ആറാം ദിവസവും കുതിച്ച് ഓഹരി വിപണി; സെൻസെക്സ് 187 പോയിന്റ് ഉയർന്നു, നിഫ്റ്റി 24,100 ന് മുകളിൽ

ഇന്ത്യൻ ഓഹരി വിപണി തുടർച്ചയായ ആറാം ദിവസവും നേട്ടത്തിൽ വ്യാപാരം അവസാനിപ്പിച്ചു. വിദേശ ഫണ്ടുകളുടെ വരവും ബാങ്കിംഗ് ഓഹരികളിലെ വാങ്ങലുമാണ് വിപണിക്ക് താങ്ങായത്. സെൻസെക്സ് 187 പോയിന്റ് അഥവാ 0.24 ശതമാനം ഉയർന്ന് 79,595.59 ൽ ക്ലോസ് ചെയ്തു. നിഫ്റ്റി 41 പോയിന്റ് അഥവാ 0.17 ശതമാനം ഉയർന്ന് 24,167.25 ൽ എത്തി. ഇതോടെ ബിഎസ്ഇയിൽ ലിസ്റ്റ് ചെയ്തിട്ടുള്ള കമ്പനികളുടെ മൊത്തം വിപണി മൂല്യം 427 ലക്ഷം കോടിയായി ഉയർന്നു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ഐടിസി, ഹിന്ദുസ്ഥാൻ യൂണിലിവർ, മഹീന്ദ്ര ആൻഡ് മഹീന്ദ്ര, എച്ച്ഡിഎഫ്സി ബാങ്ക്, എറ്റേണൽ, കൊട്ടക് മഹീന്ദ്ര ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, ഐസിഐസിഐ ബാങ്ക് എന്നിവയാണ് പ്രധാന നേട്ടമുണ്ടാക്കിയത്. അതേസമയം ഇൻഡസ്ഇൻഡ് ബാങ്ക്, പവർ ഗ്രിഡ്, ഭാരതി എയർടെൽ, ഇൻഫോസിസ്, ബജാജ് ഫിൻസെർവ് ഓഹരികൾ ഇടിവ് നേരിട്ടു.

സെക്ടറൽ സൂചിക

സെക്ടറൽ സൂചികകളിൽ നിഫ്റ്റി ഐടി, ഓയിൽ & ഗ്യാസ് എന്നിവ ഒഴികെ മറ്റെല്ലാ സൂചികകളും ഇന്ന് നേട്ടത്തിൽ എത്തി. നിഫ്റ്റി ഐടി 0.57 ശതമാനവും ഓയിൽ & ഗ്യാസ് 0.04 ശതമാനവും ഇടിവ് രേഖപ്പെടുത്തി.

നിഫ്റ്റി റിയലിറ്റി (+2.42%), കൺസ്യൂമർ ഡ്യൂറബിൾസ് (+1.50%), ഓട്ടോ (+0.36%), നിഫ്റ്റി മീഡിയ 0.15 ശതമാനവും ഉയർന്നു.

ബിഎസ്ഇ മിഡ്ക്യാപ്പ്, സ്മോൾക്യാപ്പ് സൂചികകൾ യഥാക്രമം 0.81 ശതമാനവും 0.82 ശതമാനവും ഉയർന്നു. ഇന്ത്യ വിക്സ് 1.83 ശതമാനം താഴ്ന്ന് 15.23 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ഷാങ്ഹായ് എസ്എസ്ഇ കോമ്പോസിറ്റ് സൂചികയും ഹോങ്കോങ്ങിലെ ഹാങ് സെങ്ങും ഉയർന്ന് ക്ലോസ് ചെയ്തപ്പോൾ ദക്ഷിണ കൊറിയയിലെ കോസ്പി സൂചികയും ടോക്കിയോയിലെ നിക്കി 225 ഉം താഴ്ന്നു. യൂറോപ്യൻ വിപണികൾ സമ്മിശ്രമായാണ് വ്യാപാരം നടത്തിയത്.

തിങ്കളാഴ്ച യുഎസ് വിപണികൾ ഗണ്യമായി താഴ്ന്നു. നാസ്ഡാക്ക് കോമ്പോസിറ്റ് 2.55 ശതമാനവും ഡൗ ജോൺസ് ഇൻഡസ്ട്രിയൽ ആവറേജ് 2.48 ശതമാനവും എസ് ആൻഡ് പി 500 2.36 ശതമാനവും ഇടിഞ്ഞു.

ആഗോള എണ്ണ സൂചികയായ ബ്രെന്റ് ക്രൂഡ് ഓയിൽ 1.61 ശതമാനം ഉയർന്ന് ബാരലിന് 67.33 ഡോളറിലെത്തി. ഡോളറിനെതിരെ രൂപയുടെ മൂല്യം എട്ട് പൈസ ഇടിഞ്ഞ് 85.23 എന്ന നിലയിലാണ് വ്യാപാരം അവസാനിപ്പിച്ചത്