ആഗോള വിപണിയിലെ ദുർബലമായ പ്രവണതകളും ക്രൂഡ് ഓയിൽ വില കുതിച്ചുയരുന്നതും കാരണം ഇക്വിറ്റി ബെഞ്ച്മാർക്ക് സൂചികകൾ വെള്ളിയാഴ്ച ആദ്യ വ്യാപാരത്തിൽ ഇടിഞ്ഞു. വിദേശ ഫണ്ടുകളുടെ ഒഴുക്കും നിക്ഷേപകരുടെ വികാരത്തെ ബാധിച്ചു.തുടക്ക വ്യാപാരത്തില് സെൻസെക്സ് 320.63 പോയിന്റ് ഇടിഞ്ഞ് 65,308.61 ലെത്തി. നിഫ്റ്റി 106 പോയിന്റ് താഴ്ന്ന് 19,518.70 എന്ന നിലയിലെത്തി.
രണ്ടാം പാദത്തിൽ ഏകീകൃത അറ്റാദായം നേരിയ ഇടിവ് രേഖപ്പെടുത്തി എന്ന റിപ്പോർട്ട് പുറത്തുവന്നതിനെ തുടര്ന്ന് ഹിന്ദുസ്ഥാൻ യുണിലിവര് ഓഹരികള് ഒരു ശതമാനത്തിലധികം ഇടിവ് രേഖപ്പെടുത്തി. എച്ച്സിഎൽ ടെക്നോളജീസ്, ഐടിസി, പവർ ഗ്രിഡ്, ബജാജ് ഫിനാൻസ്, അൾട്രാടെക് സിമന്റ്, ഏഷ്യൻ പെയിന്റ്സ് എന്നിവയും ഇടിവ് നേരിടുന്നു. നെസ്ലെ, ടാറ്റ മോട്ടോഴ്സ്, കൊട്ടക് മഹീന്ദ്ര ബാങ്ക്, ഇൻഡസ്ഇൻഡ് ബാങ്ക് തുടങ്ങിയ ഓഹരികൾ നേട്ടത്തിലാണ്.
ഏഷ്യൻ വിപണികളിൽ, സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ നെഗറ്റീവ് ടെറിട്ടറിയിലാണ് വ്യാപാരം നടത്തുന്നത്. യുഎസ് വിപണികൾ വ്യാഴാഴ്ച നഷ്ടത്തിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.90 ശതമാനം ഉയർന്ന് ബാരലിന് 93.21 ഡോളറിലെത്തി.
വിദേശ നിക്ഷേപക സ്ഥാപനങ്ങള് (എഫ്ഐഐകൾ) വ്യാഴാഴ്ച 1,093.47 കോടി രൂപയുടെ ഇക്വിറ്റികൾ വിറ്റഴിച്ചുവെന്ന് എക്സ്ചേഞ്ച് ഡാറ്റ വ്യക്തമാക്കുന്നു.
"യുഎസിലെ 10 വർഷ ബോണ്ടുകളിലെ ആദായം 5 ശതമാനത്തോളമായി ഉയരുന്നത് ഇക്വിറ്റി വിപണികൾക്ക് തിരിച്ചടിയായി തുടരുന്നു. പശ്ചിമേഷ്യയിലെ അസ്ഥിരമായ സാഹചര്യം, ഇപ്പോൾ വിപണി വലിയ തോതിൽ അവഗണിക്കുന്നുണ്ടെങ്കിലും, സമീപകാലയളവില് ഇത് കൂടുതൽ വെല്ലുവിളികൾ ഉയർത്താം," ജിയോജിത് ഫിനാൻഷ്യൽ സർവീസസിലെ ചീഫ് ഇന്വെസ്റ്റ്മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു
ബിഎസ്ഇ ബെഞ്ച്മാർക്ക് ഇന്നലെ 247.78 പോയിന്റ് അല്ലെങ്കിൽ 0.38 ശതമാനം ഇടിഞ്ഞ് 65,629.24 ൽ എത്തി. നിഫ്റ്റി 46.40 പോയിന്റ് അഥവാ 0.24 ശതമാനം ഇടിഞ്ഞ് 19,624.70 ൽ എത്തി.