ലാർജ് ക്യാപ് ഓഹരികൾ കുതിപ്പ് തുടരുന്നു; വിപണിയിൽ ഇന്നും പുതിയ റെക്കോർഡുകൾ

ആഭ്യന്തര സൂചികകൾ ഇന്ന് വ്യാപാരം ആരംഭിച്ചത് പുത്തൻ റെക്കോർഡിലാണ്. നിഫ്റ്റിയും സെൻസെക്‌സും ആദ്യഘട്ട വ്യാപാരത്തിൽ തന്നെ സർവ്വകാല ഉയരം താണ്ടി. തുടർച്ചയായി അഞ്ചാം ദിവസമാണ് സൂചികകൾ നേട്ടത്തോടെ വ്യാപാരം ആരംഭിക്കുന്നത്. ആഗോള വിപണികളിലെ റാലി, റിലയൻസ് ഇൻഡസ്ട്രീസ് ഓഹരികളിലെ കുതിപ്പ്, വിദേശ നിക്ഷേപകരുടെ ഉയർന്നു വരുന്ന വാങ്ങൽ തുടങ്ങിയ കാരണങ്ങൾ വിപണിക്ക് കരുത്തേകി.

സെൻസെക്‌സ് 308.49 പോയിൻ്റ് ഉയർന്ന് 79,551.67 എന്ന പുതിയ റെക്കോർഡിലും നിഫ്റ്റി 103.75 പോയിൻ്റ് ഉയർന്ന് 24,148.25 ലുമാണ് വ്യാപാരം ആരംഭിച്ചത്.

നിഫ്റ്റിയിൽ ഡോ റെഡ്ഡീസ് ലബോറട്ടറീസ്, എൻടിപിസി, ഓയിൽ ആൻഡ് നാച്ചുറൽ ഗ്യാസ് കോർപ്പറേഷൻ ഓഹരികൾ നേട്ടം തുടരുമ്പോൾ ഗ്രാസിം ഇൻഡസ്ട്രീസ്, ഇൻഡസിന്ദ് ബാങ്ക്, മഹീന്ദ്ര ആൻഡ് മഹീന്ദ്ര എന്നീ ഓഹരികൾ ഇടിവിലാണ്.

നിഫ്റ്റി മിഡ്‌ക്യാപ് 100, നിഫ്റ്റി സ്‌മോൾക്യാപ് 100 സൂചികകൾ 0.6 ശതമാനം വരെ ഉയർന്നു. സെക്ടറൽ സൂചികകളിൽ പിഎൻബി, ബാങ്ക് ഓഫ് ബറോഡ, എസ്ബിഐ തുടങ്ങിയ ഓഹരികളുടെ കുതിപ്പിൽ നിഫ്റ്റി പിഎസ്‌യു ബാങ്ക് സൂചിക 2 ശതമാനത്തിലധികം കുതിച്ചു. നിഫ്റ്റി ഓയിൽ ആൻഡ് ഗ്യാസ്, ഫാർമ സൂചികകളും ഒരു ശതമാനം വീതം ഉയർന്നു. നിഫ്റ്റി റിയൽറ്റി, നിഫ്റ്റി ഓട്ടോ സൂചികകൾ 0.2 ശതമാനം വരെ ഇടിഞ്ഞു.

ഏഷ്യൻ വിപണികളിൽ, സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ പച്ചയിലാണ് വ്യാപാരം നടത്തുന്നത്. വ്യാഴാഴ്ച യുഎസ് വിപണികൾ നേട്ടത്തോടെയാണ് ക്ലോസ് ചെയ്തത്.

വിദേശ നിക്ഷേപ സ്ഥാപനങ്ങൾ (എഫ്ഐഐ) വ്യാഴാഴ്ച 7,658.77 കോടി രൂപയുടെ ഓഹരികൾ വാങ്ങി. ബ്രെൻ്റ് ക്രൂഡ് 0.49 ശതമാനം ഉയർന്ന് ബാരലിന് 86.81 ഡോളറിലെത്തി. സ്വർണം ട്രോയ് ഔൺസിന് നേരിയ ഇടിവിൽ 2331 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 8 പൈസ ഉയർന്ന് 83.37 എത്തി.

വ്യാഴാഴ്ച സെൻസെക്സ് 568.93 പോയിൻ്റ് അഥവാ 0.72 ശതമാനം ഉയർന്ന് 79,243.18 ലും നിഫ്റ്റി 175.70 പോയിൻ്റ് അഥവാ 0.74 ശതമാനം ഉയർന്ന് 24,044.50 ലുമാണ് ക്ലോസ് ചെയ്തത്.