നേട്ടം തുടര്‍ന്ന് വിപണികള്‍

റിസർവ് ബാങ്കിന്‍റെ ധനനയ അവലോകനത്തിന് മുന്നോടിയായി, വിപണികള്‍ തുടക്ക വ്യാപാരത്തില്‍ മുൻ ദിവസത്തെ റാലി നീട്ടി. ഏഷ്യൻ വിപണികളിലെ ദൃഢമായ പ്രവണതകളും നിക്ഷേപകരുടെ വികാരത്തിന് ആക്കം കൂട്ടി. അടിസ്ഥാന പലിശ നിരക്കുകളില്‍ മാറ്റം വരുത്താതെ റിസര്‍വ് ബാങ്ക് നയം പ്രഖ്യാപിക്കുകയും ചെയ്തു. ഉയര്‍ന്ന പണപ്പെരുപ്പം വിതരണത്തിലെ പ്രതിസന്ധികളുടെ സൃഷ്ടിയാണെന്നും ഡിസംബറോടു കൂടി നിയന്ത്രണ വിധേയമാകുമെന്നുമാണ് കേന്ദ്രബാങ്ക് വിലയിരുത്തുന്നത്. 

തുടക്ക വ്യാപാരത്തില്‍ ബിഎസ്ഇ സെൻസെക്‌സ് 257.41 പോയിന്റ് ഉയർന്ന് 65,888.98 പോയിന്റിലെത്തി. നിഫ്റ്റി 78.25 പോയിന്റ് ഉയർന്ന് 19,624 പോയിന്റിലെത്തി.

ബജാജ് ഫിൻസെർവ്, ടൈറ്റൻ, ബജാജ് ഫിനാൻസ്, ജെഎസ്ഡബ്ല്യു സ്റ്റീൽ, മാരുതി, ടാറ്റ മോട്ടോഴ്‌സ്, ഇൻഡസ്ഇൻഡ് ബാങ്ക് തുടങ്ങിയ ഓഹരികൾ നേട്ടത്തിലാണ്. ലാർസൻ ആൻഡ് ടൂബ്രോ, ഹിന്ദുസ്ഥാൻ യുണിലിവർ, ഭാരതി എയർടെൽ, പവർ ഗ്രിഡ് എന്നിവയാണ് ഇടിവു നേരിടുന്നത്.

ഏഷ്യൻ വിപണികളിൽ, സിയോൾ, ഷാങ്ഹായ്, ഹോങ്കോംഗ് എന്നിവ പോസിറ്റീവ് ടെറിട്ടറിയിൽ വ്യാപാരം നടത്തുമ്പോൾ ടോക്കിയോ താഴ്ന്നു. യുഎസ് വിപണികൾ വ്യാഴാഴ്ച നേരിയ തോതിൽ താഴ്ന്നു. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.33 ശതമാനം ഉയർന്ന് ബാരലിന് 84.35 ഡോളറിലെത്തി.

റിസർവ് ബാങ്ക് ഓഫ് ഇന്ത്യയുടെ മോണിറ്ററി പോളിസി അവലോകനം വിപണിയെ ബാധിക്കാൻ സാധ്യതയില്ലെന്ന് ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു. വിപണി വീക്ഷണകോണിൽ, ഇന്ന് രാത്രി പുറത്തിറങ്ങുമെന്ന് പ്രതീക്ഷിക്കുന്ന യുഎസ് തൊഴിൽ ഡാറ്റയായിരിക്കും കൂടുതൽ പ്രധാനം, അദ്ദേഹം കൂട്ടിച്ചേർത്തു.

വ്യാഴാഴ്ച ബിഎസ്ഇ ബെഞ്ച്മാർക്ക് 405.53 പോയിന്റ് അഥവാ 0.62 ശതമാനം ഉയർന്ന് 65,631.57 പോയിന്റിൽ എത്തി. നിഫ്റ്റി 109.65 പോയിന്റ് അഥവാ 0.56 ശതമാനം ഉയർന്ന് 19,545.75 പോയിന്റിൽ അവസാനിച്ചു. വിദേശ സ്ഥാപന നിക്ഷേപകർ (എഫ്‌ഐഐകൾ) വ്യാഴാഴ്ച 1,864.20 കോടി രൂപയുടെ ഇക്വിറ്റികൾ വിറ്റഴിച്ചതായി എക്സ്ചേഞ്ച് ഡാറ്റ വ്യക്തമാക്കുന്നു.