Login 
പഠിക്കാം & സമ്പാദിക്കാം 
Home
19 Sept 2026 12:36 PM IST
Summary
യു.എസ് ബോണ്ട് ഈൽഡിലെ വർദ്ധനവും ഡോളറിന്റെ ഇടിവും അന്താരാഷ്ട്ര വിപണിയിൽ സ്വർണ്ണത്തിന് വൻ കുതിപ്പുണ്ടാക്കുമെന്ന് ജെഫ്രീസ് ഗ്ലോബൽ സ്ട്രാറ്റജിസ്റ്റ് ക്രിസ് വുഡ്.
ആഗോള സാമ്പത്തിക വിപണികളെ അമ്പരപ്പിച്ച് സ്വര്ണ്ണവിലയില് ചരിത്രത്തിലെ ഏറ്റവും വലിയ കുതിച്ചുചാട്ടത്തിന് സാധ്യത പ്രവചിച്ച് പ്രമുഖ ആഗോള ബ്രോക്കറേജ് സ്ഥാപനമായ ജെഫ്രീസ് . വരും വര്ഷങ്ങളില് അന്താരാഷ്ട്ര വിപണിയില് സ്വര്ണ്ണവില ഔണ്സിന് 10,000 ഡോളര് എന്ന അവിശ്വസനീയമായ റെക്കോര്ഡ് നിലവാരത്തിലേക്ക് കുതിച്ചുയര്ന്നേക്കാമെന്നാണ് ജെഫ്രീസിന്റെ ഗ്ലോബല് ഹെഡ് ഓഫ് ഇക്വിറ്റി സ്ട്രാറ്റജിസ്റ്റായ ക്രിസ് വുഡ് ചൂണ്ടിക്കാണിക്കുന്നത്. അമേരിക്കന് സാമ്പത്തിക രംഗത്ത് വര്ദ്ധിച്ചുവരുന്ന ഭീമമായ കടബാധ്യതകളും ഉയര്ന്ന പലിശ നിരക്കുകളുമാണ് ആഗോളതലത്തില് തങ്കത്തിന് വന് ഡിമാന്ഡ് സൃഷ്ടിക്കുന്നത്.
യു.എസ് ബോണ്ട് ഈല്ഡും ഡോളറിന്റെ തകര്ച്ചയും
അമേരിക്കന് സാമ്പത്തിക രംഗത്ത് നിലനില്ക്കുന്ന കടുത്ത കടബാധ്യത കാരണം യു.എസ് ട്രഷറി ബോണ്ടുകളുടെ ഈല്ഡുകള് 5 മുതല് 6 ശതമാനം വരെ ഉയര്ന്നാല്, അത് ആഗോള സാമ്പത്തിക വ്യവസ്ഥയ്ക്ക് വലിയ പ്രതിസന്ധിയുണ്ടാക്കും. ലോകത്തിലെ ഏറ്റവും സുരക്ഷിതമായ നിക്ഷേപങ്ങളിലൊന്നായി കരുതപ്പെടുന്ന ഇത്തരം ബോണ്ടുകളുടെ പലിശ നിരക്ക് ഉയരുന്നത് അമേരിക്കന് സര്ക്കാരിന്റെ കടബാധ്യതയ്ക്ക്മേലുള്ള പലിശ ഭാരം ഭീമമായി വര്ദ്ധിപ്പിക്കുകയും സമ്പദ്വ്യവസ്ഥയെ തകര്ച്ചയിലേക്ക് നയിക്കുകയും ചെയ്യും. ഈ പ്രതിസന്ധി മറികടക്കാന് അടിയന്തിര പലിശ നിരക്ക് നിയന്ത്രണങ്ങളിലേക്ക് നീങ്ങാന് യു.എസ് സെന്ട്രല് ബാങ്കായ ഫെഡറല് റിസര്വ് നിര്ബന്ധിതരാകും. എന്നാല്, ഈല്ഡ് കര്വ് കണ്ട്രോളിന്റെ ഭാഗമായി നിര്ബന്ധിതമായി ബോണ്ടുകള് വാങ്ങി കൂട്ടുന്നതിന് ഫെഡറല് റിസര്വിന് വന്തോതില് പുതിയ ഡോളറുകള് അച്ചടിച്ചിറക്കേണ്ടി വരുന്നു. വിപണിയില് ഡോളറിന്റെ ലഭ്യത പെട്ടെന്ന് അധികരിക്കുന്നതോടെ ഡോളറിന്റെ മൂല്യത്തില് വന്തോതിലുള്ള ഇടിവ് സംഭവിക്കുകയും ലോകത്തിലെ പ്രധാന കറന്സിയുടെ തകര്ച്ച ആഗോള വിപണിയിലാകെ വലിയ ആശങ്ക പടര്ത്തുകയും ചെയ്യും.
ഡോളറിന്റെ മൂല്യം തകരുകയും ബോണ്ടുകളില് നിന്നുള്ള യഥാര്ത്ഥ വരുമാനം കുറയുകയും ചെയ്യുന്നതോടെ, നിക്ഷേപകര് തങ്ങളുടെ പണം സംരക്ഷിക്കാന് സുരക്ഷിത താവളമെന്ന നിലയില് സ്വര്ണ്ണത്തിലേക്ക് വച്ചുമാറും. ആഗോളതലത്തില് കേന്ദ്ര ബാങ്കുകളും വലിയ നിക്ഷേപകരും ഡോളര് നിക്ഷേപങ്ങള് വിറ്റഴിച്ച് സ്വര്ണ്ണത്തിലേക്ക് വന്തോതില് പണമൊഴുക്കുന്നത് സ്വര്ണ്ണത്തിന്റെ ഡിമാന്ഡ് കുത്തനെ കൂട്ടുകയും അന്താരാഷ്ട്ര വിപണിയില് സ്വര്ണ്ണവില ചരിത്രത്തിലെ ഏറ്റവും ഉയര്ന്ന പുതിയ റെക്കോര്ഡുകളിലേക്ക് നയിക്കുകയും ചെയ്യും.ഡോളറിന്റെ ആധിപത്യം ഇടിയുന്നത് ആഗോള തലത്തില് ഡി-ഡോളറൈസേഷന് പ്രക്രിയ വേഗത്തിലാക്കുമെന്നാണ് സാമ്പത്തിക വിദഗ്ദ്ധര് ചൂണ്ടിക്കാണിക്കുന്നത്. വിദേശ കറന്സി കരുതല് ശേഖരത്തില് ഡോളറിന്റെ വിഹിതം കുറച്ച് സ്വര്ണ്ണ ശേഖരം ഉയര്ത്താന് ചൈനയും ഇന്ത്യയുമടക്കമുള്ള മുന്നിര കേന്ദ്ര ബാങ്കുകള് ഇതിനകം തന്നെ നടപടികള് ആരംഭിച്ചിട്ടുണ്ട്. ഇത് അന്താരാഷ്ട്ര വിപണിയില് സ്വര്ണ്ണത്തിന് കേവലം ഒരു ആഭരണത്തിനപ്പുറം ഏറ്റവും ശക്തമായ ഒരു വിദേശനാണ്യ കരുതല് ശേഖരമെന്ന പദവി ഉറപ്പിച്ചു നല്കുന്നു.
എ.ഐ നിക്ഷേപ കുമിളയും ഇന്ത്യന് വിപണിയും
ഇതുകൂടാതെ, നിലവില് ആഗോള വിപണികളെ ഭരിക്കുന്ന നിര്മ്മിത ബുദ്ധി അഥവാ എ.ഐ ടെക്നോളജി അധിഷ്ഠിത നിക്ഷേപ തരംഗത്തിന്റെ ഭാവിയെക്കുറിച്ചും ജെഫ്രീസ് നിര്ണ്ണായക വിവരങ്ങള് പങ്കുവെക്കുന്നുണ്ട്. കോടിക്കണക്കിന് ഡോളര് കടമെടുത്ത് നടത്തുന്ന എ.ഐ, സെമികണ്ടക്ടര് മേഖലകളിലെ മൂലധന നിക്ഷേപം കൃത്യമായി വരുമാനമാക്കി മാറ്റാന് കഴിഞ്ഞില്ലെങ്കില്, നിലവിലെ എ.ഐ സൂപ്പര്സൈക്കിള് മങ്ങാന് സാധ്യതയേറെയാണ്.
ഇന്ത്യന് ഓഹരി വിപണിയിലെ 15% റിട്ടേണ് സാധ്യത
എ.ഐ മേഖലയിലെ ഈ നിക്ഷേപ കുമിള തകരുകയാണെങ്കില്, ആഗോള നിക്ഷേപകരുടെ ശ്രദ്ധ വീണ്ടും ഇന്ത്യയടക്കമുള്ള ഉയര്ന്ന സാമ്പത്തിക വളര്ച്ചാ സാധ്യതയുള്ള വളര്ന്നുവരുന്ന വിപണികളിലേക്ക് തിരികെ എത്തും. ഇന്ത്യയിലെ മികച്ച സാമ്പത്തിക വളര്ച്ചയും ശക്തമായ ആഭ്യന്തര വായ്പാ വിതരണവും കണക്കിലെടുക്കുമ്പോള്, വരും വര്ഷങ്ങളില് ഇന്ത്യന് ഓഹരി വിപണിയില് സാമ്പത്തിക വളര്ച്ചയ്ക്ക് അനുസൃതമായ 15 ശതമാനത്തോളം വാര്ഷിക റിട്ടേണ് നിക്ഷേപകര്ക്ക് പ്രതീക്ഷിക്കാമെന്നും ജെഫ്രീസ് റിപ്പോര്ട്ട് നിരീക്ഷിക്കുന്നു.ആഗോള പണപ്പെരുപ്പവും ഡോളറിന്റെ ദിശയും വരും ദിവസങ്ങളില് സ്വര്ണ്ണത്തിന്റെയും ഇന്ത്യന് വിപണിയുടെയും ഗതി നിര്ണ്ണയിക്കുന്നതില് നിര്ണ്ണായക പങ്ക് വഹിക്കും.