70,000 കടന്ന് സെന്‍സെക്സ്; റാലി തുടര്‍ന്ന് സൂചികകള്‍

സമ്മിശ്ര ആഗോള സൂചനകൾക്കിടയിൽ തിങ്കളാഴ്ച സെൻസെക്സും നിഫ്റ്റിയും നേരിയ നേട്ടത്തോടെ ആരംഭിച്ചു. രാവിലെ 930ന് സെൻസെക്‌സ് 223 പോയിന്റ് ഉയർന്ന് 70,048.90 എന്ന സര്‍വകാല ഉയരത്തിലേക്ക് എത്തി. ചരിത്രത്തില്‍ ആദ്യമായാണ് സെന്‍സെക്സ് 70,000 എന്ന നാഴികക്കല്ല് പിന്നിടുന്നത്. നിഫ്റ്റി 21,019.80 എന്ന സര്‍വ കാല ഉയരത്തിലെത്തി.  യുഎസ് ഫെഡറൽ റിസർവ് പോളിസി മീറ്റിംഗിലും ഇന്ത്യയിലെയും യുഎസിലെയും പണപ്പെരുപ്പ കണക്കുകളിലുമാകും പ്രധാനമായും ഈ വാരത്തില്‍ വിപണികളുടെ ശ്രദ്ധ കേന്ദ്രീകരിക്കുക. 

രാവിലെ 10.05 നുള്ള വിവരം അനുസരിച്ച് നിഫ്റ്റി 20,992.30ലും സെന്‍സെക്സ് 69,937.30ലും ആണ്. സെൻസെക്‌സ് പാക്കിൽ 20 ഓഹരികള്‍ നേട്ടത്തിലും 10 എണ്ണം നഷ്ടത്തിലുമാണ്. നിഫ്റ്റി 50-യിലെ 27 ഓഹരികൾ നേട്ടത്തിലും 22 ഓഹരികൾ നഷ്ടത്തിലുമാണ് വ്യാപാരം ആരംഭിച്ചത്.

"ഉയർന്ന മൂല്യനിർണ്ണയങ്ങൾക്കിടയിലും ആഗോളവും ആഭ്യന്തരവുമായ സൂചനകൾ വിപണിയിൽ നടന്നുകൊണ്ടിരിക്കുന്ന റാലിയുടെ തുടർച്ചയെ അനുകൂലിക്കുന്നു. എഫ്‌ഐഐകൾ വാങ്ങുന്നവരായി തുടരുന്നത്, ശക്തമായ ഡിഐഐ നിക്ഷേപം, അതിശക്തമായ റീട്ടെയിൽ നിക്ഷേപം, ശക്തമായ സാമ്പത്തിക അടിത്തറയുടെ പിന്തുണയുള്ള ഐപിഒ വിപണി എന്നിവയുടെ അടിസ്ഥാനത്തില്‍ ഉയർന്ന വിലയെ അവഗണിച്ച് ഹ്രസ്വകാലത്തേക്ക് റാലി നിലനില്‍ക്കും," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് ഡോ. വി കെ വിജയകുമാർ പറഞ്ഞു..

നിഫ്റ്റിയേക്കാൾ ബാങ്ക് നിഫ്റ്റിയുടെ മികച്ച പ്രകടനമാണ് വിപണിയിലെ ഒരു പ്രധാന പ്രവണത. കഴിഞ്ഞയാഴ്ച നിഫ്റ്റി 3.5 ശതമാനം ഉയർന്നപ്പോൾ ബാങ്ക് നിഫ്റ്റി 5.5 ശതമാനം ഉയർന്നു. ബാങ്കിംഗ് ഓഹരികളുടെ, പ്രത്യേകിച്ച് മുൻനിര ഓഹരികളുടെ ന്യായമായ മൂല്യനിർണ്ണയം കണക്കിലെടുക്കുമ്പോൾ, ഈ മികച്ച പ്രകടനം തുടരാൻ സാധ്യതയുണ്ട്. മൊത്തത്തിലുള്ള വിപണി സുരക്ഷ ഇപ്പോൾ ലാര്‍ജ് ക്യാപുകളിലാണെന്നും അദ്ദേഹം കൂട്ടിച്ചേര്‍ത്തു. 

ഏഷ്യൻ വിപണികളിൽ സമ്മിശ്ര പ്രവണതകളാണ് ഇന്ന് കാണുന്നത്. ജപ്പാന്റെ നിക്കി നേട്ടമുണ്ടാക്കിയപ്പോൾ ഹോങ്കോങ്ങിന്റെ ഹാംഗ് സെങ് 2 ശതമാനത്തിലധികം ഇടിഞ്ഞു. യുഎസ്, യൂറോപ്യൻ ഓഹരികൾ വെള്ളിയാഴ്ച നേട്ടത്തില്‍ അവസാനിച്ചിരുന്നു. 

വെള്ളിയാഴ്ച സെൻസെക്‌സ് 69,825.60 പോയിന്റിലും നിഫ്റ്റി 20,969.40 പോയിന്റിലുമാണ് ക്ലോസ് ചെയ്തത്.