തുടക്കത്തിലെ ഇടിവിന് ശേഷം വിപണികള്‍ വീണ്ടും പച്ചയില്‍

ഏഷ്യൻ വിപണികളിലെ ദുർബലമായ പ്രവണതകൾക്കിടയിൽ വ്യാഴാഴ്ച ആദ്യ വ്യാപാരത്തിൽ ബെഞ്ച്മാർക്ക് ഇക്വിറ്റി സൂചികകൾ ഇടിഞ്ഞു, എന്നാൽ അധികം താമസിയാതെ നേട്ടത്തിലേക്ക് എത്തി. തുടക്കത്തില്‍  സെൻസെക്‌സ് 168.91 പോയിന്റ് ഇടിഞ്ഞ് 65,507.02 എന്ന നിലയിലെത്തി. നിഫ്റ്റി 48.45 പോയിന്റ് താഴ്ന്ന് 19,627 ലെത്തി. പക്ഷേ, പിന്നീട് രണ്ട് ബെഞ്ച്മാർക്ക് ഇക്വിറ്റി സൂചികകളും പുതിയ വിദേശ ഫണ്ട് ഒഴുക്ക് സൃഷ്ടിച്ച ശുഭാപ്തിവിശ്വാസത്തിൽ പച്ചയിലേക്ക് കുതിച്ചു.

സെൻസെക്‌സ് സ്ഥാപനങ്ങളിൽ ബജാജ് ഫിനാൻസ്, പവർ ഗ്രിഡ്, ബജാജ് ഫിൻസെർവ്, ജെഎസ്ഡബ്ല്യു സ്റ്റീൽ, ടൈറ്റൻ, ടാറ്റ സ്റ്റീൽ എന്നിവയാണ് പ്രധാനമായും ഇടിവ് നേരിട്ടത്. എൻടിപിസി, ടാറ്റ കൺസൾട്ടൻസി സർവീസസ്, ടാറ്റ മോട്ടോഴ്സ്, എച്ച്സിഎൽ ടെക്നോളജീസ് തുടങ്ങിയ ഓഹരികൾ നേട്ടത്തിലാണ്. ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നഷ്ടത്തിലാണ് വ്യാപാരം നടക്കുന്നത്. യുഎസ് വിപണികൾ ബുധനാഴ്ച നേട്ടത്തോടെയാണ് അവസാനിച്ചത്.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.75 ശതമാനം ഇടിഞ്ഞ് ബാരലിന് 80.57 ഡോളറിലെത്തി.

എക്‌സ്‌ചേഞ്ച് ഡാറ്റ പ്രകാരം,  550.19 കോടി രൂപയുടെ അറ്റവാങ്ങല്‍ ഇക്വിറ്റികളിൽ നടത്തി വിദേശ സ്ഥാപന നിക്ഷേപകർ (എഫ്‌ഐഐകൾ) ബുധനാഴ്ച ഏറെ ദിവസങ്ങള്‍ക്കു ശേഷം വാങ്ങലുകാരായി മാറി. ബുധനാഴ്ച സെൻസെക്സ് 742.06 പോയിന്റ് അഥവാ 1.14 ശതമാനം ഉയർന്ന് 65,675.93 ൽ എത്തി. നിഫ്റ്റി 231.90 പോയിന്റ് അഥവാ 1.19 ശതമാനം ഉയർന്ന് 19,675.45 ലെത്തി.