ഇന്ത്യൻ ഓഹരി വിപണി ഇന്ന് നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 769 പോയിന്റ് അഥവാ 0.95% ഉയർന്ന് 81,721 പോയിന്റിൽ അവസാനിച്ചു. നിഫ്റ്റി 243 പോയിന്റ് അഥവാ 1% ഉയർന്ന് 24,853 ൽ അവസാനിച്ചു.
സെൻസെക്സ് ഓഹരികൾ ( Top Gainers, Losers )
സെൻസെക്സ് കമ്പനികളിൽ, എറ്റേണൽ, പവർ ഗ്രിഡ്, ഐടിസി, ബജാജ് ഫിൻസെർവ്, നെസ്ലെ, ആക്സിസ് ബാങ്ക്, കൊട്ടക് മഹീന്ദ്ര ബാങ്ക്, അദാനി പോർട്ട്സ് എന്നി ഓഹരികളാണ് ഇന്ന് നേട്ടമുണ്ടാക്കിയത്. സൺ ഫാർമ മാത്രമാണ് നഷ്ടം നേരിട്ടത്.
സെക്ടര് സൂചിക
സെക്ടര് സൂചികയിൽ നിഫ്റ്റി എഫ്എംസിജി സൂചികയാണ് ഇന്ന് മികച്ച നേട്ടമുണ്ടാക്കിയത്. സൂചിക 1.6 ശതമാനം ഉയർന്നു. നിഫ്റ്റി പ്രൈവറ്റ് ബാങ്ക്, നിഫ്റ്റി ഐടി എന്നിവ 1 ശതമാനം വീതവും നേട്ടമുണ്ടാക്കി. നിഫ്റ്റി ബാങ്ക് 0.8 ശതമാനവും, നിഫ്റ്റി മെറ്റൽ, നിഫ്റ്റി പിഎസ്യു ബാങ്ക് എന്നിവ യഥാക്രമം 0.7 ശതമാനവും 0.5 ശതമാനവും ഉയർന്നു. അതേസമയം നിഫ്റ്റി ഫാർമ 0.4 ശതമാനം ഇടിഞ്ഞു.
നിഫ്റ്റി മിഡ്ക്യാപ് സൂചിക 0.67 ശതമാനവും സ്മോൾക്യാപ് സൂചിക 0.80 ശതമാനവും ഉയർന്നു. ഇന്ത്യ വിക്സ് 0.11 ശതമാനം ഉയർന്നു 17.28 ൽ എത്തി.
ആഗോള വിപണികൾ
ഏഷ്യൻ വിപണികളിൽ, ജപ്പാനിലെ നിക്കി 225 സൂചികയും ഹോങ്കോങ്ങിലെ ഹാംഗ് സെങ്ങും നേട്ടത്തിൽ സ്ഥിരത കൈവരിച്ചപ്പോൾ, ദക്ഷിണ കൊറിയയിലെ കോസ്പി, ഷാങ്ഹായ് എന്നിവ താഴ്ന്ന നിലയിലാണ് വ്യാപാരം അവസാനിച്ചത്. യൂറോപ്പിലെ വിപണികൾ മിഡ്-സെഷൻ ഡീലുകളിൽ ഉയർന്ന നിലയിലായിരുന്നു വ്യാപാരം. വ്യാഴാഴ്ച രാത്രിയിലെ വ്യാപാരത്തിൽ യുഎസ് വിപണികൾ ഫ്ലാറ്റ് ആയി അവസാനിച്ചു.
ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ 0.23 ശതമാനം ഇടിഞ്ഞ് ബാരലിന് 64.29 യുഎസ് ഡോളറിലെത്തി. ഡോളറിനെതിരെ രൂപയുടെ മൂല്യം 70 പൈസ ഉയർന്ന് 85.25 എന്ന നിലയിലാണ് വ്യാപാരം അവസാനിപ്പിച്ചത്.