ഓഹരികൾ കരസ്ഥമാക്കിയെന്നും എന്‍എസ്ഇയുടെ താല്‍ക്കാലിക കണക്കുകള്‍ കാണിക്കുന്നു. 

ഓഹരി വിപണി വാര്‍ത്തകള്‍

അറിയാന്‍നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം