ട്രംപിന്‍റെ താരിഫ് ഭീഷണി: കൂപ്പുകുത്തി ഓഹരി വിപണി, സെന്‍സെക്‌സ് 600 പോയിന്റ് ഇടിഞ്ഞു

ഇന്ത്യൻ ഓഹരി വിപണി ഇന്ന് നഷ്ടത്തിൽ വ്യാപാരം അവസാനിപ്പിച്ചു. സെൻസെക്സ് 585 പോയിന്റ് ഇടിഞ്ഞ് 80,599 ൽ ലും നിഫ്റ്റി 203 പോയിന്റ് ഇടിഞ്ഞ് 24,565 ലും ക്ലോസ് ചെയ്തു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ട്രെന്റ്, ഏഷ്യൻ പെയിന്റ്‌സ്, ഹിന്ദുസ്ഥാൻ യൂണിലിവർ, ഐടിസി, കൊട്ടക് മഹീന്ദ്ര ബാങ്ക്, റിലയൻസ് ഇൻഡസ്ട്രീസ് എന്നിവ നേട്ടമുണ്ടാക്കി. അതേസമയം ടാറ്റ സ്റ്റീൽ, മാരുതി, ടാറ്റ മോട്ടോഴ്‌സ്, ഇൻഫോസിസ്, ഭാരതി എയർടെൽ, ടെക് മഹീന്ദ്ര എന്നിവ നഷ്ടത്തിൽ വ്യാപാരം അവസാനിപ്പിച്ചു.

സെക്ടര്‍ സൂചിക

സെക്ടര്‍ സൂചികകളിൽ എഫ്‌എംസിജി ഒഴികെയുള്ള മറ്റ് എല്ലാ മേഖല സൂചികകളും ഇന്ന് ഇടിവ് നേരിട്ടു. നിഫ്റ്റി ഓട്ടോ, റിയൽറ്റി, ഫാർമ, ഐടി, മെറ്റൽ, ഓയിൽ ആൻഡ് ഗ്യാസ്, പി‌എസ്‌യു ബാങ്ക്, ടെലികോം എന്നിവ 0.5-2 ശതമാനം വരെ ഇടിഞ്ഞു. ബി‌എസ്‌ഇ മിഡ്‌ക്യാപ് സൂചിക 1.3 ശതമാനവും സ്‌മോൾക്യാപ് സൂചിക 1.6 ശതമാനവും ഇടിഞ്ഞു.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി, ജപ്പാന്റെ നിക്കി 225 സൂചിക, ഷാങ്ഹായുടെ എസ്എസ്ഇ കോമ്പോസിറ്റ് സൂചിക, ഹോങ്കോങ്ങിന്റെ ഹാങ് സെങ് എന്നിവ താഴ്ന്ന നിലയിലാണ് വ്യാപാരം അവസാനിപ്പിച്ചത്. യൂറോപ്പിലെ ഓഹരി വിപണികൾ നഷ്ടത്തിലാണ് വ്യാപാരം നടത്തിയത്. വ്യാഴാഴ്ച യുഎസ് വിപണികൾ നഷ്ടത്തിലാണ് വ്യാപാരം അവസാനിച്ചത്.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ 0.39 ശതമാനം ഇടിഞ്ഞ് ബാരലിന് 71.42 ഡോളറിലെത്തി. ഡോളറിനെതിരെ രൂപയുടെ മൂല്യം 12 പൈസ ഉയർന്ന് 87.53 ൽ ക്ലോസ് ചെയ്തു.