എക്കാലത്തെയും ഉയർന്ന വിലയിൽ കല്യാൺ: കേരള കമ്പനികളുടെ പ്രകടനം

നവംബർ ആറിലെ വ്യാപാരം അവസാനിക്കുമ്പോൾ കല്യാൺ ജ്വലേഴ്‌സ് എക്കാലത്തെയും ഉയർന്ന വിലയായ 324.25 രൂപയിലെത്തി. മുൻ ദിവസത്തെ ക്ലോസിങ് വിലയായ 304.65 രൂപയിൽ നിന്ന് 5.50 ശതമാനം ഉയർന്ന് ഇന്ന് ഓഹരികൾ 321.4 രൂപയിൽ ക്ലോസ് ചെയ്തു.

കൊച്ചിൻ ഷിപ്യാർഡ് ഓഹരികൾ 6.27 ശതമാനം ഉയർന്ന് 1004.3 രൂപയിൽ. നവംബർ മൂന്നിൽ നേരിയ ഇടിവിൽ വ്യാപാരം അവസാനിപ്പിച്ച ഓഹരികൾ ഇന്ന് നിക്ഷേപകർക്ക് ഓഹരിയൊന്നിന് 59.25 രൂപയുടെ നേട്ടം നൽകി. കേരള ആയുർവേദ ഓഹരികൾ ഇന്ന് രണ്ട് ശതമാനം നേട്ടം നൽകി. 218.15 രൂപയിൽ ക്ലോസ് ചെയ്തു. മണപ്പുറം ഫിനാൻസ് 1.96 ശതമാനവും, മുത്തൂറ്റ് ഫിനാൻസ് 0.43 ശതമാനവും ഇന്ന് ഉയർന്നു.

ബാങ്കിങ് മേഖലയിൽ സിഎസ്ബി ബാങ്ക് 2.38 ശതമാനം ഉയർന്ന് 339.6 രൂപയിൽ ക്ലോസ് ചെയ്തു. ഫെഡറൽ ബാങ്ക് 0.42 ശതമാനം ഉയർന്ന് 144.1 രൂപയിൽ വ്യാപാരം നിർത്തി. ധനലക്ഷ്മി ബാങ്കും സൗത്ത് ഇന്ത്യൻ ബാങ്കും യഥാക്രമം 0.68 ശതമാനവും 1.80 ശതമാനവും നഷ്ടം നൽകി വ്യാപാരം അവസാനിപ്പിച്ചു.