കുതിച്ച് ഓഹരി സൂചികകൾ; സെൻസെക്സ് 700 പോയിന്റ് ഉയർന്നു, നിഫ്റ്റി 25,200 ന് മുകളിൽ

ഇന്ത്യൻ ഓഹരി വിപണി ഇന്ന് നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 700.40 പോയിന്റ് അഥവാ 0.85 ശതമാനം ഉയര്‍ന്ന്‌ 82,755.51 ലും നിഫ്റ്റി 200.40 പോയിന്റ് അഥവാ 0.80 ശതമാനം ഉയര്‍ന്ന്‌ 25,244.75 ലും ക്ലോസ് ചെയ്തു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ഭാരത് ഇലക്ട്രോണിക്സ്, കൊട്ടക് മഹീന്ദ്ര ബാങ്ക്, ആക്സിസ് ബാങ്ക് എന്നിവ ഇടിവ് രേഖപ്പെടുത്തി. അതേസമയം ടൈറ്റാൻ, മഹീന്ദ്ര & മഹീന്ദ്ര, ഇൻഫോസിസ്, പവർ ഗ്രിഡ്, ടാറ്റ കൺസൾട്ടൻസി സർവീസസ്, ഭാരതി എയർടെൽ എന്നിവ നേട്ടമുണ്ടാക്കി.

സെക്ടര്‍ സൂചിക

സെക്ടര്‍ സൂചികകളിൽ എല്ലാ മേഖലാ സൂചികകളും ഇന്ന് നേട്ടത്തിൽ വ്യാപാരം അവസാനിപ്പിച്ചു. നിഫ്റ്റി ഓട്ടോ, കൺസ്യൂമർ ഡ്യൂറബിൾസ്, ഐടി, ടെലികോം, ഹെൽത്ത്കെയർ, മീഡിയ എന്നീ സൂചികകൾ 1-2 ശതമാനം വരെ ഉയർന്നു. ബിഎസ്ഇ മിഡ്ക്യാപ് സൂചിക 0.6 ശതമാനവും സ്മോൾക്യാപ് സൂചിക 1.6 ശതമാനവും ഉയർന്നു.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി, ജപ്പാന്റെ നിക്കി 225 സൂചിക, ഷാങ്ഹായുടെ എസ്എസ്ഇ കോമ്പോസിറ്റ് സൂചിക, ഹോങ്കോങ്ങിന്റെ ഹാങ് സെങ് എന്നിവ നേട്ടത്തിലാണ് വ്യാപാരം നടത്തിയത്. യൂറോപ്യൻ വിപണികൾ സമ്മിശ്രമായാണ് വ്യാപാരം നടത്തിയത്. ചൊവ്വാഴ്ച യുഎസ് വിപണികൾ ഉയർന്നു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ വില 1.21 ശതമാനം ഉയർന്ന് ബാരലിന് 67.95 ഡോളറിലെത്തി.. യുഎസ് ഡോളറിനെതിരെ രൂപയുടെ മൂല്യം രണ്ട് പൈസ ഇടിഞ്ഞ് 86.07 ൽ ക്ലോസ് ചെയ്തു.