മികച്ച നേട്ടത്തില്‍ വിപണികളുടെ ക്ലോസിംഗ്

ഏഷ്യൻ വിപണിയിലെ പോസിറ്റീവ് ട്രെൻഡുകളുടെ പശ്ചാത്തലത്തില്‍ ആഭ്യന്തര ഓഹരി വിപണി സൂചികകള്‍ ഇന്ന് മികച്ച നേട്ടം കൊയ്തു. അസംസ്‌കൃത എണ്ണവില ഉയരാൻ കാരണമായ ഇസ്രായേൽ-ഹമാസ് സംഘർഷത്തെക്കുറിച്ചുള്ള ആശങ്കകൾ മൂലം ഇന്നലെ വിപണികല്‍ കുത്തനെ ഇടിവ് നേരിിരുന്നു. എന്നാല്‍ ഈ നടുക്കത്തില്‍ നിന്ന് കരകയറിയ വിപണികള്‍ മറ്റു സാമ്പത്തിക ഡാറ്റകളിലേക്ക് ശ്രദ്ധ കേന്ദ്രീകരിക്കുകയാണ്. 

നിഫ്റ്റി ഇന്ന് 180 പോയിൻറ് (0.92 ശതമാനം) ഉയർന്ന് 19,692.65 ൽ ക്ലോസ് ചെയ്തു. സെൻസെക്‌സ് 567 പോയിന്റ് (0.87 ശതമാനം) ഉയർന്ന് 66,079.36 എന്ന നിലയിലാണ് വ്യാപാരം അവസാനിപ്പിച്ചത്. ഇന്ന് നിക്ഷേപകരുടെ മൊത്തം നേട്ടം 3 ലക്ഷം കോടിക്ക് മുകളിലാണെന്നാണ് കണക്കാക്കുന്നത്.

ഭാരതി എയർടെൽ, കൊട്ടക് മഹീന്ദ്ര ബാങ്ക്, ടാറ്റ മോട്ടോഴ്സ്, ഐസിഐസിഐ ബാങ്ക്, ആക്സിസ് ബാങ്ക് എന്നിവയാണ് ഇന്ന് ഏറ്റവുമധികം നേട്ടം നിക്ഷേകര്‍ക്ക് നല്‍കിയത്. ടാറ്റ കൺസൾട്ടൻസി സർവീസസ്, ഏഷ്യൻ പെയിന്റ്സ്, ഇൻഡസിൻഡ് ബാങ്ക് എന്നിവ ഇടിവ് നേരിടുന്നു.

ജപ്പാന്റെ നിക്കി 225, ഹോങ്കോങ്ങിന്റെ ഹാങ് സെങ് എന്നിവയുൾപ്പെടെ പ്രധാന ഏഷ്യൻ സൂചികകൾ നേട്ടത്തിലാണ്. എന്നാല്‍ ചൈനീസ് വിപണി നഷ്ടത്തിലാണ് ക്ലോസ് ചെയ്തത്. തിങ്കളാഴ്ച യുഎസ് ഓഹരികൾ പോസിറ്റീവായാണ് അവസാനിച്ചത്.

ഫെഡറൽ റിസർവ് ഉദ്യോഗസ്ഥരുടെ അഭിപ്രായങ്ങളിൽ നിക്ഷേപകർ ശ്രദ്ധ കേന്ദ്രീകരിച്ചതാണ് യുഎസ് ഓഹരികൾ തുടക്കത്തിലെ നഷ്ടം മറികടന്ന് സെഷന്‍ നേട്ടത്തില്‍ അവസാനിപ്പിക്കാന്‍ ഇടയാക്കിയത്. പലിശ നിരക്ക് ഇനിയും ഉയര്‍ത്തേണ്ട സാഹചര്യം ഫെഡ് റിസര്‍വിന് ഉണ്ടായേക്കില്ലെന്ന പ്രതീക്ഷ നിക്ഷേപകരില്‍ ഉണ്ടായിട്ടുണ്ട്.

ബി‌എസ്‌ഇയിൽ ലഭ്യമായ കണക്കുകൾ പ്രകാരം തിങ്കളാഴ്ച വിദേശ സ്ഥാപന നിക്ഷേപകർ (എഫ്‌ഐഐകൾ) 997.76 കോടി രൂപയുടെ ഇക്വിറ്റികൾ ഓഫ്‌ലോഡ് ചെയ്ത് അറ്റ ​​വിൽപ്പനക്കാരായിരുന്നു. തിങ്കളാഴ്ച സെൻസെക്‌സ് 483.24 പോയിന്റ് ഇടിഞ്ഞ് 65,512.39 പോയിന്റിലും നിഫ്റ്റി 141.15 പോയിന്റ് താഴ്ന്ന് 19,512.35 പോയിന്റിലുമാണ് വ്യാപാരം അവസാനിപ്പിച്ചത്.